1 Samyel 16 - Labib An Kreol Seselwa

David I Ganny Swazir koman Lerwa

¹ SENYER ti dir Samyel, “Ziska kan ou pou pler Sail? Mwan, mon'n rezet li koman lerwa Izrael. Ranpli ou korn avek delwil e ale. Mon anvoy ou kot Zese en zabitan Betlehenm, akoz mon'n war mon lerwa parmi son bann zanfan.”

² Samyel ti dir, “Koman mon pou ale? Si Sail i tande, i pou touy mwan.” SENYER ti dir, “Ou ava anmenn en zenis avek ou e dir: Mon vin ofer SENYER en sakrifis.

³ Envit Zese pour sakrifis e mon ava montre ou ki ou pou fer. Ou ava vers delwil lo latet sa enn ki mon ava dir ou.”

⁴ Samyel ti fer sa ki SENYER ti'n dir li; i ti al Betlehenm. Bann ansyen dan lavil ti vin zwenn li an tranblan. Zot ti dir, “Eski ou anmenn lape?”

⁵ I ti dir, “Wi! Mon'n vin ofer SENYER en sakrifis. Pirifye zot, e vin avek mwan pour ofer sakrifis.” I ti osi demann Zese ek son bann garson pour pirifye zot e i ti envit zot pour ofer sakrifis SENYER.

⁶ Kan zot ti arive, i ti dir dan li menm ler i ti war Eliab: Sirman, sa enn devan li, ki SENYER in swazir.

⁷ Me SENYER ti dir Samyel, “Pa get son laparans ni son grander, akoz mon'n rezet li. SENYER pa war parey zonm i war. Zonm i get laparans eksteryer, me SENYER i get dan leker.”

⁸ Zese ti apel Abinadab e fer li pas devan Samyel. Me, Samyel ti dir, “Pa li non pli. SENYER pa'n swazir li.”

⁹ Zese ti fer pase Sama. Me Samyel ti dir, “Pa li non pli. SENYER pa'n swazir li.”

¹⁰ Zese ti fer pase set son bann garson devan Samyel e Samyel ti dir, “SENYER pa'n swazir okenn parmi zot.”

¹¹ Apre, Samyel ti dir Zese, “Eski sa i tou bann garson ki ou annan?” I ti reponn, “I reste zis sa enn pli zenn; i pe vey troupo mouton.” Samyel ti dir, “Anvoy sers li; akoz nou pa pou reste la ziska ler i arive.”

¹² Alor, Zese ti anvoy sers li. I ti en zennonm avek en ten kler, zoli lizye e en zoli regar. SENYER ti dir Samyel, “Leve! Vers delwil lo son latet. Li menm ki mon'n swazir.”

¹³ Samyel ti pran sa korn delwil e vers lo son latet parmi tou son bann frer. Apartir sa zour, lespri SENYER ti desann lo David. Samyel ti retourn Rama.

David I Antre dan Servis Sail

¹⁴ Lespri SENYER ti kit Sail e SENYER ti anvoy en move lespri pour tourmant li.

¹⁵ Bann serviter dan pale Sail ti dir li, “La en move lespri sorti kot Bondye pe tourmant ou.

¹⁶ Met! Nou ou bann serviter. Nou ava rod en zonm ki zwe byen laarp. Kan sa move lespri sorti kot Bondye ava tourmant ou, i ava zwe laarp e ou ava byen.”

¹⁷ Sail ti dir son bann serviter, “Rod mwan en zonm ki kapab zwe byen, e anmenn li kot mwan.”

¹⁸ Enn bann serviter ti reponn, “Mon'n war en garson Zese, ki sorti Betlehenm, ki zwe byen. I osi en konbatan, en vayan gerye, i koz byen e i en zoli zennzan. SENYER i avek li.”

¹⁹ Sail ti anvoy bann mesaze kot Zese, pour dir li: Anvoy mwan David ou garson, ki pe vey troupo.

²⁰ Zese ti pran en bourik, sarz li avek dipen, en sak diven ek en zenn kabri. I ti anvoy kot Sail, par lentermedyer son garson David.

²¹ David ti ariv kot Sail e travay dan son servis. Sail ti kontan li en kantite e i ti ganny swazir pour anmenn zarm lerwa.

²² Sail ti fer dir Zese: Les David reste dan mon servis, akoz mon kontan li.

²³ Nenport ki moman ki sa move lespri sorti kot Bondye ti tourmant Sail, David ti pran laarp e zwe. Sa ti kalme Sail e i ti byen; sa move lespri ti kit li.