1 Korentyen 12 - Labib An Kreol Seselwa

Don Lespri Sen

¹ Mon bann frer ek ser! Konsernan bann don Lespri Sen, mon pa oule ki zot reste dan linyorans.

² Zot konnen ki kan zot pa ti'n ankor konn Bondye, zot ti ganny antrennen ver bann zidol ki pa koze.

³ Pour sa rezon, mon oule ki zot konpran byen: Personn ki anba Lespri Bondye pa kapab dir: Zezi i modi, e personn pa kapab osi dir: Zezi i Senyer, si i pa ganny gide par Lespri Sen.

⁴ I annan diferan don spirityel, me en menm Lespri;

⁵ plizyer fason servi, me en menm Senyer;

⁶ plizyer sort aktivite, me menm Bondye ki prodwi tou dan zot tou.

⁷ Dan sakenn nou, Lespri i manifeste par en don ki itil pour nou tou.

⁸ En dimoun i ganny don pour koz avek lasazes par Lespri; en lot, sa menm Lespri i donn li pour koz avek konnesans.

⁹ Par sa menm Lespri, enn i ganny lafwa. En lot, par sa menm Lespri, i ganny don geri bann malad.

¹⁰ Enn i ganny don fer mirak, en lot i ganny don pour koz lo non Bondye. En lot ankor i ganny don pour disernen ant bon ek move lespri. Enn i ganny don pour koz dan diferan lalang, en lot pour enterpret bann lalang.

¹¹ Tousala i ganny prodwi par en sel e menm Lespri ki donn sakenn nou en don diferan, mannyer ki i oule.

¹² Annefe, lekor i enn; pourtan i annan plizyer manm. Me tou sa bann kantite manm, i form en sel lekor. Sa i parey avek Kris.

¹³ Nou tou, Zwif oubyen non-Zwif, lesklav oubyen dimoun lib, nou'n ganny batize dan en sel Lespri, pour vin en sel lekor. Nou tou, nou'n bwar dan en sel Lespri.

¹⁴ Lekor pa ganny formen par en sel manm, me par plizyer.

¹⁵ Si lipye i dir: Akoz mwan mon pa lanmen, mon pa form parti lekor; sa pa pou anpes li fer parti sa lekor.

¹⁶ Si zorey i dir: Akoz mon pa lizye, mon pa form parti lekor; sa pa pou anpes li fer parti sa lekor.

¹⁷ Si lekor antye ti lizye, ki mannyer i ti pou fer pour tande? Oubyen, si i ti zis zorey, ki mannyer i ti pou fer pour santi?

¹⁸ An realite, Bondye in plas sak parti lekor, dan fason ki li i oule.

¹⁹ Si tou ti zis en sel parti, kote lekor ti pou ete?

²⁰ An realite, i annan plizyer manm, me en sel lekor.

²¹ Lizye pa kapab dir avek lanmen: Mon pa bezwen ou! Ni latet pa kapab dir avek lipye: Mon pa bezwen zot!

²² O kontrer, sa bann parti lekor ki paret pli feb, zot an realite byen neseser.

²³ Bann manm ki nou mazinen i mwen enportan dan lekor, nou donn zot plis atansyon. Parti mwen prezantab i ganny tretman pli spesyal,

²⁴ tandis ki nou parti prezantab pa bezwen en tretman spesyal. Me Bondye in organiz lekor dan en tel fason ki i donn lenportans bann parti enferyer.

²⁵ Konmsa napa divizyon dan lekor, me bann parti lekor i ganny en swen egal enn a lot.

²⁶ Si en parti lekor i soufer, tou lezot parti i soufer avek li; si en parti i ganny onore, tou lezot parti i osi rezoui avek li.

²⁷ Zot tou, zot lekor Kris e sakenn parmi zot, i fer parti sa lekor.

²⁸ Dan Legliz, Bondye in etabli premyerman bann zapot, dezyenmman bann profet, trwazyenmman bann ansennyan. Answit, i vin bann ki annan don fer mirak; apre bann ki annan don pour geri bann malad, bann ki ed lezot, bann ki dirize, e bann ki annan don pour koz diferan lalang.

²⁹ Pa tou ki zapot. Pa tou ki profet, oubyen ansennyan. Pa tou ki annan pouvwar fer mirak.

³⁰ Pa tou ki posed don geri malad. Pa tou ki koz lalang etranze. Pa tou ki enterpret bann lalang.

³¹ Alor, zot devre dezire ganny bann don pli enportan. Aprezan, mon pou montre zot semen ki bokou pli siperyer ki tou.