1 Samyel 13 - Labib An Kreol Seselwa

Revolt kont bann Filisten

¹ Sail ti annan… an kan i ti vin lerwa; i ti renny 2 an lo Izrael.

² Sail ti swazir 3,000 Izraelit. 2,000 ti avek Sail dan Mikmas e dan kolin Betel, e 1,000 ti al Gibea, dan teritwar Benzamen avek Zonatan. I ti fer leres lepep retourn dan lakour, sakenn dan son latant.

³ Zonatan ti bat latroup bann Filisten ki ti Gibea. Lezot Filisten ti tande sa ki ti'n arive. Sail ti fer soufle tronpet e pei antye ti tande. I ti dir, “Fodre ki bann Ebre i antann sa.”

⁴ Izrael antye ti tande sa ki ti ganny dir: Sail in defet latroup bann Filisten e bann Filisten i nepli konnen ki pou fer avek zot. Lepep ti ralye deryer Sail dan Gilgal.

⁵ Bann Filisten ti rasanble pour konbat Izrael. Zot ti annan 30,000 kales lager, 6,000 kales avek seval, e en gran troup zonm parey gren disab lo bor lanmer. Zot ti etabli zot kan Mikmas, Les avek Bet-Aven.

⁶ Kan Bann zonm Izrael ti war ki zot ti dan difikilte akoz lepep ti'n ganny kwense, zot ti al kasyet dan bann kavern, dan bann trou, anba ros, dan souteren e dan bann sitern.

⁷ Bann Ebre ti osi travers larivyer Zourden pour al dan pei Gad ek Galaad. Sail ti ankor Gilgal, e tou dimoun ki ti pe swiv li, ti tranble.

⁸ I ti esper set zour, parey Samyel ti'n dir. Me Samyel pa ti ariv Gilgal, e lepep ti al sakenn dan son kote.

⁹ Alor, Sail ti dir, “Anmenn bann sakrifis konplet ek bann sakrifis lape.” Sail ti ofer bann sakrifis konplet.

¹⁰ Zis koman i ti fini ofer sakrifis, Samyel ti arive. Sail ti sorti pour beni li.

¹¹ Samyel ti demande, “Ki ou'n fer?” Sail ti reponn, “Mon ti war ki lepep ti pe disperse e pe abandonn mwan; ou pa ti la dan letan fikse; bann Filisten ti'n rasanble Mikmas.

¹² Alor, mon ti dir dan mwan menm: Bann Filisten ava desann pour atak mwan Gilgal, e mon pa'n demann faver SENYER. Alor, mon ti pran lo mwan menm e ofer sakrifis konplet.”

¹³ Samyel ti dir Sail, “Ou'n azir parey en fou; ou pa'n gard komannman SENYER ou Bondye, parey i ti ordonn ou. SENYER ti pou etabli ou pour touzour koman lerwa Izrael.

¹⁴ Aprezan ou renny pa pou kontinyen. SENYER in rod en lot zonm ki i kontan e SENYER in apwent li koman sef lo son pep, akoz ou pa'n obzerv sa ki SENYER ti'n ordonn ou fer.”

¹⁵ Samyel ti leve e monte sorti Gilgal pour al Gibea dan teritwar Benzamen. Sail ti enspekte bann zonm ki ti avek li; ti annan apepre 600 zonm.

¹⁶ Sail, son garson Zonatan ek bann dimoun ki ti avek zot, ti reste Gibea dan teritwar Benzamen, tandis ki bann Filisten ti pe kanpe Mikmas.

¹⁷ Troup ki fer destriksyon bann Filisten ti sorti dan kan an trwa group. Premye group ti diriz ver Ofra, ver pei Soual.

¹⁸ Dezyenm ti diriz ver Bet-Horonn e trwazyenm ti diriz ver frontyer ki domin vale Seboim, dan direksyon dezer.

¹⁹ Ti nepli annan forzron dan pei Izrael antye, akoz bann Filisten ti'n dir: Bann Ebre pa devre fabrik bann lepe ek bann lans.

²⁰ Alor, tou bann Izraelit ti desann kot bann Filisten pour fit zot zouti: Pyos, lars, pik.

²¹ Ti kout ser pour fit bann zouti lagrikiltir, fit bann lars e dres bann fours.

²² Alor, zour batay, bann ki ti avek Sail ek Zonatan ti napa ni lepe, ni lans dan zot lanmen. Zis Sail ek Zonatan son garson ki ti annan.

²³ Bann Filisten ti vin poste zot kot pasaz Mikmas.