Zozye 10 - Labib An Kreol Seselwa

Laviktwar bann Izraelit lo bann Amorit

¹ Adoni-Sedek, lerwa Zerizalenm, ti aprann ki Zozye ti'n kaptir e detri konpletman Ai e touy son lerwa, parey i ti fer avek Zeriko ek son lerwa. I ti aprann osi ki bann Gabaonit ti'n fer lape avek bann Izraelit e ki zot ti pe viv parmi zot.

² Zot ti dan en gran lafreyer, akoz Gabaon ti en gran lavil, parey tou bann lavil ki annan en lerwa, me pli gran ki Ai, e tou son bann zonm ti bann vayan gerye.

³ Alor, lerwa Adoni-Sedek, lerwa Zerizalenm, ti anvoy sa mesaz kot Ohanm, lerwa Hebron, Pireanm lerwa Yarmout, Yafia, lerwa Lakis e Debir, lerwa Eglonn:

⁴ Vin ed mwan pour atak Gabaon, akoz in fer lape avek Zozye e avek bann Izraelit.

⁵ Sa senk lerwa Amorit: Lerwa Zerizalenm, lerwa Hebron, lerwa Yarmout, lerwa Lakis ek lerwa Eglonn, ti zwenn ansanm pour al konfront lennmi avek tou zot latroup. Zot ti anserkle Gabaon e atak li.

⁶ Bann zabitan Gabaon ti anvoy sa mesaz kot Zozye dan kan Gilgal: Pa abandonn ou bann serviter; vin vit, vin sekour nou. Tou bann lerwa Amorit ki reste dan rezyon montanny in zwenn ansanm kont nou.

⁷ Alor, Zozye ti kit Gilgal avek tou son larme ek son bann vayan gerye.

⁸ SENYER ti dir Zozye, “Pa per zot, mon'n livre zot dan ou lanmen. Personn pa pou kapab tenir devan ou.”

Bann Izraelit I detri zot bann Lennmi

⁹ Zozye ti'n mars tou lannwit depi Gilgal. I ti ariv lo zot, par sirpriz.

¹⁰ SENYER ti fer bann Amorit sove devan bann Izraelit ki ti bat zot dan Gabaon. Bann Izraelit ti pourswiv zot dan monte Bet-Horonn, e kontinyen ziska Azeka e Makeda.

¹¹ Pandan ki bann Amorit ti pe sov bann Izraelit dan desant Bet-Horonn, SENYER ti fer tonm lo zot depi lesyel, lagrel parey bann gro ros, tou dilon, ziska Aseka. Plis zonm ti mor par lagrel ki par lepe bann Izraelit.

¹² Alor, zour ki SENYER ti donn laviktwar Izrael lo bann Amorit, Zozye ti koz avek SENYER dan prezans tou bann Izraelit. I ti dir: Soley! Aret par lao Gabaon. Lalin! Reste lo vale Ayalonn.

¹³ Soley ti arete, lalin pa ti bouze ziska ki pep Izrael ti'n fini tir son vanzans lo son bann lennmi. Sa in ganny ekri dan liv Yasar, savedir Zis: Soley ti arete dan milye lesyel; i pa ti kouse pandan preski en lazournen antye.

¹⁴ Zanmen avan, ni apre, in deza annan en zour parey sa, kot SENYER in ekout en zonm. Annefe, SENYER ti pe lager pour Izrael.

¹⁵ Apre, Zozye ek tou bann Izraelit ti retourn dan kan Gilgal.

Zozye I Kaptir Senk Lerwa

¹⁶ Sa senk lerwa ti sove e ti al kasyet dan kavern Makeda.

¹⁷ Zozye ti ganny sa rapor: Sa senk lerwa in ganny dekouver pe kasyet dan kavern Makeda.

¹⁸ Zozye ti dir, “Roul bann gro ros devan lantre kavern e poste bann gard pour vey zot.

¹⁹ Me zot, pa reste la. Kontinyen pourswiv zot bann lennmi, atak zot aryergard e anpes zot antre dan zot lavil, akoz SENYER, zot Bondye in livre zot dan zot lanmen.”

²⁰ Ler Zozye avek bann Izraelit ti'n fini bat bann Amorit, bann ki ti'n kapab sape ti al refizye dan bann lavil fortifye.

²¹ Lakominote antye ti retourn Makeda sen e sof, dan kan kot Zozye. Personn pa ti oze dir en mo kont bann Izraelit.

