1 Korentyen 7 - Labib An Kreol Seselwa

Kestyon Konsernan Maryaz

¹ Aprezan, konsernan bann size ki zot ti ekri mwan: I bon pour en zonm evite annan fanm.

² Sepandan, pour evit limoralite seksyel, sak zonm devre annan son prop fanm, e sak fanm devre annan son prop mari.

³ En mari devre ranpli son devwar koman mari anver son fanm. Demenm, en fanm devre fer parey anver son mari.

⁴ En fanm napa drwa fer sa ki i oule avek son lekor: I pour son mari. Demenm, en mari napa drwa fer sa ki i oule avek son prop lekor: I pour son fanm.

⁵ Pa bezwen refiz kanmarad; amwen ki zot tonm dakor pandan en serten letan, pour lapriyer. Apre, retourn ansanm, pour ki Satan pa profite pour tant zot e fer zot perdi kontrol.

⁶ Mon pe dir zot sa koman en konsey, pa en lord.

⁷ An realite, mon ti ava kontan si tou ti parey mwan. Me Bondye in donn sakenn son don partikilye, enn dan en fason, en lot dan en lot fason.

⁸ Mon dir avek bann selibater ek bann vev: I bon si zot ti reste tousel parey mwan.

⁹ Me si zot pa kapab kontrol zot lekor, zot devre marye, akoz i preferab ki zot marye plito ki zot brile avek zot bann pasyon.

¹⁰ Avek bann ki'n marye, mon donn sa lord. Sa pa mwan ki dir, me Senyer: En fanm pa devre separe avek son mari.

¹¹ Si i fer li, i devre reste tousel oubyen retourn avek son mari; e en mari pa devre divors son fanm.

¹² Avek lezot, la sa ki mon dir. Sa, mwan menm ki dir, pa Senyer: Si en frer i annan en fanm ki pa krwayan e ki dakor kontinyen viv avek li, i pa devre divors li.

¹³ Demenm pour en fanm: Si i annan en mari ki pa krwayan e ki dakor kontinyen viv avek li, i pa devre divors li.

¹⁴ Annefe, sa mari non-krwayan i pros avek Bondye atraver son fanm. Demenm, sa fanm non-krwayan i pros avek Bondye atraver son mari krwayan. Si pa ti konmsa, zot zanfan ti ava ganny konsidere koman enpir, tandis ki an realite zot pros avek Bondye.

¹⁵ Me si sa non-krwayan i oule separe, les li. Dan en tel ka, sa mari oubyen sa fanm krwayan i lib, akoz Bondye in apel zot pour viv dan lape.

¹⁶ Annefe, ou fanm kretyen! Eski ou konnen si ou pou arive sov ou mari? Ou mari kretyen! Eski ou konnen si ou pou arive sov ou fanm?

Viv Parey Bondye I Demande

¹⁷ Selman, mon demande ki sakenn i kontinyen viv dapre kondisyon ki Senyer in donn li, kot i ti ete, kan Bondye ti apel li. Sanmenm sa regleman ki mon'n donnen dan tou bann Legliz.

¹⁸ Si en zonm ti sirkonsi kan Bondye ti apel li, i devre reste sirkonsi. Si en zonm pa ti sirkonsi kan Bondye ti apel li, i pa neseser ki i ganny sirkonsi.

¹⁹ Annefe, sirkonsi, pa sirkonsi, napa okenn lenportans. Sa ki konte se lobeisans komannman Bondye.

²⁰ Sakenn i devre reste dan kondisyon ki i ti ete kan Bondye ti apel li.

²¹ Eski ou ti en lesklav kan Bondye ti apel ou? Pa fer nanryen. Me si ou kapab vin lib, profit ou sans.

²² Enn ki'n ganny apele pour Senyer koman en lesklav, i vin en zonm lib pour Senyer, e en zonm ki lib kan i ganny apele, i vin lesklav Kris.

²³ Zot in ganny aste pour en gran pri. Pa les zot vin lesklav zonm.

²⁴ Mon bann frer ek ser! Reste dan menm leta ki zot ti ete devan Bondye kan zot ti ganny apele.

Konsernan Selibater ek Vev

²⁵ Konsernan bann ki pa'n marye, Senyer pa'n donn mwan okenn lord, me mon donn mon lopinyon koman en zonm ki, par lagras Senyer, zot kapab fer konfyans.

²⁶ Akoz bann problenm aktyel, la sa ki mon mazinen: Mon krwar i bon pour en zonm reste parey i ete.

²⁷ Si ou annan en fanm, pa rod divorse. Si ou napa fanm, pa rod maryaz.

²⁸ Me si ou'n marye, i pa en pese; si en zenn fiy i marye, sa pa en pese. Me sa enn ki marye, i pou ganny problenm dan son lavi; mon oule eparny li sa traka.

²⁹ Mon bann frer ek ser! La sa ki mon oule dir zot: Letan i kourt; aprezan, fodre ki bann zonm ki annan fanm, zot viv konmsi zot napa.

³⁰ Bann ki an dey, fer konmsi zot pa an dey; bann ki pe rezoui, fer konmsi zot pa dan lazwa; bann ki pe aste, fer konmsi zot napa nanryen,

³¹ e bann ki pe profite dan lemonn, fer konmsi zot pa ganny okenn profi, akoz lemonn tel ki i ete, pa pou dir lontan.

³² Mon oule ki zot san traka. En zonm ki pa marye, i preokip li avek travay Senyer, akoz i oule fer plezir Senyer.

³³ Me en zonm ki'n marye, i preokip li avek bann zafer lemonn. I demande ki mannyer i pou fer plezir son fanm.

³⁴ Son lentere i ganny partaze. Pareyman en fanm san mari oubyen en zenn fiy, i preokip li avek zafer Senyer, pour konsakre son lekor ek son lespri. Me en fanm marye i preokip li avek bann zafer lemonn; i rod fer plezir son mari.

³⁵ Mon pe dir zot sa pour zot prop byen; non pa pour met restriksyon lo zot, me pour ed zot fer tou keksoz byen, e fer tou pour ki zot atas zot avek Senyer san rezerv.

³⁶ Si en zennonm i krwar ki i pe fer ditor son fiyanse si i pa marye avek li; si son dezir i tro for, e i krwar ki zot devret marye, alor, zot devre marye parey i oule. I pa komet okenn pese.

³⁷ Me sa zennonm, san ki i ganny forse, si i kapab domin son lavolonte e desid dan li menm pour pa ganny okenn relasyon seksyel avek son fiyanse ki i'n determinen garde, i fer byen.

³⁸ Alor, sa enn ki marye avek son fiyanse i fer byen, me sa enn ki pa marye, i fer pli byen.

³⁹ En fanm marye i atase avek son mari tan ki son mari i vivan. Me si son mari in mor, i lib pour marye avek sa enn ki fer li plezir, me a kondisyon ki i en maryaz kretyen.

⁴⁰ Sepandan, mon krwar ki i ava pli ere si i reste dan leta ki i ete. Sa i mon lopinyon e mon krwar ki mwan osi, mon posed Lespri Bondye.