1 Pyer 3 - Labib An Kreol Seselwa

Devwar Mari ek Fanm

¹ Zot bann fanm, zot devre aksepte lotorite zot mari. Konmsa, si i annan ki refize krwar dan Parol Bondye, zot ava kanmenm kapab aksepte lafwa, gras a zot kondwit.

² Zot ava war ki zot kondwir zot dan en fason ki pir e respektab.

³ Pa rod fason fer zot zoli par bann mwayen eksteryer, dan mannyer zot penny zot seve, avek bizou annor, zoli lenz ki kout ser.

⁴ Me zot labote i devret en labote enteryer, dan leker, kot i pa kapab disparet. Labote en lespri bon e trankil ki annan en gran valer devan Bondye.

⁵ Konmsa menm ki bann fanm ki servi Bondye ti fer otrefwa. Zot ti met zot lespwar dan Bondye e soumet zot avek zot mari.

⁶ Konmsa menm ki Sara ti obei Abrahanm e apel li son senyer. Zot vreman son bann fiy, si zot fer sa ki byen, san les personn fer zot per.

⁷ Zot osi bann mari! Dan lakour, viv dan larmoni sakenn avek son fanm. Tenir kont zot natir ki pli frazil. Tret zot avek respe, akoz zot osi, zot pou resevwar ansanm avek zot, sa kado vre lavi ki sorti kot Bondye. Si zot azir konmsa, zot lapriyer pa pou rankontre okenn lobstak.

Soufer an Fezan Dibyen

⁸ Anfen, zot tou, zot devre annan menm panse ek menm santiman. Kontan kanmarad koman frer; annan konpasyon pour kanmarad e viv dan limilite.

⁹ Pa rann lemal pour lemal, ni lensilt pour lensilt. Okontrer, reponn par loue Senyer, akoz pour sanmenm sa, ki Bondye in apel zot, pour resevwar son benediksyon.

¹⁰ Annefe, la sa ki Lekritir i deklare: Sa enn ki oule viv en lavi agreab e war bann zour ere, i devre prezerv son lalang kont lemal e son lalev i devre aret koz manti.

¹¹ I devre aret fer sa ki mal, e pratik sa ki byen. I devre rod lape e fer lape.

¹² Annefe, lizye Senyer i fikse lo bann zis. Son zorey i ouver pour ekout zot lapriyer. Me vizaz Senyer i tourn kont bann ki fer sa ki mal.

Konfyans dan Persekisyon

¹³ Dir mwan aprezan: Lekel ki pou fer zot dimal si zot annan gran dezir pour fer sa ki byen?

¹⁴ Kan zot ava soufer pour lazistis, zot pou ere. Pa bezwen per personn, zot napa nanryen pour trakase.

¹⁵ Me dan zot leker, rann glwar Kris koman zot Senyer. Zot devre touzour pare pour reponn bann ki demann zot leksplikasyon konsernan lesperans ki dan zot.

¹⁶ Me fer li avek bonte, respe e avek en bon konsyans. Konmsa, lo sa pwen ki zot ganny akize, sa bann ki dir dimal lo zot bon mannyer viv dan Kris, ava onte.

¹⁷ Vomye soufer an fezan dibyen, si sa i lavolonte Bondye, plito ki fer sa ki mal.

¹⁸ Annefe, Kris in osi mor pour nou pese en fwa pour tou. Li, sa enn ki ti inosan, i'n mor pour bann ki ti koupab, pour anmenn nou tou kot Bondye. Zot ti touy li dan son lekor fizik, me i ti revin vivan par Lespri Sen.

¹⁹ Par pwisans sa menm Lespri, i ti osi al pres avek bann lespri ki ti dan prizon,

²⁰ savedir avek bann ki ti'n dezobei Bondye otrefwa. Bondye ti esper avek pasyans pandan ki Noe ti pe konstri son bato, dan lekel en pti group dimoun, wit an tou, ti ganny sove atraver delo.

²¹ Sa ti reprezant batenm, ki pa pirifye lekor, me ki en larepons ki nou fer Bondye avek en konsyans pir. I sov zot gras a rezireksyon Zezi-Kri

²² ki'n mont dan lesyel. I'n asiz dan kote drwat Bondye, kot bann lanz ek tou lotorite ek pwisans dan lesyel in ganny soumet avek li.