Zozye 6 - Labib An Kreol Seselwa

Miray Zeriko I Tonbe

¹ Lavil Zeriko ti konpletman fermen devan pep Izrael. Personn pa ti ni antre, ni sorti.

² SENYER ti dir Zozye, “Gete! Mon'n livre Zeriko dan ou lanmen, son lerwa ek son bann vayan gerye.

³ Zot tou bann gerye, zot ava fer letour lavil; zot ava fer letour lavil en fwa par zour pandan sis zour.

⁴ Set pret avek tronpet korn bouk, ava mars devan Kof lalyans. Setyenm zour, zot ava fer set letour lavil e bann pret ava soufle tronpet.

⁵ Ler zot ava antann tronpet korn bouk soufle, lepep antye ava kriye avek en gran laklamasyon. Alor, miray lavil ava tonm plat ater e lepep ava atake drwat devan zot.”

⁶ Zozye, garson Noun, ti konvok bann pret. I ti dir zot, “Pran Kof lalyans. Set pret ava anmenn set tronpet korn bouk devan Kof Lalyans SENYER.”

⁷ Apre, i ti dir lepep, “Ale! Fer letour lavil. Bann gerye avangard ava pas devan Kof Lalyans SENYER.”

⁸ Parey Zozye ti'n ordonn lepep, sa set pret ki ti pe anmenn sa set tronpet korn bouk ti mars devan SENYER an souflan zot tronpet; Kof Lalyans SENYER ti swiv zot.

⁹ Bann gerye avangard ti mars devan bann pret ki ti pe soufle tronpet. Aryergard ti swiv Kof lalyans pandan ki bann tronpet ti kontinyen soufle.

¹⁰ Zozye ti donn lepep sa lord: Zot pa pou fer okenn laklamasyon, ni okenn tapaz, ni koze, ziska zour mon ava dir zot: Lans en laklamasyon.

¹¹ Kof SENYER ti fer letour lavil. Zot ti fer en letour. Apre, zot ti retourn dan kan kot zot ti pas lannwit.

¹² Zozye ti leve granmaten, e bann pret ti repran Kof SENYER.

¹³ Sa set pret ki ti pe anmenn sa set tronpet korn bouk devan Kof SENYER ti mars devan an souflan tronpet. Bann gerye arme ti mars devan zot. Aryergard ti vin apre Kof Lalyans SENYER, lo son bann tronpet.

¹⁴ Dezyenm zour, zot ti fer en fwa letour lavil; apre, zot ti retourn dan kan. Zot ti fer sa pandan sis zour.

¹⁵ Setyenm zour, zot ti leve granmaten, avan soley leve e zot ti refer letour lavil parey avan. Sa zour, zot ti fer set fwa letour lavil.

¹⁶ Apre setyenm letour, bann pret ti sonn zot tronpet. Zozye ti dir lepep: Kriy for, akoz SENYER in donn zot sa lavil.

¹⁷ Me lavil avek tou sa ki ladan, i devre ganny detri pour SENYER. Zis Rahab, sa prostitye, tou son fanmir ki kot li, e tou sa ki i posede, ava ganny eparnyen, akoz i ti kasyet bann mesaze ki nou ti'n anvoye.

¹⁸ Selman, fer atansyon zot pa pran nanryen ki devre ganny detri pour SENYER. Si zot fer sa, maler ek destriksyon pou tonm lo kan Izrael.

¹⁹ Larzan ek lor, tou bann lobze an bronz e an fer, ava ganny konsakre pour SENYER; zot ava ganny met dan trezor SENYER.

²⁰ Alor, lepep ti kriye, e bann tronpet ti sonnen. De ki lepep ti antann son bann tronpet, zot ti kriye, e miray ti degrengole. Deswit, pep Izraelit ti lans devan, atak lavil e kaptir li.

²¹ Zot ti detri tou sa ki ti annan dan lavil e masakre zonm, fanm, zenn ek vye, bef, mouton ek bourik.

²² Zozye ti'n dir sa de zonm ki ti'n al espyonn pei: Antre dan lakaz sa prostitye e fer li sorti avek tou sa ki pour li, dapre serman ki zot ti'n fer avek li.

²³ Alor, sa bann zennzan, bann espyon, ti ale e fer Rahab sorti avek son papa, son manman, son bann frer, tou sa ki i ti annan e tou manm son klan. Zot ti ganny enstale an deor kan Izrael.

²⁴ Zot ti met dife dan lavil avek tou sa ki ti ladan, eksepte larzan, lor, bann lobze an bronz, an fer ki zot ti met dan trezor SENYER.

²⁵ Zozye ti sov lavi Rahab, sa prostitye, ensi ki tou bann manm son fanmir e tou sa ki i ti annan. Depi sa zour, i reste parmi Izrael, akoz i ti'n kasyet bann mesaze ki Zozye ti'n anvoye pour eksplor Zeriko.

²⁶ Zozye, ti fer pronons sa serman: Sa enn ki esey rekonstri lavil Zeriko, pou ganny malediksyon SENYER. I pou met fondasyon kont lavi son premye garson; i pou konstri bann laport kont lavi son dernyen garson.

²⁷ SENYER ti avek Zozye, e son renonmen ti gran atraver pei antye.