1 Rwa 1 - Labib An Kreol Seselwa

Vyeyes Lerwa David

¹ Lerwa David ti'n vin byen vye. Menm si zot ti kouver li avek en lenz, i ti kontinyen ganny fre.

² Alor, son serviter ti dir lerwa, “Mon senyer lerwa! Nou ava rod en zenn fiy pour ou; i ava sonny ou e dormi dan bor ou pour sof ou.”

³ Zot ti rod en zoli fiy atraver pei Izrael antye. Zot ti trouv en fiy Sounamit ki ti apel Abisag e zot ti anmenn li kot lerwa.

⁴ Sa zoli zenn fiy, ti antre dan servis lerwa e ti sonny li; me lerwa pa ti annan okenn relasyon avek li.

⁵ Adoniya, garson Hagit, ti fer gran zar. I ti dir, “Mwan ki pou vin lerwa.” I ti fer prepar son bann kales, bann kavalye, ek 50 zonm pour al devan li.

⁶ Adoniya ti en zoli garson; i ti ne apre Absalon. Pandan tou son lavi, son papa pa'n zanmen repros li pour demande: Akoz ou fer sa?

⁷ Adoniya ti al fer konplo avek Zoab, garson Serouya ek pret Abiatar. Zot ti swiv li e siport li.

⁸ Me pret Sadok ek Benaya, garson Yoyada, profet Natan, Simei ek Rei, ek tou bann gerye David, pa ti siport Adoniya.

⁹ Adoniya ti ofer sakrifis mouton, toro, zenn bef gra, pre kot ros Zohelet ki akote sours Rogel. I ti envit son bann frer, bann garson lerwa, ek bann zonm enportan dan servis lerwa dan rwayonm Zida.

¹⁰ Me i pa ti envit profet Natan, ni Benaya, ni bann gard rwayal, ni son frer Salomon.

Salomon I Vin Lerwa

¹¹ Alor, Natan ti al kot Batseba, manman Salomon. I ti dir li, “Eski ou'n tande ki Adoniya, garson Hagit in vin lerwa, san ki nou senyer David i konnen?

¹² Mon ava donn ou en konsey pour ki ou sov ou lavi ek lavi ou garson Salomon.

¹³ Al kot lerwa David e dir li: Mon senyer lerwa! Pa ou ti fer sa promes avek mwan? Ou ti dir: Salomon ou garson pou vin lerwa apre mwan e li menm ki pou pran mon tronn. Alor, akoz Adoniya ki'n vin lerwa?

¹⁴ Letan ki ou pe koz avek lerwa, mon pou antre e konfirm sa ki ou'n dir.”

¹⁵ Batseba ti al kot lerwa dan son lasanm. Lerwa ti byen vye e Abisag, sa fiy Sounamit, ti la, pe servi lerwa.

¹⁶ Batseba ti bese e prosternen devan lerwa, ki ti demann li, “Ki ou oule mon fer pour ou?”

¹⁷ I ti dir, “Mon senyer lerwa! Ou ti promet devan SENYER ou Bondye, ki mon garson Salomon pou vin lerwa apre ou e ki i pou pran ou plas lo tronn.

¹⁸ Me Mazeste! La Adoniya in vin lerwa san menm ki ou konnen.

¹⁹ I'n fer en lafet pour ofer en kantite bef, zannimo gra, mouton an sakrifis, e i'n envit tou ou bann garson, avek pret Abiatar, komandan larme Zoab; me Salomon ou garson pa'n ganny envite.

²⁰ Aprezan, mon senyer lerwa, pep Izrael antye pe esper avek enpasyans pour ou anonse piblikman lekel ki pou pran ou plas lo tronn, apre ou.

²¹ Sinon, de ki mon senyer lerwa pou mor, mon garson Salomon ek mwan menm, nou pou ganny trete koman bann koupab.”

²² I ti ankor pe koze avek lerwa, kan profet Natan ti arive.

²³ Zot ti anons lerwa, “Profet Natan i la.” Natan ti antre e prosternen devan lerwa.

²⁴ I ti dir, “Mon senyer lerwa, eski se ou ki'n dir ki Adoniya pou vin lerwa e pran ou plas lo tronn?

²⁵ I'n desann ozordi e i'n ofer sakrifis en kantite bef, zannimo gra, ek bann mouton. I'n envit tou ou bann garson, bann sef larme, ek pret Abiatar. Zot pe manze, bwar avek li e zot pe kriye: Viv lerwa Adoniya!

²⁶ Me i pa'n envit mwan, ou serviter, ni pret Sadok, ni Benaya, garson Yoyada, ni Salomon, ou serviter.

²⁷ Eski i posib mon senyer lerwa, ki se ou, ki'n pran sa desizyon? Akoz ou pa'n les mwan ou serviter, konnen lekel ki pou pran ou plas lo tronn?”

