Zozye 5 - Labib An Kreol Seselwa

¹ Kan tou bann lerwa Amorit ki ti reste dan Was, lot kote larivyer Zourden, ek tou bann lerwa Kananeen ki ti reste lo bor lanmer Mediterane ti'n tande ki SENYER ti'n fer sek delo larivyer Zourden, ziska ki bann Izraelit ti'n fini traverse, zot ti per e perdi kouraz devan pep Izrael.

Sirkonsizyon Nouvo Zenerasyon Gilgal

² Dan sa letan, SENYER ti dir Zozye, “Fer kouto avek ros e ou ava sirkonsi, sa nouvo zenerasyon Izraelit.”

³ Alor, Zozye ti fer bann kouto avek ros, e i ti sirkonsi bann Izraelit dan sa landrwa ki'n ganny apele montanny Sirkonsizyon.

⁴ La, akoz Zozye ti sirkonsi zot: Tou lepep ki ti'n sorti Lezip, bann mal, bann gerye, ti'n deza mor dan dezer pandan vwayaz letan zot ti pe sorti Lezip.

⁵ Tou lepep ki ti'n sorti Lezip ti'n sirkonsi; me bann ki ti ne dan semen, dan dezer, dan semen sorti Lezip, pa ti ankor ganny sirkonsi.

⁶ Annefe, pep Izrael ti'n mars pandan 40 an dan dezer, ziska ki tou sa nasyon ti'n disparet, bann gerye ki ti'n sorti Lezip ki pa ti'n ekout SENYER. SENYER ti'n fer serman ki sa bann zonm pa pou war sa pei ki i ti'n promet avek zot bann zanset pour donn nou, sa pei kot dile ek dimyel i koule.

⁷ Se sa zenn zenerasyon, ki pa ti ankor ganny sirkonsi, ki Zozye ti sirkonsi. Annefe, zot pa ti'n ganny sirkonsi, akoz zot pa ti'n ganny sirkonsi pandan ki zot ti dan semen.

⁸ Apre ki nasyon antye ti'n ganny sirkonsi, zot ti reste dan kan dan zot latant, ziska ki zot ti'n geri.

⁹ SENYER ti dir Zozye, “Ozordi mon'n roul dezoner Lezip, lwen avek zot.” Pour sa rezon, sa landrwa in ganny apele Gilgal, ziska ozordi.

Lafet Pak dan Pei Kanaan

¹⁰ Pep Izrael ti kanpe Gilgal, e la, dan laplenn dezer Zeriko, zot ti selebre Pak aswar, katorzyenm zour sa mwan.

¹¹ Lannmen lafet Pak, zot ti manz pour premye fwa, bann prodwi ki pous dan pei: Dipen san lelven ek bann legren griye.

¹² Lannmen ki zot ti manz bann prodwi pei, lamann ti aret tonbe. Bann Izraelit ti nepli ganny lamann. Sa menm lannen, zot ti manz bann prodwi Kanaan.

Zozye devan En Zonm avek Lepe

¹³ En zour, pandan ki Zozye ti Zeriko, i ti lev lizye e i ti war en zonm debout devan li, son lepe dan son lanmen. Zozye ti mars dan son direksyon. I ti dir li, “Eski ou pour nou, oubyen pour nou lennmi?”

¹⁴ I ti reponn, “Mon sef larme SENYER; mon'n fek arive.” Zozye ti tonm lafas ater. I ti dir, “Mon senyer! Ki oule mon fer?”

¹⁵ Sef larme SENYER ti dir Zozye, “Tir ou sandal dan ou lipye; kot ou pe debout i en later sen.” Zozye ti obei li.