1 Korentyen 10 - Labib An Kreol Seselwa

Lavertisman kont Zidol

¹ Mon bann frer ek ser! Mon oule zot konnen sa ki ti arive avek nou bann zanset dan tan Moiz. Zot tou, zot ti anba proteksyon nyaz; zot tou, zot ti travers lanmer.

² Dan nyaz e dan lanmer, zot tou, zot i'n fer zot ganny batize pour Moiz.

³ Zot tou, zot ti manz menm nouritir spirityel;

⁴ zot tou, zot ti bwar menm labwason spirityel. Annefe, zot ti bwar sa ki ti sorti dan en ros spirityel ki ti swiv zot partou; sa ros ti Kris.

⁵ Pourtan, Bondye pa ti kontan avek laplipar zot. Alor, zot ti tonbe mor dan dezer.

⁶ Sa ki'n arive, i servi koman legzanp pour nou, pour ki nou pa ganny bann move dezir parey zot.

⁷ Pa ador zidol parey serten parmi zot ti fer. Parey Lekritir i deklare: Lepep ti asize manze, bwar. Apre, zot ti leve pour anmize.

⁸ Pa tonm dan limoralite seksyel parey serten parmi zot ti fer, de sort ki 23,000 ti mor dan en sel zour.

⁹ Pa tant Senyer, parey serten parmi zot ti fer e ti ganny detri par serpan.

¹⁰ Pa plennyen parey serten parmi zot ti fer e zot ti ganny eksterminen.

¹¹ Sa bann maler ti ariv zot, pour servi legzanp pour lezot. Zot in ganny ekri koman en lavertisman pour nou ki pe viv dan letan lafen.

¹² Alor, sa enn ki krwar i debout, fer atansyon ki i pa tonbe.

¹³ Bann tantasyon ki zot in gannyen, i ariv avek tou dimoun. Me Bondye i fidel dan son promes. I pa pou permet ki nou ganny tante plis ki nou kapab siporte. Kan tantasyon i vini, Bondye osi i donn lafors pour kapab siporte, e mwayen pour sorti.

¹⁴ Alor, mon bann zanmi! Elwanny zot avek ladorasyon bann zidol.

¹⁵ Mon pe koz avek zot koman bann dimoun rezonnab. Zize zot menm dapre sa ki mon pe dir.

¹⁶ Sa lakoup benediksyon ki nou beni, pa i en kominyon dan disan Kris? Sa dipen ki nou kase, pa i en kominyon dan lekor Kris?

¹⁷ Akoz i annan en sel dipen, menm si i annan en kantite nou, nou form en sel lekor, akoz nou partaz menm dipen.

¹⁸ Get pep Izrael: Bann ki manz sa ki'n ofer koman sakrifis, zot an konminyon avek Bondye pour ki lotel in ganny konsakre.

¹⁹ Ki mon oule dir par sa? Eski lavyann ki'n ganny ofer avek zidol i annan en serten valer? Oubyen, eski zidol ki annan valer?

²⁰ Non, sakrifis ki zot ofer, i ganny ofer avek bann demon, pa avek Bondye. Mon pa oule ki zot an kominyon avek bann demon.

²¹ Zot pa kapab bwar dan lakoup Senyer e dan lakoup demon anmenmtan. Zot pa kapab manz otour latab Senyer e otour latab demon anmenmtan.

²² Eski nou oule fer Senyer zalou? Eski nou krwar ki nou pli for ki li?

Fer Tou pour Laglwar Bondye

²³ Zot dir: Nou kapab fer tou. Dakor, me pa tou ki itil. Tou i permet, me pa tou ki konstriktif.

²⁴ Personn pa devre rod son prop lentere, me lentere son prosen.

²⁵ Zot lib pour manz tou lavyann ki vann dan bazar san poz okenn kestyon pour zot konsyans.

²⁶ Annefe, Lekritir i deklare: Later avek tou sa ki ladan, i propriyete Senyer.

²⁷ Si en non-krwayan i envit ou pour manze e ki ou dakor pour ale, manz tou sa ki i prezant ou, san poz okenn kestyon pour rezon ou konsyans.

²⁸ Me si en dimoun i dir ou: Sa lavyann ti'n ganny ofer koman sakrifis an loner bann zidol; pa manze par konsiderasyon pour sa dimoun ki'n fer ou sa remark, e pour en rezon konsyans.

²⁹ Mon pa pe koz lo ou konsyans, me lo konsyans sa lot dimoun. Me, akoz mon liberte i devre ganny limilite par konsyans en lot dimoun?

³⁰ Si mon dir mersi Senyer pour sa ki mon manze, akoz mon bezwen ganny kritike pour sa nouritir ki mon'n remersye Bondye?

³¹ Alor, kwa ki ou manze, kwa ki ou bwar, nenport kwa ki ou fer, fer tou pour laglwar Bondye.

³² Viv dan en fason ki ou pa ofans personn, ni Zwif, ni non-Zwif, ni personn dan Legliz Bondye.

³³ Fer parey mwan: Mon fer tou pour fer plezir tou dimoun dan tou sirkonstans. Mon pa pe rod mon prop lentere, me lentere en gran kantite dimoun pour ki zot ganny sove.