1 Korentyen 16 - Labib An Kreol Seselwa

Kontribisyon pour bann Krwayan Zerizalenm

¹ Konsernan kontribisyon an faver bann krwayan ki Zerizalenm, zot osi, zot devre fer parey mon'n ordonn bann Legliz dan Galasi.

² Premye zour sak semenn, sakenn ava met dekote se li, larzan ki i'n reisi eparnyen. Konmsa, zot pa pou bezwen esper mwan arive pour anmas bann kontribisyon.

³ Kan mon ava arive, mon ava anvoy bann dimoun ki zot ava'n swazir avek bann let pour anmenn zot don Zerizalenm.

⁴ Si i vo lapenn ki mwan osi mon ale, zot ava vwayaz avek mwan.

Bann Proze Vwayaz

⁵ Mon pou vin kot zot apre ki mon'n pas Masedwann. Annefe, mon pou bezwen pas par Masedwann.

⁶ Mon pou reste en pe letan kot zot; petet mon ava menm pas liver antye. Alor, zot ava kapab fourni sa ki mon pou bezwen pour mwan kapab al kot mon devre ale.

⁷ Mon pa oule zis war zot an pasan, me si Senyer i permet mwan, mon ti ava kontan reste en bon pe letan avek zot.

⁸ An tou ka, mon annan lide reste isi Efez ziska Lapannkot.

⁹ Annefe, en gran laport in ouver pour mwan fer en gran travay, me i annan bokou lennmi.

¹⁰ Si Timote i vini, met li alez, akoz i travay parey mwan pour nou Senyer.

¹¹ Fodre pa ki personn i mepriz li. Ed li pour kontiny son vwayaz anpe, pour li retourn kot mwan, akoz mon pe esper li, ansanm avek lezot frer.

¹² Kanta nou frer Apolos, mon'n souvan ankouraz li pour vin kot zot avek lezot frer. Me i pa oule vin aprezan. I ava vini, kan i ava ganny letan.

Dernyen Rekomandasyon

¹³ Veye! Reste ferm dan lafwa. Pran kouraz e fortifye zot!

¹⁴ Fer tou keksoz avek lanmour.

¹⁵ Zot konnen ki lafanmir Stefanas i bann premye krwayan dan Lagres; zot in byen devoue zot dan servis lakominote.

¹⁶ Alor, obei bann tel dimoun; obei tou bann ki kolabor dan sa travay.

¹⁷ Mon byen kontan ki Stefanas, Fortinatis ek Akaikis in arive. Zot in ed mwan kan zot pa ti la.

¹⁸ Annefe, zot in trankiliz mon lespri. Alor, mon demann zot, montre zot rekonesan anver bann dimoun parey.

¹⁹ Bann Legliz dan provens Lazi i fer zot salanm. Akila ek Prisil, ansanm avek Legliz ki rasanble se zot i anvoy zot konpliman dan Senyer.

²⁰ Tou lezot nou bann frer ki isi i fer zot salanm. Anbras kanmarad fraternelman.

Konpliman

²¹ Mwan Pol ki pe ekri sa let avek mon prop lanmen.

²² Si en dimoun i pa kontan Senyer, i pou ganny modi. Maranata! Nou Senyer pe retournen!

²³ Lagras Senyer Zezi ava avek zot tou!

²⁴ Mon lanmour i pour zot tou dan lakominyon avek Zezi-Kri.