1 Samyel 15 - Labib An Kreol Seselwa

Lager kont Amalek

¹ Samyel ti dir avek Sail, “SENYER ki'n anvoy mwan konsakre ou koman lerwa lo son pep, Izrael. Alor, ekout parol ki SENYER i deklare.

² La sa ki SENYER liniver i deklare: Mon'n deside fer Amalek rann kont pour sa ki i'n fer Izrael, ler i ti bar zot semen, kan zot ti sorti Lezip.

³ Aprezan, al atak Amalek e detri konpletman tou sa ki i annan; ou pa pou eparny li; ou ava touy zonm ek fanm, zanfan ek pti baba, bef, mouton ek kabri, samo ek bourik.”

⁴ Alor, Sail ti mobiliz son bann troup Telaim. Ti annan 200,000 zonm apye, e 10,000 zonm sorti dan tribi Zida.

⁵ Sail ti mars ziska lavil Amalek e kasyet dan brousay.

⁶ Sail ti dir avek bann Kenit, “Ale! Pa reste kot bann Amalesit, pour ki mon pa detri zot ansanm, akoz zot in fidel avek tou bann Izraelit ler zot ti sorti Lezip.” Alor, bann Kenit ti reste lwen avek bann Amalesit.

⁷ Sail ti ganny laviktwar lo bann Amalesit depi Havila ziska Sour ki dan Les Lezip.

⁸ I ti kaptir Agag, lerwa Amalesit, vivan, e masakre konpletman tou son pep.

⁹ Sail avek son bann zonm ti eparny lavi Agag, e bann meyer mouton ek bef, bann zannimo gra, bann zenn mouton, e tou sa ki ti bon; i pa ti detri zot, me tou sa ki ti enferyer e san valer, ti ganny konpletman detri.

Bondye I Rezet Sail

¹⁰ SENYER ti adres laparol avek Samyel,

¹¹ “Mon regrete ki mon'n fer Sail vin lerwa; in detournen avek mwan e i pa'n gard mon parol.” Sa ti fatig latet Samyel ki ti plere devan SENYER tou lannwit.

¹² Samyel ti lev granmaten pour al kot Sail. Zot ti dir Samyel ki Sail ti'n al Karmel pour poz en moniman e apre redesann Gilgal.

¹³ Alor, kan Samyel ti zwenn Sail, Sail ti dir li, “SENYER i avek ou! Mon'n akonpli tou sa ki SENYER in ordonnen.”

¹⁴ Samyel ti demande, “Me ki sa bann tapaz mouton dan mon zorey ek bann bef ki pe kriye ki mon tande?”

¹⁵ Sail ti dir li, “Nou'n pran zot kot bann Amalesit. Lepep in eparny bann meyer mouton ek bef pour ofer sakrifis SENYER ou Bondye; me leres, nou'n detri konpletman.”

¹⁶ Samyel ti dir Sail, “Ase! Les mwan anons ou sa ki SENYER in dir mwan pandan lannwit.” Sail ti dir li, “Ale, dir mwan.”

¹⁷ Samyel ti dir, “Pa ler dan ou prop lizye, ou ti santi ou pti, ki ou ti vin sef tou bann tribi Izrael, e ki SENYER ti donn ou lonksyon pour fer ou vin lerwa lo Izrael.

¹⁸ SENYER in anvoy ou an dizan: Ale e detri konpletman sa bann peser, pep Amalesit e lager kont zot, ziska ki zot ganny eksterminen.

¹⁹ Akoz ou pa'n ekout lavwa SENYER? Akoz ou'n bezwen tonm lo bann piyaz lager e fer sa ki depler SENYER?”

²⁰ Sail ti dir Samyel, “Mon'n byen ekout lavwa SENYER e mon'n swiv semen kot SENYER ti'n anvoy mwan. Mon'n anmenn isi Agag, lerwa Amalek e mon'n detri konpletman bann Amalesit.

²¹ Me lepep in pran bann piyaz lager: Mouton, bef ki ti devre ganny detri, pour ofer koman sakrifis pour SENYER, ou Bondye dan Gilgal.”

²² Samyel ti dir, “Eski SENYER i pran otan plezir dan lofrann ek sakrifis plito ki dan lobeisans sa enn ki ekout lavwa SENYER? Lobeisans i vomye ki sakrifis. Soumisyon i vomye ki lagres bouk.

²³ Rebelyon i parey pese sorselri; larogans i osi grav ki ladorasyon pti stati bondye etranze. Akoz ou'n rezet laparol SENYER, li osi i'n rezet ou: Ou pou nepli lerwa.”

²⁴ Alor, Sail ti dir Samyel, “Mon'n fer pese; akoz mon'n dezobei bann komannman SENYER ek ou bann parol; mon ti per lepep e mon'n ekout zot.

²⁵ Aprezan, mon sipliy ou, pardonn mon pese e retourn avek mwan e mon ava prostern devan SENYER.”

²⁶ Samyel ti dir Sail, “Mon pa pou retourn avek ou akoz ou'n rezet parol SENYER e SENYER i rezet ou: Ou pou nepli lerwa lo Izrael.”

²⁷ Koman Samyel ti vire pour li ale, Sail ti sezi son rob ki ti desire.

²⁸ Samyel ti dir, “Ozordi, SENYER in desir rwayonm Izrael, pour li pran avek ou, e donn li avek en lot ki meyer ki ou.

²⁹ Laglwar Izrael pa koz manti e i napa regre. I pa en et imen pour regrete.”

³⁰ Alor Sail ti dir, “Mon'n pese, me fer mwan loner devan bann ansyen mon pep e devan Izrael, retourn avek mwan pour e mon ava prostern devan SENYER ou Bondye.”

³¹ Alor Samyel ti retourn avek li, e Sail ti prostern devan SENYER.

³² Apre, Samyel ti dir, “Anmenn Agag, lerwa bann Amalesit isi.” Agag ti avans devan li avek lafyerte. I ti dir dan li menm: Sirman, douler lanmor in fini pase.

³³ Samyel ti dir, “Parey ou lepe in priv bann fanm zot zanfan, ou manman osi i ava san zanfan parmi sa bann fanm.” Samyel ti koup Agag an morso devan SENYER, dan Gilgal.

³⁴ Apre, Samyel ti al Rama e Sail ti mont kot li Gibea, lavil Sail.

³⁵ Samyel pa ti revwar Sail ankor ziska son lanmor. Me Samyel ti sagren pour Sail. SENYER ti regrete ki i ti'n fer Sail lerwa Izrael.