Zozye 3 - Labib An Kreol Seselwa

Pep Izrael I Travers Larivyer Zourden

¹ Zozye ti leve granmaten e kit Sitim avek tou bann Izraelit. I ti ariv kot larivyer Zourden, kot zot ti kanpe avan travers larivyer.

² Trwa zour plitar, bann sef ti pas dan kan,

³ e donn lepep sa lord: Kan zot ava war bann pret-levit pe anmenn Kof Lalyans SENYER, zot Bondye, zot ava kit sa landrwa e swiv zot.

⁴ Zanmen zot in pas isi avan; konmsa zot ava konn semen. Selman, pa aprose; zot ava gard en distans anviron en kilomet deryer.

⁵ Alor, Zozye ti dir lepep, “Pirifye zot, akoz demen, SENYER pou fer bann mervey parmi zot.”

⁶ Zozye ti dir bann pret, “Pran Kof lalyans e pas devan lepep.” Zot ti pran Kof lalyans e zot ti mars devan lepep.

⁷ SENYER ti dir Zozye, “Ozordi mon pou konmans fer ou grandi devan pep Izrael antye. Konmsa, zot ava konnen ki mon pou avek ou parey mon ti avek Moiz.

⁸ Ou ki pou donn sa lord bann pret ki anmenn Kof lalyans: Ler zot ava ariv obor larivyer Zourden, zot ava reste debout dan larivyer.”

⁹ Alor, Zozye ti dir bann Izraelit, “Aprose e ekout sa ki SENYER, zot Bondye in dir.”

¹⁰ Zozye ti dir: La ki mannyer zot ava konnen ki Bondye vivan i parmi zot, e ki i pou sas bann Kananeen, bann Hitit, bann Hivit, bann Perizit, bann Girgasit, bann Amorit e bann Zebizit devan zot.

¹¹ Annefe, Kof Lalyans SENYER later antye pou travers larivyer Zourden devan zot.

¹² Aprezan, swazir 12 zonm dan bann tribi Izrael, enn par sak tribi.

¹³ Kan bann pret ki anmenn Kof Lalyans SENYER, later antye ava poz zot lipye dan delo larivyer Zourden, delo par anler dan larivyer Zourden pou aret koule, e vin an ta.

¹⁴ Ler lepep ti kit zot latant pou travers larivyer Zourden, bann pret ki ti anmenn Kof lalyans ti mars devan lepep.

¹⁵ Pandan letan larekolt, larivyer Zourden ti deborde. De ki sa bann ki ti pe anmenn Kof lalyans ti ariv kot larivyer Zourden e ki lipye bann pret ki ti pe anmenn Kof lalyans ti tous delo dan larivyer Zourden,

¹⁶ delo ti aret koule, e delo ki pli o ti reste an plas lo en long distans ziska Adan, en lavil ki akote Sartann. Par anba, delo larivyer ki ti pe koul dan direksyon lanmer Araba, lanmer Mor, ti konpletman sek. Alor, lepep ti travers vizavi Zeriko.

¹⁷ Bann pret ki ti pe anmenn Kof Lalyans SENYER ti debout kot ti sek, dan milye larivyer Zourden, ziska ki nasyon antye ti'n fini travers larivyer Zourden.