1 Samyel 5 - Labib An Kreol Seselwa

Kof Lalyans I kot bann Filisten

¹ Bann Filisten ti'n sezi Kof lalyans Bondye; zot ti'n sorti Eben-Ezer avek e anmenn li Asdod.

² Zot ti'n pran Kof Bondye e met li dan tanp Dagon, akote Dagon.

³ Kan bann zabitan Asdod ti leve lannmen granmaten, zot ti war Dagon lafas ater devan Kof SENYER. Zot ti pran Dagon e remet li dan son plas.

⁴ Lannmen ankor, ler zot ti leve granmaten, zot ti war Dagon lafas ater devan Kof SENYER: Latet Dagon ek son de lanmen ti'n kase e fannen devan laport; ti reste li zis lekor.

⁵ Pour sa rezon ki ziska ozordi, bann pret Dagon ek tou sa ki antre dan tanp Dagon ki Asdod, pa mars lo padport.

⁶ Lanmen SENYER ti pini zabitan Asdod; i ti montre son pwisans par bann katastrof e bann boubou ki i ti anvoy lo zot.

⁷ Ler bann zabitan Asdod ti war sa ki ti pe arive avek zot, zot ti dir: Kof Bondye Izrael pa devre reste isi kot nou. Akoz sa, Bondye in pini nou ek Dagon nou Bondye.

⁸ Zot ti fer vin tou bann sef Filisten ki zot ti rasanble se zot e demande, “Ki nou pou fer avek Kof Bondye Izrael?” Bann sef ti reponn, “Fodre al depoz sa Kof Bondye Izrael Gat.” Alor, zot ti anmenn Kof Bondye Izrael Gat.

⁹ Me, de ki Kof Bondye ti'n ariv Gat, lanmen SENYER ti tap lavil. En gran lafreyer ti tonm lo bann zabitan, pli pti ziska pli gran; zot ti ganny en kantite boubou.

¹⁰ Alor, zot ti anvoy Kof Bondye Ekronn, me osito ki i ti ariv Ekronn, bann zabitan Ekronn ti met opozisyon. Zot ti kriye: Zot in anvoy Kof Bondye pep Izrael isi kot nou, zis pour fer nou ganny touye, nou avek nou pep.

¹¹ Alor, zot ti rasanble tou bann sef Filisten e dir zot, “Retourn Kof Bondye Izrael dan son pei, sinon nou ek nou pep, nou pou mor.” Annefe, SENYER ti'n montre son pwisans lo lavil; ti annan gran lafreyer.

¹² Bann ki pa ti mor ti'n ganny bann boubou e zot demann pour sekour ti monte ziska lesyel.