1 Samyel 19 - Labib An Kreol Seselwa

Zonatan I Defann David

¹ Sail ti koz avek Zonatan e avek tou son bann zonm dan son pale, son lentansyon pour fer touy David. Me Zonatan, garson Sail, ti kontan David en kantite.

² Alor, Zonatan ti enform David. I ti dir li, “Mon papa, Sail pe rod en fason pour touy ou. Demen bomaten vey byen lo ou. Reste kasyet dan en landrwa sekre.

³ Mwan, mon ava sorti e debout akote mon papa dan laplenn kot ou ete e mon ava koz avek mon papa lo ou size. Mon ava get son reaksyon e mon ava fer ou konnen.”

⁴ Zonatan ti koz avek son papa, Sail, an faver David. I ti dir li, “Mon rwa! Pa fer pese kont ou serviter David, akoz i pa'n fer pese kont ou. O kontrer, i'n byen azir anver ou:

⁵ I ti riske son lavi e i ti touy sa Filisten; SENYER ti donn Izrael antye en gran laviktwar. Ou ti war, e ou ti rezouir. Akoz ou oule fer pese e vers disan inosan? Akoz ou oule fer David mor san rezon?”

⁶ Sail ti ekout Zonatan e i ti fer sa serman, “Par SENYER ki vivan, personn pa pou touy David.”

⁷ Zonatan ti apel David, e dir li tou sa ki son papa in dir. Apre, Zonatan ti anmenn David kot Sail, e i ti repran son servis parey avan.

Mikal I Sov David

⁸ Lager ti kontinyen. David ti al lager kont bann Filisten ki ti ganny en gran defet; zot ti bezwen sove.

⁹ Bondye ti anvoy en move lespri lo Sail letan i ti pe asiz kot li, son lans dan son lanmen. David ti pe zwe laarp.

¹⁰ Sail ti esey klout David kont miray avek son lans, me David ti saye e lans ti anfons dan miray. Alor, David ti sove; sa swar, i ti sap lanmor.

¹¹ Sail ti anvoy bann zonm kot David pour veye e touy li son lannmen bomaten. Me Mikal, fanm David, ti dir li, “Si ou pa sove aswar menm, demen ou pou en zonm mor.”

¹² Mikal ti fer David desann par lafnet. Konmsa ki David ti sape.

¹³ Mikal ti pran en stati ki i ti met dan lili, met en kouvertir an pwal kabri lo latet lili e kouver sa stati avek en lenz.

¹⁴ Kan Sail ti anvoy bann zonm pour aret David, Mikal ti dir ki i malad.

¹⁵ Sail ti fer zot retournen pour al war David. I ti dir zot, “Anmenn li isi kot mwan avek son lili, pour mwan touy li.”

¹⁶ Kan bann zonm ti retournen, zot ti war sa stati dan lili avek en lapo kabri lo latet lili.

¹⁷ Sail ti dir Mikal, “Akoz ou'n tronp mwan konmsa? Akoz ou'n les mon lennmi ale e les li sap mwan?” Mikal ti reponn, “David ti dir mwan: Si ou pa les mwan ale, mon pou touy ou.”

David ek Sail Rama

¹⁸ Konmsa ki David ti taye e sape. I ti al Rama kot Samyel e rakont li tou sa ki Sail ti'n fer li. Apre, i ti al reste Nayot avek Samyel.

¹⁹ Zot ti fer konnen Sail ki David i Nayot dan Rama.

²⁰ Sail ti anvoy bann zonm pour aret David. Kan zot ti war bann profet pe profetize avek Samyel antet, lespri Bondye ti antre dan bann zonm Sail e zot osi, zot ti profetize.

²¹ Kan Sail ti antann sa, i ti anvoy lezot zonm; zot osi, zot ti profetize. Sail ti anvoy en trwazyenm group zonm; zot osi, zot ti profetize.

²² Alor, Sail li menm ti al Rama. Ler i ti ariv kot sa gran sitern ki Sekou, i ti demande, “Oli Samyel ek David?” Zot ti reponn, “Zot in al Nayot, dan Rama.”

²³ I ti diriz dan direksyon Nayot, dan Rama. Lespri Bondye ti antre dan li osi; dan semen, i ti profetize ziska ki i ti ariv Nayot dan Rama.

²⁴ Li osi, i ti tir son lenz, e i ti profetize devan Samyel. I ti tonbe reste touni tou lazournen e tou lannwit. Sa rezon ki zot dir: Eski Sail osi i parmi bann profet?