1 Samyel 6 - Labib An Kreol Seselwa

Bann Filisten I Fer Retournen Kof Lalyans

¹ Kof SENYER ti reste set mwan dan pei bann Filisten.

² Alor, bann Filisten ti apel bann pret ek bann mazisyen. Zot ti demande, “Ki nou pou fer avek Kof SENYER? Dir nou ki mannyer nou pou fer li retourn kot li.”

³ Zot ti dir, “Si zot fer retournen Kof Bondye Izrael, pa retourn li san rekonpans, omwen ofer en don. Konmsa, zot ava ganny gerizon e zot ava konnen akoz i'n kontinyen pini zot.”

⁴ Bann Filisten ti demande, “Ki kalite rekonpans nou kapab ofer li?” Zot ti reponn, “Senk lobze annor ek senk souri annor dapre lakantite sef Filisten, akoz menm fleo ti tonm lo zot tou e lo bann sef osi.

⁵ Fer bann reprezantasyon zot bann boubou, ek reprezantasyon zot bann souri ki devaste pei; rann glwar Bondye Izrael. Kekfwa i ava mwen sever anver zot, anver zot bondye, e anver zot pei.

⁶ Akoz zot montre zot antete parey bann Ezipsyen ek Faraon? Zot devre rapel ki mannyer Bondye ti anmenn zot, ziska zot ti forse les pep Izrael ale.

⁷ Aprezan, fer en saret nef e pran de vas, ki son piti pe ankor tete e ki pa'n zanmen travay; anmar zot avek saret e anmenn zot piti dan park.

⁸ Zot ava pran Kof SENYER e met li lo saret; zot ava met dan en kes akote, bann lobze annor ki zot ava ofer Bondye pour pardon zot pese, e zot ava les saret ale.

⁹ Zot ava veye si i pran semen dan direksyon Bet-Semes; alor, nou ava konnen ki vreman Bondye Izrael ki'n anvoy tou sa bann maler lo nou; si i al dan lot direksyon, nou ava konnen ki sa bann maler in ariv par azar, pa li ki'n anvoy zot lo nou.”

¹⁰ Bann Filisten ti aksepte sa konsey. Zot ti pran de vas ki ti pe donn tete, anmar zot avek saret e ferm bann piti dan park.

¹¹ Zot ti plas Kof SENYER ek sa kes ki ti annan bann souri annor ek bann reprezantasyon zot boubou, lo saret.

¹² Bann bef ti pran deswit semen dan direksyon Bet-Semes. Zot ti gard menm semen an kriyan; zot pa ti tourn ni adrwat ni agos. Bann sef Filisten ti mars deryer ziska frontyer Bet-Semes.

¹³ Bann zabitan Bet-Semes ti pe rekolte dible dan vale; zot ti lev lizye e apersevwar Kof Lalyans; zot ti ranpli avek kontantman.

¹⁴ Alor, saret ti ariv dan plantasyon Zozye ki reste Bet-Semes e aret kot en gro ros. Zot ti kas dibwa saret e ofer sa de vas koman sakrifis konplet, devan SENYER.

¹⁵ Bann levit ti pran Kof SENYER ek sa kes ki ti akote e ki ti annan bann lobze annor e depoz lo sa gro ros. Sa zour, bann zabitan Bet-Semes ti ofer bann sakrifis konplet ek lezot sakrifis, devan SENYER.

¹⁶ Apre ki zot ti'n war tousala, bann sef Filisten ti retourn se zot, Ekronn, menm zour.

¹⁷ Bann Filisten ti'n ofer SENYER bann lobze annor pour reparasyon zot fot: Enn pour Asdod, enn pour Gaza, enn pour Askelonn, enn pour Gat, e enn pour Ekronn.

¹⁸ Ti annan osi bann souri annor pour sak lavil fortifye, ki ti pour sa senk sef Filisten, depi lavil fortifye, ziska vilaz san miray e ziska sa gro ros kot zot ti'n depoz Kof SENYER. Sa gro ros dan plantasyon Zozye dan Bet-Semes, i ankor la.

¹⁹ SENYER ti pini zabitan Bet-Semes, akoz zot ti'n get Kof SENYER. Sa zour, 70 zonm ti mor: 50,000 parmi lepep. Lepep ti an dey, akoz SENYER ti'n anvoy sa gran fleo lo zot.

²⁰ Bann zabitan Bet-Semes ti demande: Lekel ki kapab reziste dan prezans SENYER, sa Bondye sen? Kote Kof SENYER pou ale ler i ava sorti isi?

²¹ Zot ti anvoy mesaze kot bann zabitan Kiryat-Yearim pour dir zot: Bann Filisten in retourn avek Kof SENYER. Zot ti desann e vin serse pour anmenn kot zot.