1 Samyel 12 - Labib An Kreol Seselwa

Diskour Samyel avek Pep Izrael

¹ Samyel ti dir pep Izrael antye, “Mon'n ekout tou sa ki zot in dir mwan e mon'n donn zot en lerwa pou diriz zot.

² Aprezan, zot annan en lerwa pou gid zot. Mwan mon vye, mon latet i blan e mon bann garson i la avek zot. Mon'n gid zot depi mon zenes, ziska ozordi.

³ La mon la. Akiz mwan devan SENYER e devan sa enn ki'n resevwar son lonksyon. Lekel ki mon'n pran son bef? Lekel ki mon'n pran son bourik? Lekel ki mon'n eksplwate? Lekel ki mon'n fer dimal? Lekel ki mon'n kraze? Avek lekel ki mon'n deza pran gous pour ferm mon lizye lo sa ki i'n fer. Dir mwan, e mon ava rann zot sa ki pour zot.”

⁴ Zot ti dir, “Ou pa'n fer nou dimal, ou pa'n kraz nou e ou pa'n zanmen pran gous avek personn.”

⁵ I ti dir zot ankor, “SENYER i temwen kont zot e sa enn ki'n ganny lonksyon i temwen ozordi, ki zot pa'n war nanryen dan mon lanmen.” Lepep ti dir: Wi! Nou temwen.

⁶ Alor, Samyel ti dir lepep: SENYER ki ti anvoy Moiz ek Aaron pour fer zot zanset monte sorti Lezip.

⁷ Aprezan, reste debout; mon pou rakont zot dan prezans SENYER, tou bann keksoz ki SENYER in fer pour zot ek zot bann zanset pour etablir lazistis.

⁸ Apre ki Zakob ti vin Lezip, zot bann zanset ti kriy ver SENYER. SENYER ti anvoy Moiz ek Aaron ki ti fer zot zanset sorti Lezip e fer zot reste isi dan sa landrwa.

⁹ Me zot ti oubliy SENYER, zot Bondye, ki ti vann zot avek Sisera, sef larme Hasor, avek bann Filisten e avek lerwa Moab, ki ti lager kont zot.

¹⁰ Zot ti kriy ver SENYER: Nou'n fer pese, nou'n abandonn SENYER e nou'n servi bann Baal ek bann Astarte. Aprezan, delivre nou dan lanmen nou bann lennmi e nou ava servi ou.

¹¹ SENYER ti anvoy Yeroub-Baal; apre, Bedann, Zefte ek Samyel. I ti delivre zot dan lanmen zot bann lennmi ki ti pe anserkle zot e zot ti kapab reste an sekirite.

¹² Kan zot ti war Nahas, lerwa bann Amonit, atak zot, zot ti dir: Nou oule en lerwa, nou osi pour gid nou. Pourtan SENYER, zot Bondye, ki zot lerwa.

¹³ Aprezan, la lerwa ki zot in swazir, sa enn ki zot in demande. SENYER in donn zot en lerwa.

¹⁴ Si zot respekte SENYER, si zot servi li, si zot ekout li e pa revolte kont bann komannman SENYER, alor zot, avek lerwa ki pe renny lo zot, pou swiv SENYER zot Bondye.

¹⁵ Me si zot pa ekout lavwa SENYER, si zot revolte kont bann komannman SENYER, SENYER pou tourn kont zot, parey i ti fer kont zot bann zanset.

¹⁶ Aprezan, debout trankil e zot ava war sa gran mervey ki SENYER pou fer devan zot.

¹⁷ Ozordi, pa i zour rekolt dible? Mon pou enplor SENYER e i pou fer loraz gronnyen e fer tonbe lapli. Alor, zot ava konpran ki zot in tre mal azir devan SENYER an demandan en lerwa.

¹⁸ Samyel ti priy SENYER. Menm zour, SENYER ti anvoy loraz ek lapli. Tou lepep ti annan gran respe SENYER ek Samyel.

¹⁹ Lepep antye ti dir Samyel, “Priy SENYER ou Bondye pour nou, ou bann serviter, pour ki nou pa mor, akoz, avek tou nou pese, nou'n azout sa enn, an demandan en lerwa.”

²⁰ Samyel ti dir lepep, “Pa bezwen per. Menm si zot in fer tou sa bann pese, kontinyen swiv SENYER e servi li avek tou zot leker.

²¹ Pa tourn kont li pour swiv bann fo bondye ki pa servi dan nanryen, ni kapab delivre zot, akoz zot pa vo nanryen.

²² SENYER pa pou abandonn son pep, akoz son non i gran; SENYER in deside fer zot vin son pep.

²³ Mon pa pou zanmen aret priy SENYER pour zot e fer pese kont li. Mon pou ansenny zot semen ki bon e drwat.

²⁴ Annan respe pour SENYER e servi li senserman avek tou zot leker. Pran kont tou sa bann gran mervey ki i'n fer avek zot.

²⁵ Me si zot fer sa ki mal, i pou detri zot avek zot lerwa.”