1 Samyel 14 - Labib An Kreol Seselwa

Zonatan I Atak en Group Filisten

¹ En zour, Zonatan, garson Sail, ti dir avek son porter zarm, “Vini! Annou travers lot kote dan kan bann Filisten.” Me i pa ti dir nanryen son papa.

² Sail ti pe kanpe lo frontyer Givea anba en pye grenad dan Migronn. Avek li ti annan 600 zonm.

³ Ahiya, garson Ahitoub frer Ikabod, garson Fineas, garson Eli, pret SENYER dan Silo ki ti met lefod. Bann zonm pa ti konnen ki Zonatan ti'n ale.

⁴ Dan bann pasaz ki Zonatan ti bezwen traverse pour al lot kote dan kan bann Filisten, ti annan en gro ros pwent lo sak kote. Enn ti apel Boses e lot ti apel Sene.

⁵ Enn sa bann gro ros pwent ti lo kote Nor anfas Mikmas e lot lo kote Sid, anfas Gibea.

⁶ Zonatan ti dir son porter zarm, “Vini! Annou al lot kote dan kan bann Filisten, sa bann zonm ki pa'n sirkonsi. Petet SENYER ava ed nou. Annefe, menm si i annan en kantite nou, sa pa pou anpes SENYER donn son laviktwar.”

⁷ Son porter zarm ti dir li, “Pa ezite fer sa ki ou annan lide fer. Mon avek ou, konmsi ou leker.”

⁸ Zonatan ti dir, “Alor, annou pas kot sa bann zonm e fer zot war nou.

⁹ Si zot dir nou: Reste la. Nou pe vin kot zot. Alor, nou pou reste lanmenm e nou pa pou mont kot zot.

¹⁰ Me si zot dir nou: Mont kot nou, nou ava monte, akoz SENYER in livre zot dan nou lanmen. Sa i ava en siny pour nou.”

¹¹ Alor, tou le de ti prezant zot devan post bann Filisten. Bann Filisten ti dir, “Gete! La bann Ebre pe sorti dan bann trou kot zot ti pe kasyet.”

¹² Bann zonm kot post ti dir avek Zonatan ek son porter zarm, “Mont kot nou. Nou annan keksoz pour dir zot.” Zonatan ti dir son porter zarm, “Swiv mwan, akoz SENYER in livre zot dan lanmen Izrael.”

¹³ Zonatan ti mont katpat, son porter zarm ti mont deryer li. Bann Filisten ti tonbe devan Zonatan e son porter zarm ti touy bann ki ti par deryer.

¹⁴ Dan sa premye latak, Zonatan ek porter zarm, ti touy apepre 20 zonm dan en pti lespas, apepre lanmwatye arpan.

¹⁵ Ti annan lafreyer dan kan, dan zalantour e parmi lepep antye. Bann zonm dan kan ensi ki bann ki ti pe atake, ti tranble avek lafreyer. Later ti tranble; ti annan lafreyer terib.

Defet bann Filisten

¹⁶ Bann gard Sail depi Gibea dan teritwar Benzamen, ti war lafoul dimoun pe fannen partou dan tou kote.

¹⁷ Sail ti dir avek son bann zonm, “Mon demann zot fer lapel e gete lekel ki manke parmi nou.” Kan zot ti fer lapel, Zonatan ek son porter zarm ti manke.

¹⁸ Sail ti dir Ahiya, “Anmenn Kof Bondye isi.” Annefe, dan sa letan, Kof Bondye ti kot bann Izraelit.

¹⁹ Letan Sail ti pe koz avek pret, tapaz dan kan Filisten ti ogmante. Alor, Sail ti dir pret, “Tir ou lanmen.”

²⁰ Apre, Sail ek son bann zonm ti rasanble e avans kot lager ti pe pase. La, zot ti'n viz zot zarm kont kanmarad e ti annan en gran konfizyon.

²¹ Parey labitid, parmi bann Filisten ti annan bann Ebre ki ti'n mont avek zot dan kan e dan zalantour. Zot ti zwenn avek pep Izrael ki ti avek sail ek Zonatan.

²² Ler bann Izraelit ki ti pe kasyet dan rezyon montanny Efraim ti tande ki bann Filisten ti pe sove, zot osi zot ti zwenn ansanm dan lager, dan en konba pli sere.

²³ Sa zour, SENYER ti delivre Izrael. Lager ti kontinyen ziska an deor Bet-Aven.

Levennman apre Lager

²⁴ Bann Izraelit ti anba presyon sa zour. Alor, Sail ti pronons en serman lo pep Izrael, “Maler lo sa zonm ki ava manze avan fernwanr, avan ki mon'n vanz mon bann lennmi.” Alor, personn pa ti manz nanryen.

²⁵ Tou bann zonm ti'n ariv dan lafore e ti annan dimyel partou.

²⁶ Ler zot ti antre dan lafore, zot ti war dimyel pe koule, me personn pa ti oze met dan son labous, akoz latroup ti respekte zot serman.