David I Swazir Salomon koman Son Sikseser

²⁸ Alor, lerwa David ti dir, “Apel Batseba!” Batseba ti vin prezant li devan lerwa.

²⁹ Alor, lerwa ti fer sa serman: Lo lavi SENYER ki'n delivre mwan dan tou maler,

³⁰ mon'n deza fer sa serman devan SENYER, Bondye pep Izrael. Mon ti dir: Ou garson Salomon pou vin lerwa apre mwan. Se li menm ki pou pran mon plas lo tronn. Ozordi, mon gard mon promes.

³¹ Alor Batseba ti prosternen devan lerwa. I ti dir, “Viv lerwa David pour touzour!”

³² Lerwa David ti dir, “Apel pret Sadok, profet Natan ek Benaya, garson Yoyada.” Zot ti vin prezant zot devan lerwa.

³³ Lerwa ti donn sa lord, “Rasanble mon bann serviter, fer mon garson Salomon mont lo mon bourik e fer li desann ziska Giyonn.

³⁴ La, pret Sadok ek profet Natan ava donn li lonksyon pour li vin lerwa pep Izrael. Zot ava soufle tronpet e kriye: Viv lerwa Salomon!

³⁵ Zot ava remonte deryer li e Salomon ava vin asiz lo mon tronn e i ava vin lerwa dan mon plas, akoz mon'n swazir li koman sef lo pep Izrael e lo Zida.”

³⁶ Benaya, garson Yoyada ti reponn, “Wi! Nou pou fer li. Sanmenm ki SENYER Bondye i deklare.

³⁷ SENYER pou avek Salomon parey i'n avek mon senyer lerwa; i pou fer son renny vin pli gran ki pour ou, mon senyer lerwa.”

Salomon I Ganny Konsakre Lerwa

³⁸ Alor, pret Sadok, profet Natan ek Benaya, garson Yoyada, avek bann Keretit ek bann Peletit, ki ti bann gard lerwa, ti ed Salomon mont lo bourik lerwa David e anmenn li Giyonn.

³⁹ Pret Sadok ti pran fyol delwil sakre dan latant e vid lo latet Salomon pour konsakre li lerwa. Zot ti soufle tronpet e tou dimoun ti kriye: Viv lerwa Salomon.

⁴⁰ Tou dimoun ti swiv deryer li; zot ti zwe laflit e selebre. Dan lazwa, zot ti fer later tranble avek tapaz.

⁴¹ Ler zot ti'n fini manze, Adoniya ek tou son bann envite ti antann tapaz. Zoab ti rekonnet son tronpet. I ti demande, “Ki sa tapaz dan lavil?”

⁴² Apenn i ti'n fini poz sa kestyon, Zonatan garson pret Abiatar ti arive. Adoniya ti dir li, “Antre! Ou en zonm enportan, e sertennman ou anmenn bon nouvel.”

⁴³ Zonatan ti dir Adoniya, “Non! Lerwa David in swazir Salomon pour ranplas li koman lerwa.

⁴⁴ David in anvoy pret Sadok, profet Natan ek Benaya ansanm avek bann Keretit ek bann Peletit, bann gard lerwa, pour fer li mont bourik lerwa.

⁴⁵ Pret Sadok ek profet Natan in konsakre li koman lerwa pre avek sours Giyonn. Zot in remonte sorti laba avek selebrasyon; lavil i dan leksitasyon. Sanmenm sa tapaz ki ou tande.

⁴⁶ Salomon in fini asiz lo tronn rwayal.

⁴⁷ Menm bann serviter lerwa in vin felisit lerwa David. Zot dir: Nou espere ki ou Bondye i fer renonmen Salomon vin pli gran ki pour ou, e son renny ava vin pli gran ki pour ou. Alor, lerwa ti prosternen lo son lili

⁴⁸ I ti dir: Mon rann glwar SENYER, Bondye pep Izrael ki'n permet mwan ozordi, war enn mon zanfan asiz lo mon tronn.”

⁴⁹ Tou bann envite Adoniya ti per; zot ti leve e zot ti al sakenn son kote.

⁵⁰ Adoniya li, i ti telman per Salomon ki i ti leve e al may bann korn lotel.

⁵¹ En dimoun ti al dir Salomon, “Adoniya i telman per ou, ki i'n may bann korn lotel. I dir: Fodre ki lerwa Salomon i promet avan, ki i pa pou touy mwan, son serviter.”

⁵² Salomon ti reponn, “Si i montre ki i en dimoun onnet, en sel bren seve lo son latet pa pou tonbe; me si i annan mesanste dan li, i pou mor.”

⁵³ Lerwa Salomon ti anvoy sers li kot lotel. I ti prostern devan lerwa Salomon ki ti dir li, “Retourn kot ou.”