1 Korentyen 5 - Labib An Kreol Seselwa

Limoralite dan Legliz

¹ Dimoun i dir ki i annan parmi zot limoralite seksyel, tel ki ou pa trouve menm parmi bann non-Zwif. I menm annan enn parmi zot ki pe viv avek fanm son papa.

² E dir ki zot fer vantar! O kontrer, zot ti devre sagren, e sa zonm ki pe viv konmsa, i devre ganny sase parmi zot.

³ Menm si mwan, mon absan fizikman, mon prezan parmi zot annespri. Lo non Senyer Zezi, e konmsi mon ti prezan parmi zot, mon'n fini pas zizman lo sa dimoun ki pe fer sa.

⁴ Kan zot ava rasanble, mwan osi, mon pou prezan parmi zot annespri, e pwisans nou Senyer Zezi ava manifeste.

⁵ Alor, zot ava livre sa zonm avek Satan pour ki son lekor i ganny detri. Me ki son lespri i ganny sove zour Senyer.

⁶ Zot napa okenn rezon pour zot fer vantar. Zot pa konnen ki en pti pe lelven i fer monte lapat antye?

⁷ Pirifye zot alor: Fer disparet sa vye lelven, pour ki zot vin en nouvo lapat san lelven. Anfet, zot deza sa nouvo lapat, depi ki Kris, nou Zenn Mouton Pak in ganny sakrifye.

⁸ Alor, annou selebre nou lafet non pa avek sa vye lelven, sa lelven pese limoralite, me avek dipen san lelven, dipen lapirte ek laverite.

⁹ Dan mon dernyen let, mon ti demann zot pour pa asosye zot avek dimoun ki viv dan limoralite seksyel.

¹⁰ Mon pa pe dir sa pour tou dimoun ki pratik bann akt imoral dan sa lemonn, ni avek bann ki anvye, voler oubyen ki ador zidol. Sinon, zot ti ava bezwen kit sa lemonn.

¹¹ Non, mon ti oule dir zot ki zot pa devre asosye zot avek okenn dimoun, menm si i apel li kretyen, me ki pe viv en lavi imoral, ki anvye, ki ador zidol, ki kalonmnye son prosen, ki soular oubyen voler. Zot pa devre ni menm manz avek en tel dimoun.

¹² I pa mon konsern ziz bann non-kretyen. Bondye ava ziz zot. Me pa zot ki devre ziz manm zot kominote?

¹³ Annefe, Lekritir i deklare: Sas parmi zot, bann ki komet lemal.