1 Korentyen 3 - Labib An Kreol Seselwa

Rol bann Serviter Bondye

¹ Mon bann frer ek ser! Mon pa'n kapab koz avek zot koman bann dimoun ki annan Lespri Bondye, me koman bann zonm avek natir imen, koman bann zanfan dan Kris.

² Mon'n nouri zot avek dile, pa avek nouritir solid, akoz zot pa ti pou kapab siporte. Menm aprezan, zot pa ti pou kapab siporte,

³ akoz zot ankor annan natir imen. Annefe, si i ankor annan zalouzi ek kerel parmi zot, sa pa i montre ki zot ankor annan natir imen? Zot pe konport zot dan fason imen.

⁴ Kan enn parmi zot i dir: Mwan, mon pour Pol, e en lot: Mwan mon pour Apolos. Pa i pe azir koman nenport ki et imen?

⁵ Apre tou, ki Apolos i ete? Ki Pol i ete? Bann senp serviter, gras a ki, zot in arive krwar, letan nou pe akonpli travay ki nou Senyer in donn sakenn nou.

⁶ Mwan mon'n plante, Apolos in aroze, me Bondye ki fer pouse.

⁷ Alor, pa sa enn ki plante, oubyen sa enn ki aroze ki enportan; me Bondye ki fer pouse.

⁸ Sa enn ki plante ek sa enn ki aroze, zot egal; sakenn pou ganny son saler dapre son travay.

⁹ Annefe, nou, nou bann kolaborater Bondye. Zot, zot son plantasyon. Zot osi son konstriksyon.

¹⁰ Dapre don ki Bondye in donn mwan, mon'n poz en fondasyon parey en bon arsitek; me en lot pe konstri lo la. Sepandan, sakenn i devre fer atansyon ki mannyer i konstri.

¹¹ Annefe, personn pa kapab poz en lot fondasyon ki sa enn ki'n ganny poze par Zezi-Kri li menm.

¹² Annefe, si zot konstri lo sa fondasyon avek lor, larzan, pyer presyez, dibwa, zerb sek oubyen lapay,

¹³ travay sak zonm pou ganny revele zour zizman e son vre valer ava ganny rekonnet. Sa zour, dife pou teste travay sak dimoun; dife pou montre valer travay sak zonm.

¹⁴ Si travay ki sak dimoun in fer lo sa fondasyon i reziste dife, i pou ganny en rekonpans.

¹⁵ Par kont, si son travay i ganny brile, i ava en pert pour li; me li menm i pou ganny sove konmsi in pas atraver laflanm dife.

¹⁶ Pa zot konnen ki zot tanp Bondye e ki Lespri Bondye i reste dan zot?

¹⁷ Si en dimoun i detri tanp Bondye, Bondye pou detri li. Annefe, tanp Bondye i sen, e zot ki sa tanp.

¹⁸ Fodre pa ki personn i anbet son lekor: Si enn parmi zot i krwar ki i malen dapre sa lemonn, fodre ki i vin fou pour li ganny lasazes,

¹⁹ akoz lasazes dapre lemonn i en lafoli devan Bondye. Annefe, Lekritir in deklare: Bann saz i ganny atrape dan zot prop trik.

²⁰ E ankor: Senyer i konnen: Sa ki bann saz i mazinen napa okenn valer.

²¹ Alor, personn pa devre fer vantar dapre sa ki zonm i fer, akoz tou i pour zot:

²² Pol, Apolos, Pyer, lemonn, lavi, lanmor, ozordi, demen, tou i pour zot.

²³ Me zot, zot pour Kris, e Kris i pour Bondye.