1 Korentyen 11 - Labib An Kreol Seselwa

¹ Swiv mon legzanp, parey mon swiv legzanp Kris.

Konsey pour bann Fanm

² Mon felisit zot akoz zot mazin mwan e zot swiv tou mon bann tradisyon parey mon'n transmet avek zot.

³ Sepandan, mon oule ki zot konpran ki Kris i sef tou zonm, ki en mari i sef son fanm e ki Bondye i sef Kris.

⁴ Donk, en zonm ki kouver son latet kan i priye oubyen kan i pe koz lo non Bondye, i dezonor Kris.

⁵ Me en fanm ki pa kouver son latet kan i pe priye, oubyen kan i pe koz lo non Bondye, i dezonor son mari. Sa i konmsi i'n raz son latet.

⁶ En fanm ki pa kouver son latet, i kapab osi koup son seve. Me akoz i fer onte pour en fanm koup son seve oubyen raz son latet, alor i devre kouver son latet.

⁷ Pour en zonm, i pa bezwen kouver son latet, akoz i reflekte limaz e laglwar Bondye. Me en fanm i laglwar en zonm.

⁸ Annefe, pa zonm ki'n ganny kree apartir en fanm; me fanm ki'n ganny kree apartir en zonm.

⁹ E pa zonm ki'n ganny kree pour fanm, me fanm ki'n ganny kree pour zonm.

¹⁰ Pour sa rezon, bann fanm i devre kouver zot latet konman en mark lotorite, akoz bann lanz.

¹¹ Sepandan, dan nou lavi avek Senyer, fanm pa endepandan avek zonm, e zonm pa endepandan avek fanm.

¹² Annefe, parey fanm in ganny tire apartir zonm, zonm i ne apartir fanm e tou i sorti kot Bondye.

¹³ Zize zot menm: Eski i byen ki en fanm i priy Bondye san kouver son latet?

¹⁴ Menm lanatir i ansenny zot ki i en laont pour en zonm annan seve long,

¹⁵ tandis ki i en loner pour en fanm annan seve long. Annefe, seve long i servi pour en fanm kouver son latet.

¹⁶ Si i annan dimoun ki oule diskit lo sa size, ni Legliz Bondye ni nou menm, nou napa sa labitid.

Koman Selebre Repa Senyer

¹⁷ Dan sa bann rekomandasyon, mon pa kapab felisit zot, akoz zot bann renyon i fer zot plis dimal ki dibyen.

¹⁸ Premyerman, mon'n tande ki dan zot lasanble, i annan divizyon parmi zot, e mon krwar an parti.

¹⁹ Fodre byen ki i annan divizyon parmi zot, pour kapab rekonnet lekel ki vreman fidel.

²⁰ Kan zot rasanble, pa repa Senyer ki zot pran.

²¹ Annefe, kan zot reini pour manze, sakenn i depese pour pran son prop nouritir, de sort ki enn i reste lafen, tandis ki en lot i sou.

²² Pa zot annan lakaz kot zot manze e bwar? Oubyen eski zot oule mepriz Legliz Bondye e imilye bann ki napa nanryen? Ki mon pou dir zot? Eski zot oule ki mon felisit zot? Non! Zot pa merite.

²³ La lansennyman ki mon'n resevwar avek nou Senyer e ki mon'n transmet avek zot: Dan lannwit ki i ti ganny livre, Senyer Zezi ti pran dipen,

²⁴ e apre ki i ti'n remersye Bondye, i ti kas sa dipen. I ti dir, “Sa i mon lekor ki mon'n donnen pour zot. Fer sa pour zot rapel mon prezans.”

²⁵ Demenm, apre repa, i ti pran lakoup. I ti dir, “Sa lakoup i nouvo lalyans par mon disan. Fer sa pour zot rapel mon prezans, sak fwa ki zot bwar li.”

²⁶ Annefe, sak fwa ki zot manz sa dipen e bwar sa lakoup, zot anons lanmor Senyer Zezi ziska ki i vini.

²⁷ Alor, sa enn ki manz dipen Senyer oubyen ki bwar son lakoup san okenn respe, i koupab anver lekor ek disan Senyer.

²⁸ Ki sakenn i egzamin son prop lekor, avan manz sa dipen e bwar sa lakoup.

²⁹ Annefe, sa enn ki manz sa dipen e bwar sa lakoup san rekonnet lekor Senyer, i pe atir kondannasyon lo son prop lekor.

³⁰ Pour sa rezon ki i annan en kantite malad e envalid parmi zot, e ki plizyer i'n mor.

³¹ Si nou konmans par egzamin nou menm, nou ava evite tonm anba zizman Bondye.

³² Me Senyer i koriz nou, i ziz nou pour ki nou pa ganny kondannen ansanm avek lemonn.

³³ Alor, mon bann frer ek ser! Kan zot rasanble pour manz ansanm, esper kanmarad.

³⁴ Si i annan parmi zot ki lafen, i devre manz se li pour ki zizman Bondye pa tonm lo zot pandan zot bann renyon. Lezot keksoz ava ganny regle kan mon ava parmi zot.