1 Samyel 22 - Labib An Kreol Seselwa

Sail I Fer Masakre bann Pret

¹ David ti kit lavil Gat, e al kasyet dan kavern Adoulanm. Kan son bann frer ek tou son fanmir ti aprann sa nouvel, zot ti al kot li.

² Tou dimoun ki ti dan problenm, tou bann ki ti annan det, e ki ti dan fristrasyon, ti rasanble kot li, e i ti vin zot sef. Ti annan apepre 400 zonm avek li.

³ David ti kit sa landrwa e al Mispa dan pei Moab. I ti dir avek lerwa Moab, “Mon demann ou pour les mon manman ek mon papa vin reste kot ou, ziska mon ki konnen sa ki Bondye pou fer avek mwan.”

⁴ I ti anmenn son papa ek son manman kot lerwa Moab e zot ti reste avek li tou letan ki David ti pe viv dan kavern.

⁵ Profet Gad ti dir David, “Pa reste la; al dan pei Zida.” Alor, David ti sorti, e al dan lafore Heret.

⁶ Sail ti ganny nouvel lo David ek bann zonm ki ti avek li. I ti pe asize Gibea lo en kolin, anba en pye tamaris, son lans dan son lanmen e son bann serviter otour li.

⁷ Sail ti dir avek zot, “Ekout byen, bann Benzamit! Eski garson Zese, ava donn sakenn zot propriyete ek plantasyon rezen? Eski i pou fer zot tou vin sef 1,000 ek sef 100?

⁸ Annefe, zot tou, zot in fer konplo kont mwan e personn pa'n enform mwan lo lalyans ant mon garson ek garson Zese. Personn parmi zot pa'n pran pitye pour mwan, ni fer mwan konnen ki mon garson in tourn mon serviter kont mwan pour met mwan dan en pyez parey zot in fer ozordi.”

⁹ Doeg, en Edomit, ki ti sef bann zonm Sail, ti reponn, “Mon ti war garson Zese vin Nob kot Ahimelek, garson Ahitoub.

¹⁰ Ahimelek ti konsilte SENYER pour li. I ti donn li provizyon ek lepe Golyat, sa Filisten.”

¹¹ Lerwa ti fer apel pret Ahimelek, garson Ahitoub, e tou son fanmir, bann pret ki ti dan lavil Nob. Zot tou, zot ti vin kot lerwa.

¹² Sail ti dir, “Ekout byen, garson Ahitoub.” I ti reponn, “Wi, mon senyer.”

¹³ Sail ti dir li, “Akoz ou'n fer konplo kont mwan, ou, ek garson Zese? Ou'n donn li dipen ek en lepe, e ou'n konsilte Bondye pour li, pour ki i revolte kont mwan e esey met mwan dan en pyez. Se sa ki zot in fer ozordi.”

¹⁴ Ahimelek ti reponn lerwa. “Lekel parmi tou bann ou serviter ki fidel parey David? I zann lerwa, sef son gard personnel e i ganny respekte dan ou pale.

¹⁵ Ozordi, pa premye fwa ki mon'n konsilte Bondye pour li. Mon demann ou pa rann mwan responsab sa zafer, ni personn dan mon fanmir, akoz mon pa ti konn nanryen ladan.”

¹⁶ Lerwa ti dir, “Ahimelek! Ou pou mor, ou, ek tou ou fanmir.”

¹⁷ Lerwa ti dir avek son bann gard ki ti otour li, “Ale e touy bann pret SENYER, akoz zot osi, zot in ed David; zot ti konnen ki i ti pe sove e zot pa ti fer mwan konnen.” Me bann serviter lerwa pa ti oule met lanmen lo bann pret SENYER pour touy zot.

¹⁸ Alor, lerwa ti dir Doeg, “Ale ou! Touy bann pret.” Doeg, sa Edomit, ti al touy sa bann pret. Sa zour, i ti touy 85 zonm ki port lefod linenn.

¹⁹ I ti masakre tou bann zabitan dan Nob, lavil bann pret. I ti touy zonm koman fanm, zanfan ek pti baba, bef, bourik, mouton ek kabri. I ti touy tou.

²⁰ Enn parmi bann garson Ahimelek, garson Ahitoub, ki ti apel Abiatar, ti sove pour al zwenn David.

²¹ Abiatar ti dir David ki Sail in touy bann pret SENYER.

²² David ti dir Abiatar, “Mon ti konnen sa zour, ki Doeg, sa Edomit ti la, ti pou al dir Sail. Annefe, mwan ki'n koz lanmor tou ou fanmir.

²³ Pa per, reste avek mwan, akoz, sa enn ki oule mon lanmor, i oule osi ou lanmor. Avek mwan, ou ava ganny byen proteze.”