1 Korentyen 6 - Labib An Kreol Seselwa

Pa Met Ou Frer Ankour

¹ Kan enn parmi zot i annan problenm avek en frer, konman i oze al rod lazistis devan bann non-Zwif, olye demann avek bann manm dan kominote?

² Eski ou pa konnen ki pep Bondye ki pou ziz lemonn? Si lemonn pou ganny zize par zot, eski zot pa kapab ziz bann zafer mwen enportan?

³ Eski ou pa konnen ki nou pou ziz bann lanz? A pli fort rezon pour nou ziz bann zafer dan sa lavi!

⁴ Alor, koman i fer ki kan zot annan problenm parey, zot al devan ziz ki napa nanryen pour fer dan Legliz?

⁵ Mon dir sa pour zot prop laont. Eski napa parmi zot omwen en zonm ase saz ki kapab regle dispit ant frer?

⁶ Me en frer i al devan lakour kont enn son frer, e sa, devan en ziz non-krwayan!

⁷ An tou ka, i deza en defet pour zot, pour akiz kanmarad devan lakour. Akoz zot pa plito siport en lenzistis? Akoz zot pa plito les zot ganny vole?

⁸ O kontrer, zot ki pratik lenzistis e ki vole; zot fer li, menm anver zot prop frer!

⁹ Eski zot pa konnen ki bann malfeter pa pou erit Rwayonm Bondye? Pa les zot ganny tronpe: Dimoun san moralite, adorater zidol, adilter, omoseksyel,

¹⁰ voler, dimoun anvye, soular, dimoun ki kalonmnye, dimoun ki akapar sa ki pour son prosen, pa pou erit Rwayonm Bondye.

¹¹ Konmsa ki serten parmi zot ti ete. Me zot in ganny lave, pirifye, zistifye devan Bondye, lo non Senyer Zezi-Kri e par Lespri nou Bondye.

Servi Zot Lekor pour Loue Bondye

¹² Zot dir: Mon kapab fer tou. Wi! Me pa tou ki bon pour ou. Mon kapab fer tou, me mon pa pou les nenport kwa pran kontrol lo mwan.

¹³ Zot dir: Manze i pour vant e vant i pour manze. Dakor! Me Bondye pou detri tou le de. Nou lekor pa'n fer pour bann pratik imoral, me pour Senyer, e Senyer i pour lekor.

¹⁴ Bondye in resisit Senyer, e i pou resisit nou osi par son pwisans.

¹⁵ Zot konnen ki zot lekor i form parti lekor Kris. Alor, eski mon ava pran en manm lekor Kris, pour fer li vin manm lekor en prostitye? Zanmen!

¹⁶ Eski zot pa konnen ki sa enn ki al avek en prostitye i vin en sel lekor avek li? Annefe, i'n ganny ekri: Tou le de pou vin en sel laser.

¹⁷ Me sa enn ki ini li avek Senyer i vin enn, spirityelman avek li.

¹⁸ Elwanny zot avek bann pratik imoral. Tou lezot pese ki en dimoun i fer i an deor son lekor, me en dimoun ki livre li dan limoralite i fer pese kont son prop lekor.

¹⁹ Eski zot pa konnen ki zot lekor i Tanp Lespri Sen, sa Lespri ki dan zot, e ki Bondye in donn zot? Zot pa pour zot menm,

²⁰ akoz Bondye in pey en gran pri pour li aste zot. Alor, servi zot lekor pour loue Bondye.