²² Alor Zozye ti dir, “Degaz lantre kavern, fer sorti sa senk lerwa e anmenn zot kot mwan.”

²³ Zot ti fer li. Zot ti tir sa senk lerwa dan kavern e anmenn kot Zozye. Sa ti lerwa Zerizalenm, lerwa Hebron, lerwa Yarmout, lerwa Lakis ek lerwa Eglonn.

²⁴ Ler zot ti'n anmenn sa bann lerwa devan li, Zozye ti apel tou bann Izraelit. I ti dir bann sef latroup ki ti'n akonpanny li, “Vini! Met zot lipye lo likou sa bann lerwa.” Zot ti aprose e met zot lipye lo likou bann lerwa.

²⁵ Zozye ti dir zot, “Pa per e pa tranble. Reste for e kouraze, akoz konmsa ki SENYER pou tret tou bann lennmi dan konba.”

²⁶ Apre, Zozye ti touy sa bann lerwa. I ti pann zot lo senk pye dibwa; zot lekor ti reste anpandan ziska aswar.

²⁷ Soley kouse, Zozye ti donn lord fer desann zot kadav. Zot ti ganny zete dan sa menm kavern kot zot ti'n al kasyet. Zot ti plas bann gro ros devan lantre kavern. Zot ankor la ziska ozordi.

Zozye I Kaptir plis Teritwar Amorit

²⁸ Sa menm zour, Zozye ti kaptir lavil Makeda e masakre tou bann zabitan avek son lerwa. I ti detri zot tou, ensi ki tou bann et vivan ki ti annan. I pa ti kit personn vivan. I ti tret lerwa Makeda parey i ti'n tret lerwa Zeriko.

²⁹ Apre, Zozye avek son larme ti kit Makeda e al atak Libna.

³⁰ SENYER ti livre sa lavil osi avek son lerwa dan lanmen bann Izraelit, ki ti masakre tou bann zabitan e tou bann et vivan ki ti annan. I pa ti les okenn sirvivan. I ti tret son lerwa parey i ti tret lerwa Zeriko.

³¹ Sorti Libna, Zozye avek bann Izraelit ti al Lakis. Zot ti anserkle sa lavil e zot ti atak li.

³² SENYER ti livre Lakis dan lanmen bann Izraelit. Zot ti kaptir li son dezyenm zour batay e masakre tou bann zabitan ek tou bann et vivan, parey zot ti fer Libna.

³³ Alor, Oranm, lerwa Gezer, ti monte pour ed Lakis. Me Zozye ti bat li avek tou son pep san les okenn sirvivan.

³⁴ Avek tou son larme, Zozye ti kit Lakis e al Eglonn. Zot ti anserkle sa lavil e zot ti atak li.

³⁵ Zot ti kaptir li son menm zour e masakre tou bann zabitan ek tou bann et vivan ki ti annan. Sa zour, i pa ti les okenn sirvivan, parey i ti fer Lakis.

³⁶ Zozye avek tou bann Izraelit ti monte depi Eglonn ziska Hebron ki zot ti atake.

³⁷ Zot ti pran sa lavil e masakre son bann zabitan, son lerwa, tou lezot lavil ki ti depann lo li e tou bann et vivan dan lavil, parey i ti'n fer Eglonn. I pa ti les okenn sirvivan.

³⁸ Answit, Zozye, avek tou bann Izraelit, ti al dan direksyon Debir ki i ti atake.

³⁹ I ti kaptir sa lavil, son lerwa ek tou bann lavil depandan. Zot ti masakre tou bann et vivan ki ti annan. I pa ti les okenn sirvivan. I ti tret Debir ek son lerwa, parey i ti'n tret Hebron, Libna ek zot lerwa.

⁴⁰ Zozye ti ganny laviktwar lo sa pei antye ek zot bann lerwa: Rezyon montanny, rezyon Negev, rezyon laplenn, ziska dan bann rezyon anpant. I pa ti les okenn sirvivan. I ti detri tou et vivan, parey SENYER, Bondye Izrael ti'n ordonn li.

⁴¹ Zozye ti bat zot depi Kades Barnea ziska Gaza, depi rezyon Gosenn ziska Gabaon.

⁴² Zozye ti kaptir tou sa bann lerwa e pran posesyon tou zot teritwar en sel kou, akoz SENYER Bondye Izrael ti pe lager pour Izrael.

⁴³ Apre, Zozye ek tou bann Izraelit ti retourn dan kan, Gilgal.