1 Samyel 4 - Labib An Kreol Seselwa

¹ Pep Izrael antye ti antann parol Samyel. Pep Izrael ti al lager kont bann Filisten. Zot ti etabli zot kan pre Eben-Ezer, tandis ki bann Filisten ti fikse zot kan pre Afek.

Kof Sakre I Tonm dan Lanmen Lennmi

² Bann Filisten ti pran zot pozisyon kont pep Izrael, e lager ti deklare. Zot ti bat pep Izrael, e touy anviron 4,000 zonm dan sa batay.

³ Kan leres bann zonm Izrael ti retourn dan zot kan, bann ansyen ti demande: Akoz SENYER in les nou ganny bate par bann Filisten ozordi? Annou al sers Kof lalyans Silo e anmenn li isi, pour ki SENYER ava la parmi nou e i ava sov nou dan lanmen nou bann lennmi.

⁴ Lepep ti anvoy en group zonm Silo, pour al sers Kof lalyans Bondye liniver ki son tronn i ant bann seriben. De garson Eli, Hofni ek Fineas ti akonpanny Kof lalyans Bondye.

⁵ Kan Kof lalyans SENYER ti antre dan kan, pep Izrael antye ti dan lazwa e zot ti lans en gran laklamasyon; later ti tranble.

⁶ Bann Filisten ti antann sa tapaz laklamasyon e zot ti demande: Ki savedir sa tapaz dan kan pep Ebre? Zot ti aprann ki Kof SENYER ti'n ariv dan kan.

⁷ Bann Filisten ti per. Zot ti dir: Bondye in ariv dan kan. Maler lo nou! Nanryen pa pou parey avan!

⁸ Maler lo nou! Lekel ki pou delivre nou dan lanmen sa bann bondye? Sanmenm sa bann bondye ki ti pini bann Ezipsyen avek toudsort fleo dan dezer.

⁹ Pep Filisten! Pran kouraz e azir koman bann zonm brav, pour ki zot pa vin lesklav bann Ebre, parey zot ti nou lesklav! Azir koman bann zonm brav e al lager.

¹⁰ Bann Filisten ti lager e bat pep Izrael ki ti sov dan zot latant. Zot ti ganny en gro bate: 30,000 zonm apye dan Izrael ti mor.

¹¹ Kof Bondye ti ganny sezi, e de garson Eli, Hofni ek Fineas ti ganny touye.

Lanmor Pret Eli

¹² En zonm sorti Benzamen ti taye depi fron batay. I ti ariv Silo menm zour, son lenz desire, son latet kouver avek later.

¹³ Ler sa zonm ti arive, Eli ti pe espere, asiz lo son sez dan bor semen; i ti dan en gran traka pour Kof lalyans Bondye. Koman sa zonm ti antre dan lavil, i ti anons nouvel e dimoun dan lavil antye, ti kriye.

¹⁴ Eli ti antann sa bann leokri e i ti demande: Ki savedir tou sa bann tapaz ki mon tande? Alor, sa zonm ti depese pour li ariv kot Eli e anons li nouvel.

¹⁵ Eli ti annan 98 an; i ti konpletman aveg.

¹⁶ Sa zonm ti dir Eli, “Mon'n sove, sorti lo fron batay, ozordi menm.” Eli ti demann li, “Ki'n arive laba mon garson?”

¹⁷ Sa mesaze ti reponn, “Pep Izrael in sove devan bann Filisten e nou'n ganny en gro bate. Menm ou de garson, Hofni ek Fineas in ganny touye, e Kof lalyans Bondye in ganny sezi.”

¹⁸ Osito ki i ti antann mansyonn Kof lalyans Bondye, Eli ti savire lo son sez, tonm par deryer atraver laport, kas son likou e i ti mor. I ti deza vye e lour. I ti ziz dan Izrael pandan 40 an.

Lanmor Vev Fineas

¹⁹ Son belfiy, fanm Fineas, ti ansent e byen pre pour ganny son baba. Kan i ti tande ki Kof lalyans ti'n ganny sezi, e ki son boper ek son mari ti'n mor, i ti konmans ganny douler lakousman e son baba ti ne.

²⁰ Akoz i ti pe mor, bann fanm ki ti pe okip li ti dir, “Pa per ou'n ganny en garson.” Me i pa ti ni menm antren.

²¹ I ti apel sa zanfan Ikabod an dizan: Laglwar in kit Izrael. Sa akoz Kof lalyans Bondye ti'n ganny sezi e ki son boper ek son mari ti'n mor.

²² I ti dir, “Laglwar in kit Izrael e Kof lalyans in ganny sezi.”