1 Samyel 27 - Labib An Kreol Seselwa

David parmi bann Filisten

¹ David ti dir dan li menm: En zour ou lot, mon pou mor par lanmen Sail. Meyer keksoz mon kapab fer, se sove e al dan pei bann Filisten. Konmsa, Sail ava aret rod mwan partou dan teritwar Izrael; konmsa, mon ava kapab sape.

² Alor, David avek son 600 zonm, ti al kot Akis, garson Maok, lerwa Gat.

³ David avek son bann zonm ti al enstal zot Gat, kot Akis. Sak zonm ti annan son fanmir avek li; David ti annan son de fanm: Ahinoanm, ki sorti Zizreel ek Abigail, vev Nabal, ki sorti Karmel.

⁴ Ler Sail ti aprann ki David in sove e al Gat, i ti aret rod li.

⁵ David ti dir Akis, “Si ou krwar ou kapab fer mwan konfyans, permet mwan trouv en landrwa dan lakanpanny, kot mon ava enstal mwan. Akfer mwan, ou serviter, mon bezwen kontinyen reste se ou, dan lavil rwayal?”

⁶ Alor, Akis ti donn li lavil Siklag. Depi sa zour, sa lavil in reste pour bann lerwa Zida.

⁷ David ti reste parmi bann Filisten pandan enn an e kat mwan.

⁸ David ek son bann zonm ti monte e al atak bann Gesourit, bann Girzit ek bann Amalesit, ki depi toultan ti reste dan sa rezyon, ant Sour ek Lezip.

⁹ David ek son bann zonm ti al fer bann latak; zot pa ti kit personn vivan, ni zonm, ni fanm. Zot ti anmenn tou mouton, bef, kabri, bourik, samo ek lenz; apre, zot ti retourn kot Akis.

¹⁰ Ler Akis ti demann David, kote i'n al fer bann latak ozordi? David ti reponn: Dan en rezyon Zida, dan Negev; oubyen: Dan en rezyon Yerameel; oubyen ankor: Dan rezyon bann Kainit.

¹¹ David pa ti kit ni zonm, ni fanm vivan pour li pa anmenn personn Gat. Annefe, i ti dir dan li menm: Konmsa, zot pa pou kapab rakonte e dir: La sa ki David in fer. Sa ti son mannyer azir pandan tou letan ki i ti reste parmi bann Filisten.

¹² Akis ti annan konfyans dan David, e i ti mazinen dan li menm: David in fer lennmi parmi son prop pep Izrael; e i reste mon zonm pour touzour.