1 Pyer 2 - Labib An Kreol Seselwa

Zezi, Ros Vivan

¹ Alor, rezet, tou kalite mesanste, frod, lipokrizi, zalouzi ek medizans.

² Parey bann zanfan nouvo ne, kontan dile pir Parol Bondye. Konmsa zot ava grandi e ganny sove.

³ Annefe, zot in goute koman Senyer i bon.

⁴ Apros zot avek li, sa ros vivan ki zonm in rezete, me ki Bondye in swazir e ki presye pour li.

⁵ Zot osi, koman bann ros vivan, ansanm vin konstri sa Tanp kot Lespri i reste. Zot ava form en kominote bann pret sen ki ava ofer sakrifis spirityel, akseptab devan Bondye par Zezi-Kri.

⁶ Annefe, Lekritir i deklare: La mon poz dan Siyon en ros. En ros kwen presye ki'n ganny byen swazir. Sa enn ki krwar dan li pa pou dezapwente.

⁷ Alor, pour zot ki krwar, sa ros i annan en gran valer, me pour bann ki pa krwar, Sa ros ki bann konstrikter ti'n rezete, in vin ros kwen prensipal.

⁸ Lekritir i osi deklare: Sa i en ros kot dimoun pou ganny konnyen, en ros ki pou fer dimoun tonbe. Zot in tonbe akoz zot pa'n krwar dan Lekritir; sa ti zot desten.

⁹ Me zot, zot en ras ki'n ganny swazir, en group pret rwayal, en nasyon sen, en pep ki pour Bondye. I'n swazir zot. In fer zot sorti dan fernwanr pour pas dan son lalimyer merveye, pour proklanm son bann mervey.

¹⁰ Otrefwa, zot pa ti son pep. Me aprezan zot in vin pep Bondye. Otrefwa, zot pa ti konn konpasyon Bondye. Me aprezan zot in ganny mizerikord.

Serviter Bondye

¹¹ Mon bann zanmi! Mon demann zot ki bann etranze e bann vwayazer: Gard zot kont bann dezir natir imen ki fer lager kont zot menm.

¹² Kondwir zot byen parmi bann nasyon. Konmsa, menm si sa bann dimoun i dir dimal lo zot e tret zot koman bann malfeter, zot bann bon aksyon ava ganny rekonnet e zot ava rann glwar Bondye zour son zizman.

¹³ Akoz Senyer, obei tou lotorite imen: Lerwa an tan ki souvren;

¹⁴ bann gouverner ki'n ganny anvoye par lerwa, pour pini bann malfeter e pour felisit bann ki fer sa ki byen.

¹⁵ Annefe, sa ki Bondye i oule, se ki par zot bann bon aksyon, zot ferm labous bann ki stipid ek bann ki bet.

¹⁶ Konport zot koman bann vre zonm lib. Pa itiliz zot liberte koman en tapi pour kouver sa ki mal, me azir koman bann serviter Bondye.

¹⁷ Annan respe pour tou dimoun. Kontan zot bann frer dan lafwa. Ador Bondye e annan respe pour lerwa.

Legzanp Soufrans Kris

¹⁸ Serviter! Obei zot met avek en gran respe; pa zis anver bann ki annan en bon karakter, me osi anver bann ki difisil.

¹⁹ Annefe, i en bon keksoz si en dimoun i siport bann soufrans ki i andire enzisteman pour lanmour Bondye.

²⁰ Annefe, ki benefis en dimoun i gannyen, si i bezwen siport move tretman pour fot ki i'n fer? Me si ou soufer avek pasyans pour sa ki ou'n byen fer, sa i ganny aprouve par Bondye.

²¹ Pour sa rezon ki Bondye in apel zot, akoz Kris li menm in soufer pour zot; i'n les zot en legzanp pour zot swiv.

²² Kris pa'n zanmen fer okenn pese, e zanmen okenn mansonz in sorti dan son labous.

²³ Kan zot ti ensilte li, i pa ti reponn par lensilt. Dan son soufrans, i pa'n fer okenn menas; me i ti met tou dan lanmen Bondye ki rann lazistis.

²⁴ Kris li menm in anmenn nou pese dan son lekor lo lakrwa, pour ki nou mor pour sa ki konsern pese e viv pour lazistis. Par son bann blesir, zot in ganny geri.

²⁵ Annefe, zot ti koman bann mouton perdi; me aprezan, zot in retourn kot sa berze ki vey lo zot.