1 Korentyen 8 - Labib An Kreol Seselwa

Lavyann ki'n Ganny Ofer avek Zidol

¹ Lo size lavyann ki'n ganny ofer avek zidol, i vre ki parey zot dir, nou tou, nou annan konnesans. Me sa konnesans i fer nou vin vantar, tandis ki lanmour i konstri lakominote.

² Sa enn ki pretann i konn keksoz, an realite i pa ankor konnen parey i devre.

³ Me sa enn ki kontan Bondye, Bondye i konn li.

⁴ Alor, pour sa ki konsern konsonmasyon lavyann ki'n ofer avek zidol, nou konnen ki zidol pa nanryen an realite. Nou konnen osi, ki i annan en sel vre Bondye.

⁵ Menm si i annan en kantite swadizan bondye, swa dan lesyel oubyen lo later (annefe, i annan bokou bondye e bokou senyer),

⁶ pour nou, i annan en sel Bondye, Papa, kot tou keksoz i sorti, e pour ki nou egziste. I osi annan en sel Senyer, Zezi-Kri, par ki tou keksoz i egziste e par ki nou egziste.

⁷ Sepandan, pa tou dimoun ki annan sa konnesans. Annefe, serten dimoun i telman abitye avek bann zidol, ki zot manz lavyann konmsi sa lavyann in vreman ganny ofer avek en zidol. Zot konsyans i feb e zot santi ki zot in vin enpir.

⁸ Me pa manze ki fer nou vin pli pros avek Bondye: Si nou pa manze, nou pa pou perdi nanryen, e si nou manze nou pa pou pli avanse.

⁹ Me fer atansyon ki ou drwa pa fer enn ki pli feb tonbe.

¹⁰ Annefe, si en dimoun i war ou ki annan konnesans, pe manz dan en tanp zidol, eski sa pa i ankouraz sa enn avek en konsyans feb, pour manz lavyann ki'n ganny ofer avek zidol?

¹¹ Alor, par ou konnesans, sa zonm feb, sa frer pour ki Kris in mor i ganny detri.

¹² Par en tel aksyon, ou fer pese kont ou bann frer, ou bles zot konsyans ki feb, e ou fer pese kont Kris li menm.

¹³ Alor, si sa ki mon manze i fer mon frer tonm dan pese, mon pa pou zanmen manz lavyann ankor, pour mwan pa fer mon frer tonbe.