Zozye 8 - Labib An Kreol Seselwa

Plan pour Kaptir e Detrir Lavil Ai

¹ SENYER ti dir Zozye, “Pa per, pa dekouraze! Pran ou bann gerye, monte e atak Ai. La mon livre dan ou lanmen lerwa Ai, son pep, son lavil ek son pei.

² Ou ava tret Ai ek son lerwa parey ou ti tret Zeriko ek son lerwa. Sepandan, zot ava kapab pran bann byen ki zot ava kaptire, ensi ki bann zannimo. Prepar en latak sirpriz kont lavil, par deryer.”

³ Zozye avek tou son bann gerye, ti met li pare pour al atak Ai. I ti swazir 30,000 vayan gerye ki i ti anvoy dan lannwit,

⁴ avek sa lord: Atansyon! Zot ava prepar en latak sirpriz lo lavil, par deryer. Reste pre avek lavil; met zot tou pare.

⁵ Mwan, avek tou lepep ki akonpanny mwan, nou pou apros lavil. Kan bann zonm Ai pou sorti kont nou, nou pou taye, parey nou ti fer premye fwa.

⁶ Zot pou pourswiv nou ziska ki nou ava'n anmenn zot lwen avek lavil; akoz zot ava dir: Zot pe sove devan nou parey zot ti fer avan. Letan nou pe sove devan zot,

⁷ zot ava sorti dan zot landrwa kasyet e pran lavil, akoz SENYER, zot Bondye in livre li dan zot lanmen.

⁸ Apre ki zot ava'n pran lavil, met dife, bril li, parey SENYER ti ordonnen. Gete! Sa i en lord ki mon donn zot.

⁹ Alor, Zozye ti anvoy zot e zot ti pran pozisyon pour zot latak sirpriz. Zot ti enstal zot ant Betel ek Ai, lo kote Was avek Ai. Zozye ti pas lannwit parmi lepep.

¹⁰ Zozye ti lev granmaten, enspekte lepep e answit, i ti pas devan lepep avek bann ansyen dan Izrael, e al atak Ai.

¹¹ Tou bann gerye ki ti avek li ti monte e zot ti'n ariv anfas avek lavil. Zot ti kanp lo kote Nor avek Ai; en ranpar ti separ zot avek lavil.

¹² I ti pran anviron 5,000 zonm e i ti fer zot kasyet ant Betel ek Ai, Was avek lavil.

¹³ Lepep ti'n etabli son kan lo kote Nor avek lavil, e son aryergard ti lo kote Was. Zozye ti pas sa lannwit dan vale.

¹⁴ Kan lerwa Ai ti war sa, li avek tou son pep, bann zonm dan lavil ti leve deswit pour al dan landrwa kot zot ti'n met dakor, pour al konbat bann Izraelit dan direksyon vale Zourden. Me i pa ti konnen ki en latak par deryer lavil ti'n ganny prepare.

¹⁵ Zozye ek Izrael antye ti fer sanblan sove devan zot e tay dan direksyon dezer.

¹⁶ Tou bann zabitan dan lavil ti ganny apele pour pourswiv zot. Alor, zot ti pourswiv Zozye e zot ti ganny koupe avek lavil.

¹⁷ Tou zabitan Ai ek Betel ti'n sorti pour pourswiv bann Izraelit. Zot ti'n les lavil san defans pour zot al pourswiv Izrael.

¹⁸ Alor, SENYER ti dir Zozye, “Lev ou zarm ki dan ou lanmen dan direksyon Ai, akoz mon pe al livre ou sa lavil.” Zozye ti pwent son zarm ki ti dan son lanmen, dan direksyon Ai.

¹⁹ Koman i ti lev son lans, bann zonm ki ti'n kasyet ti sorti vitman dan zot landrwa kasyet. Zot ti fonse e antre dan lavil ki zot ti pran. Apre, zot ti depese pour met dife dan lavil.

²⁰ Kan bann zonm Ai ti get deryer zot, zot ti war zis lafimen ki pe monte dan lesyel. Ti nepli annan okenn landrwa pour zot al kasyet, e zot ti dekouraze.

²¹ Ler Zozye ek tou bann Izraelit ti war ki lavil ti'n ganny atake par sirpriz e ki lafimen ti pe monte sorti dan lavil, zot ti fer demi tour e atak bann zonm Ai.

²² Lezot Izraelit ti sorti dan lavil, pour atake. Bann zabitan Ai ti ganny anserkle par bann Izraelit ki ti masakre zot, san eparny personn,

²³ eksepte lerwa Ai ki ti ganny kaptire e anmennen kot Zozye.

²⁴ Ler bann Izraelit ti'n fini touy tou bann zabitan Ai, dan lakanpanny, dan dezer kot zot ti ganny pourswiv. Ler zot tou ti'n fini masakre zot tou, bann Izraelit ti retourn dan lavil e masakre tou leres.

²⁵ An tou, 12,000 zonm ek fanm ti ganny masakre; tou bann zabitan Ai ti mor sa zour.

²⁶ Zozye pa ti bes lapwent son lans ziska ki zot ti'n fini touy tou bann zabitan Ai.

²⁷ Dapre lord ki SENYER ti'n donn Zozye, bann Izraelit ti pran pour zot, tou bann piyaz lager, tou bann zannimo e tou sa ki ti annan dan sa lavil.

²⁸ Zozye ti bril lavil e fer li vin en landrwa abandonnen, ziska ozordi.

²⁹ I ti pann lerwa Ai avek en pye dibwa pandan tou lazournen. Soley kouse, Zozye ti donn lord fer desann son kadav ki ti anpandan lo pye dibwa e zet li devan laport lavil. Zot ti kouver li avek en gro ta ros, ki touzour egziste.

Zozye I Renouvle Lalyans

³⁰ Apre, Zozye ti konstri en lotel pour SENYER, Bondye Izrael lo montanny Ebal,

³¹ parey Moiz, serviter SENYER, ti'n ordonn bann Izraelit, parey in ganny ekri dan Liv Lalwa Moiz: En lotel fer avek ros brit ki pa'n ganny taye avek okenn zouti anfer. Lo sa lotel, zot ti ofer bann sakrifis konplet ek sakrifis lape.

³² La, dan prezans tou bann Izraelit, Zozye ti ekri lo bann ros en kopi lalwa ki Moiz ti'n ekri pour bann Izraelit.

³³ Tou bann Izraelit, zot bann ansyen, zot bann sef e zot bann ziz, bann etranze ki ti pe reste parmi zot, ti debout lo sak kote, anfas avek Kof Lalyans SENYER ki bann pret-levit ti pe anmennen. Lanmwatye parmi zot ti plas zot lo kote montanny Garizim e lot lanmwatye lo kote montanny Ebal, parey Moiz, serviter SENYER ti'n ordonnen, pour zot beni pep Izrael.

³⁴ Answit, Zozye ti proklanm tou bann parol lalwa, benediksyon ek malediksyon, parey in ganny ekri dan Liv Lalwa.

³⁵ Zozye ti lir tou bann parol ki Moiz ti'n ordonnen, devan bann fanm, bann fanmir antye, ek bann etranze ki ti pe viv parmi zot.