1 Samyel 20 - Labib An Kreol Seselwa

Zonatan I Ed David

¹ David ti kit Nayot, dan Rama. I ti al war Zonatan e demann li, “Ki mon'n fer? Ki fot mon'n fer? Ki pese mon'n komet kont ou papa pour li anvi touy mwan?”

² Zonatan ti reponn li, “Zanmen! Ou pa pou mor. Mon papa pa fer nanryen ditou san dir mwan. Akoz alor, eski i ava kasyet sa avek mwan? Pa posib.”

³ David ti fer ankor sa serman, “Ou papa i konn tre byen lanmour ki ou annan pour mwan. I ti mazinen: Zonatan pa devre konn sa akoz i ava soufer. Me par SENYER ki vivan e par ou prop lavi, i annan zis en pa ant mwan ek lanmor.”

⁴ Zonatan ti dir David, “Mon ava fer tou sa ki ou oule.”

⁵ David ti reponn li, “Demen i lafet nouvellin. Mon devre al manz avek lerwa. Me les mwan ale. Mon ava al kasyet dan lakanpanny ziska trwazyenm swar.

⁶ Si ou papa i remark mon labsans, ou ava dir li: David in ensiste pour ganny permisyon pour li al deswit dan son lavil, Betlehenm, akoz i annan en sakrifis annyel pour tou lafanmir.

⁷ Si i dir: I bon, alor, napa problenm pour mwan, ou serviter. Me si i ankoler, sa i laprev ki i determinen pour fer mwan ditor.

⁸ Alor, montre ou senserite anver mwan, ou serviter, akoz nou annan en lalyans ki nou'n fer, devan SENYER. Me si mon koupab, ou menm touy mwan; akoz ki ou devre livre mwan avek ou papa?”

⁹ Zonatan ti dir li, “Zanmen! Pa krwar ki si mon ti konnen ki mon papa ti anvi fer ou ditor, mon pa pou dir ou.”

¹⁰ David ti dir Zonatan, “Si ou papa i reponn ou avek lakoler, lekel ki pou fer mwan konnen?”

¹¹ Zonatan ti dir David, “Annou al dan lakanpanny.” Alor, tou le de ti al dan lakanpanny.

¹² Zonatan ti dir David, “Par SENYER, Bondye Izrael, demen sa ler oubyen apredmen, mon pou kestyonn mon papa konsernan son lentansyon lo size David. Si tou i mars byen, mon ava fer ou konnen.

¹³ Me si mon papa i anvi fer ou ditor, mon ava osi fer ou konnen, e mon ava les ou al anpe. SENYER ava avek ou parey i ti avek mon papa.

¹⁴ Tan ki mon ankor vivan, montre mwan par fidelite SENYER e mon pa pou mor;

¹⁵ kontinyen montre sa menm fidelite anver mon fanmir, menm kan SENYER ava'n detri tou lennmi David.”

¹⁶ Zonatan ti fer en lalyans lanmitye avek David e avek son fanmir. SENYER ava vanz bann lennmi David.

¹⁷ Zonatan ti fer David pret ankor serman pour ki i ava touzour kontan li, akoz i ti kontan David parey son prop lekor.

¹⁸ Apre, Zonatan ti dir li, “Demen i lafet nouvellin, ou plas pou vid e ou labsans pour ganny remarke.

¹⁹ Trwazyenm zour, ou ava dan sa landrwa kot ou ti kasyet dernyen fwa e reste pre kot Ros Ezel.

²⁰ Mon ava tir trwa fles dan sa direksyon, konmsi mon pe viz lo en keksoz.

²¹ Alor, mon ava dir garson ki avek mwan: Al rod sa bann fles. Si mon dir sa garson: Sa bann fles i devan ou, ranmase! Alor ou ava sorti, par SENYER ki vivan, pou napa danze.

²² Me si mon dir sa garson: Sa bann fles i pli lwen, ale, akoz SENYER i oule ou ale.

²³ Kanta sa parol ki nou'n donn kanmarad, ou ek mwan, SENYER i temwen ant ou ek mwan pour touzour.”

²⁴ Alor, David ti al kasyet dan lakanpanny. Ti nouvellin, lerwa ti asiz pour manze.

²⁵ I ti asiz dan son plas parey labitid kont miray. Zonatan ti leve e Abner ti pe asiz akote Sail, me plas David ti reste vid.

²⁶ Sa zour, Sail pa ti dir nanryen, akoz i ti mazinen: I zis par azar; i enpir; sertennman ki i enpir.

²⁷ Me dezyenm zour, lannmen nouvellin, plas David ti reste vid ankor. Sail ti dir avek son garson Zonatan, “Akoz garson Zese pa'n vin manze, ni yer, ni ozordi?”

²⁸ Zonatan ti reponn Sail, “David ti sipliy mwan pour les li al Betlehenm.

²⁹ I ti dir: Les mwan ale. I annan en sakrifis lafanmir laba e mon frer in ensiste pour mwan la. Alor, si ou mon bon zanmi, les mwan ale, e mon ava war mon bann frer. Se pour sa rezon ki i absan lo latab lerwa.”

³⁰ Alor, Sail ti ankoler avek Zonatan. I ti dir li, “Ou garson en move fanm! Ou en zanfan rebel! Ou krwar mon pa konnen ki ou soutir garson Zese; ou fer onte e fer onte ou manman!

³¹ Akoz osi lontan ki garson Zese pou vivan lo later, ni ou, ni ou rwayonm pa pou an sekirite. Aprezan, anvoy rod li, e anmenn li kot mwan, akoz i merit lanmor.”

³² Zonatan ti reponn son papa, Sail, “Akoz i bezwen ganny touye? Ki i'n fer?”

³³ Sail ti anvoy son lans lo li pour touy li. Alor, Zonatan ti konnen ki son papa ti'n determinen pour fer touy David.

³⁴ Zonatan ti leve dan en lakoler vyolan. I pa ti manz nanryen dezyenm zour nouvellin. I ti sagren pour David, akoz son papa ti'n ensilte li.

Zonatan I Averti David

³⁵ Lannmen bomaten, Zonatan ti pran en pti garson avek li e al dan lakanpanny kot i ti annan randevou avek David.

³⁶ I ti'n dir sa pti garson, “Taye, al anmas bann fles ki mon tire.” Zis koman sa pti garson ti taye, i ti tir en fles ki ti depas li.

³⁷ Kan sa pti garson ti ariv dan landrwa kot fles Zonatan ti'n tonbe, Zonatan ti kriye, “Sa fles i pli lwen.”

³⁸ Zonatan ti kriy avek li ankor, “Degaze, fer vit, pa arete.” Alor, sa pti garson ti ranmas sa bann fles e retourn kot son met.

³⁹ Sa pti garson pa ti konn sa ki ti pe pase. Zis Zonatan ek David ki ti konn sa zafer.

⁴⁰ Zonatan ti donn son zarm sa pti garson. I ti dir li, “Ale, anmenn sa dan lavil.”

⁴¹ Ler sa pti garson ti'n ale, David ti leve kot i ti pe kasyet, tonm lafas ater, e prostern trwa fwa. David ek Zonatan ti anbras kanmarad e plere, ziska ki David ti kapab kontrol li.

⁴² Zonatan ti dir David, “Al anpe. Tou le de, nou'n fer serman lo non SENYER: SENYER i ava ant mwan ek ou e ant mon desandan e ou desandan pour touzour.” I ti leve e ale, e Zonatan ti retourn dan lavil.