²⁷ Me Zonatan pa ti'n tande ki son papa ti fer latroup pret serman. I ti tranp bout son baton dan en gof dimyel e met dan son labous; e son lizye ti eklersi

²⁸ En dimoun dan latroup ti dir li, “Ou papa ti obliz latroup pret serman kan i ti dir: Maler lo sa zonm ki met manze dan son labous ozordi.” Me latroup ti fatige.

²⁹ Zonatan ti dir, “Mon papa in anmenn maler dan pei. Gete ki mannyer mon lizye i kler akoz mon'n gout en pti gin sa dimyel.

³⁰ I ti ava pli byen si i ti'n les bann zonm manz piyaz lager ki zot ti'n pran avek zot lennmi, zot ti ava'n touy bokou plis Filisten.”

³¹ Sa zour, bann Izraelit ti bat bann Filisten depi Mikmas ziska Ayalonn. Latroup ti tre fatige.

³² Zot ti sot lo sa ki zot ti'n pran avek bann Filisten: Mouton, toro, zenn bef, egorz zot e ofer zot an sakrifis ater; la troup ti manz lanmenm lo disan.

³³ Zot ti dir Sail, “La bann troup pe fer pese kont SENYER; zot pe manz lavyann lo disan.” Sail ti dir, “Zot in kondwir zot koman bann tret; toudswit, roul en gro ros isi kot mwan.

³⁴ Al parmi latroup e dir sak dimoun anmenn son bef, son mouton oubyen son kabri e vin egorz li isi. Zot ava manz li isi, me pa kot disan in koule pour pa fer pese kont SENYER.” Alor sa swar, sakenn ti anmenn son bef e egorz li dan sa landrwa.

³⁵ Sail ti fer en lotel pour SENYER. Sa ti premye lotel ki Sail ti fer pour SENYER.

³⁶ Sail ti dir, “Annou desann e atak bann Filisten pandan lannwit e depouy zot ziska granmaten; fodre pa i reste en sel zonm parmi zot.” Zot ti dir, “Fer tou sa ki fer ou plezir.” Alor en pret ti dir, “Annou konsilte Bondye isi.”

³⁷ Sail ti konsilte Bondye, “Eski mon ava desann pour atak bann Filisten? Eski ou pou livre zot dan lanmen Izrael?” Me sa zour, Bondye pa ti reponn.

³⁸ Alor Sail ti dir avek bann sef lepep, “Apros isi! Ozordi, zot pou war ki pese in ganny fer ozordi.

³⁹ Par lavi SENYER, Sover Izrael, menm si sa i lafot mon garson Zonatan, i pou mor.” Me personn parmi lepep pa ti reponn.

⁴⁰ I ti dir avek pep Izrael antye, “Plas zot lo en kote, mwan ek mon garson Zonatan, nou ava lo lot kote.” Lepep ti dir Sail, “Fer sa ki fer ou plezir.”

⁴¹ Sail ti dir SENYER, “Bondye Izrael, fer nou konn laverite.” Zonatan ek Sail ti ganny swazir e lepep pa ti ganny akize.

⁴² Alor, Sail ti dir, “Tir osor ant mwan ek mon garson Zonatan.” Zonatan ti ganny swazir.

⁴³ Sail ti dir Zonatan, “Dir mwan ki ou'n fer.” Zonatan ti rakont li, “Mon ti gout en pe dimyel avek bout mon baton ki ti dan mon lanmen. Alor, mon pare pour mor.”

⁴⁴ Sail ti dir, “Bondye ava pini mwan severman. Zonatan! Ou pou mor.”

⁴⁵ Alor, lepep ti dir Sail, “Kwa! Zonatan pou mor, li ki'n anmenn sa gran laviktwar pour Izrael? Zanmen! Par SENYER ki vivan, pa en sel bren seve lo son latet pou tonbe; se avek led Bondye ki i'n azir ozordi.” Konmsa ki pep Izrael ti sov Zonatan sa zour, e i pa ti mor.

⁴⁶ Apre sa, zot ti atak bann Filisten. Sail ti remonte e bann Filisten ti retourn se zot.

Bann Laviktwar Sail

⁴⁷ Kan Sail ti'n vin lerwa pep Izrael, i ti lager kont tou son bann lennmi lo tou kote: Kont Moab, kont bann Amonit, kont Edonm, kont bann lerwa Soba, e kont bann Filisten. I ti ranport laviktwar Kont zot tou.

⁴⁸ I ti lager avek kouraz, bat Amalek, e delivre Izrael kont bann ki ti pe depouy zot.

⁴⁹ Bann garson Sail ti: Zonatan, Yisvi ek Malki-Soua. Non son de fiy ti: Merab, premye e Mikal dezyenm.

⁵⁰ Fanm Sail ti apel Ahinoanm, fiy Ahimas. Komandan son larme ti apel Abner, garson Ner, ki ti tonton Sail.

⁵¹ Kis, papa Sail, ek Ner, papa Abner, ti bann garson Abyel.

⁵² Dan lepok Sail, ti toultan annan gro lager kont bann Filisten. Sak zonm vayan ki Sail ti remarke, i ti anrol li.