Zozye 14 - Labib An Kreol Seselwa

Partaz Pei lo Kote Was Zourden

¹ La patrimwann ki pep Izrael ti resevwar dan pei Kanaan. Sa ti bann teritwar ki pret Eleazar, Zozye garson Noun ek sef fanmir dan sak tribi Izraelit ti partaze avek zot:

² Distribisyon par teritwar ti ganny fer par tiraz osor, parey SENYER ti'n ordonn Moiz pour fer pour sa nef tribi e pour sa demi tribi.

³ Annefe, Moiz ti'n deza donn en par de tribi edmi dan Les larivyer Zourden; me i pa ti'n donn bann Levit okenn par parmi zot.

⁴ Bann desandan Zozef ti form de tribi: Manase ek Efraim. Bann Levit pa ti ganny okenn par dan pei, me selman bann lavil pour zot reste, ek bann landrwa alantour, pour zot troupo ek zot bann byen.

⁵ Pep Izrael ti fer parey SENYER ti'n ordonn Moiz. Zot ti partaz pei.

Kaleb I Ganny Lavil Hebron

⁶ En zour, bann desandan sorti dan tribi Zida ti vin Gilgal, pour war Zozye. Kaleb, garson Yefoune, en Kenizit, ti dir li, “Ou konn byen sa ki SENYER ti dir avek Moiz, serviter Bondye ler i ti Kades Barnea, lo nou size.

⁷ Mon ti annan 40 an kan Moiz, serviter SENYER, ti anvoy mwan, sorti Kades Barnea, pou al espyonn pei. Mon ti anmenn li en rapor onnet.

⁸ Mon bann frer ki ti'n mont avek mwan ti dekouraz lepep. Me mwan, mon ti obei SENYER, nou Bondye avek tou mon leker.

⁹ Sa zour, Moiz ti fer sa serman: Mon promet ki sa pei ki ou'n mars lo la, pou vin ou posesyon pour ou e pour ou bann zanfan pour touzour, akoz ou'n reste fidel anver SENYER, ou Bondye.

¹⁰ Aprezan, SENYER in gard mwan vivan, dapre son promes. I annan 45 an, depi ki SENYER ti pronons sa parol avek Moiz, pandan ki Izrael ti pe marse dan dezer. Ozordi, mon annan 85 an.

¹¹ Pourtan, mon ankor osi for ki zour Moiz ti anvoy mwan. Mon annan menm lafors ozordi, ki mon ti annan dan konba, oubyen pour fer tou lezot aktivite.

¹² Pour sa rezon, donn mwan sa pei montanny ki SENYER ti koz lo la sa zour. Annefe, ou ti tande depi sa letan, ki ti annan bann zean, avek zot bann gran lavil fortifye. Si SENYER i avek mwan, mon ava sas zot parey SENYER ti anonse.”

¹³ Zozye ti beni li. I ti donn Kaleb, garson Yefoune, lavil Hebron koman son par teritwar.

¹⁴ Hebron in reste ziska ozordi posesyon bann desandan Kaleb, garson Yefoune, ki sorti dan klan bann Kenizit, akoz i ti fidel anver SENYER, Bondye Izrael.

¹⁵ Otrefwa, Hebron ti apel Kiryat-Arba. Arba ti zonm pli renonmen parmi bann zean Anakit. Pei ti reste anpe, san okenn lager.