1 Samyel 7 - Labib An Kreol Seselwa

Kof Lalyans I Al Kiryat-Yearim

¹ Bann zabitan Kiryat-Yearim ti vin pran Kof SENYER, e anmenn dan lakaz Abinadab, lo kolin. Zot ti swazir son garson Eleazar pour pran swen Kof SENYER.

² Kof SENYER ti reste lontan Kiryat-Yearim; 20 an ti pase, e pep Izrael ti lamante devan SENYER pour sa.

Samyel, Sef Pep Izrael

³ Samyel ti dir pep Izrael antye, “Si zot retourn ver SENYER avek tou zot leker, fer disparet parmi zot tou sa bann bondye etranze, ek bann stati Astarte; si zot donn SENYER zot leker e servi zis li, alor, i ava delivre zot dan lanmen bann Filisten.”

⁴ Alor, pep Izrael ti abandonn bann Baal ek bann stati Astarte; zot ti servi zis SENYER.

⁵ Apre, Samyel ti dir, “Rasanble pep Izrael antye Mispa, e mon ava priy SENYER pour zot.”

⁶ Zot ti rasanble zot tou Mispa. Zot ti pran delo e vers ater devan SENYER. Zot ti fer en zenn sa zour e zot ti dir, “Nou'n komet pese kont SENYER.” Se la Mispa, kot Samyel ti ziz pep Izrael.

⁷ Kan bann Filisten ti tande ki pep Izrael ti'n rasanble Mispa, bann sef Filisten ti monte pour atak Izrael. Ler pep Izrael ti aprann sa, zot ti per.

⁸ Pep Izrael ti dir Samyel, “Kontinyen priy SENYER, nou Bondye pour nou, pour ki i sov nou dan lanmen bann Filisten.”

⁹ Samyel ti pran en pti mouton ki ti ankor pe tete, e ofer koman sakrifis konplet devan SENYER. Samyel ti enplor SENYER pour pep Izrael, e SENYER ti reponn.

¹⁰ Pandan ki Samyel ti pe ofer sakrifis, bann Filisten ti aprose pour atak pep Izrael. Sa zour, SENYER ti anvoy gro loraz ki ti fer en kantite fraka e met konfizyon parmi larme Filisten. Pep Izrael ti bat zot.

¹¹ Bann zonm Izrael ti sorti Mispa, pourswiv bann Filisten e bat zot ziska devan Bet-Kar.

¹² Alor, Samyel ti pran en ros ki i ti plas ant Mispa ek Senn. I ti apel sa landrwa Eben-Ezer an dizan, “Ziska la, SENYER in sekour nou.”

¹³ Alor, bann Filisten ti ganny imilye e zot pa ti vin ankor dan teritwar Izrael. Pandan tou lavi Samyel, SENYER ti montre son pwisans kont bann Filisten.

¹⁴ Zot ti rann tou bann lavil Izrael ki zot ti'n pran dan rezyon ant Ekronn ziska Gat, avek zot teritwar. Izrael ti repran tou son teritwar ki ti avek bann Filisten. Ti osi annan lape ant pep Izrael ek bann Amorit.

¹⁵ Samyel ti ziz pep Izrael pandan tou son lavi.

¹⁶ Toulezan, i ti fer en tournen Betel, Gilgal ek Mispa e i ti ziz pep Izrael dan tou sa bann landrwa.

¹⁷ Apre, i ti retourn Rama, kot i ti reste. La osi, i ti ziz lepep. La, i ti konstri en lotel pour SENYER.