1 Samyel 29 - Labib An Kreol Seselwa

Akis I Fer David Retourn Ziklag

¹ Bann Filisten ti rasanble tou zot bann troup Afek, e Izrael ti etabli zot kan pre kot en pti larivyer Zizreel.

² Ler bann komandan Filisten ti avanse avek bann sef 100 ek sef 1,000, David ek son bann zonm ti deryer avek Akis.

³ Bann komandan Filisten ti demande, “Ki sa bann Ebre pe fer la?” Akis ti dir bann sef Filisten, “Sa David, ki ti serviter Sail, lerwa Izrael. I annan plizyer lannen depi ki i avek mwan, depi ki i'n kit Sail, ziska ozordi, mon pa'n trouv nanryen mal kont li.”

⁴ Me bann komandan Filisten ti ankoler kont Akis. Zot ti dir li, “Fer sa zonm retourn dan lavil ki ou'n donn li. Fodre pa ki i vin avek nou. I kapab tourn kont nou dan lager. Meyer fason pour li reganny konfyans son senyer, se an touyan nou bann zonm.

⁵ Pa li menm sa David pour ki dimoun ti danse e sante: Sail in touy bann mil; David bann dizenn milye!”

⁶ Alor, Akis ti apel David. I ti dir li, “Lo lavi SENYER, ou en zonm drwat e mon ti pou kontan fer ou pran par dan lager avek mon larme. Depi ki ou'n ariv kot mwan ziska ozordi, mon pa'n trouv nanryen mal avek ou, me lezot komandan pa dakor avek ou.

⁷ Aprezan, retourn anpe e pa fer nanryen pour eksit lakoler sa bann komandan Filisten.”

⁸ David ti demann Akis, “Me ki mon'n fer? Ki ou war kont mwan depi ki mon kot ou? Akoz mon pa kapab al lager kont bann lennmi mon senyer lerwa?”

⁹ Akis ti reponn David, “Mon konnen ki ou'n fer mwan plezir parey en mesaze Bondye. Me sa bann komandan Filisten in dir: Fodre pa ki i vin dan lager ansanm avek nou.

¹⁰ Aprezan, lev granmaten; pran tou bann zonm ki'n vin isi avek ou, e ale de ki lizour i fer.”

¹¹ Alor, David ek son bann zonm ti leve granmaten e retourn dan pei bann Filisten. Kanta bann Filisten, zot ti mont Zizreel.