Ziz 8 - Labib An Kreol Seselwa

Vanzans Zedeon

¹ Bann zonm Efraim ti dir Zedeon, “Ki savedir sa mannyer azir anver nou? Akoz ou pa ti apel nou ler ou ti al fer lager kont bann Madyanit?” Ti annan en gro dispit ant zot.

² Zedeon ti dir zot, “Kwa ki mon'n fer konpare avek zot? Grapiyaz rezen Efraim pa i vo plis ki rekolt Abiezer?

³ Dan zot lanmen ki Bondye in livre bann sef Madyanit, Horeb ek Zeeb. Kwa ki mon'n kapab fer ki parey zot?” Sa bann parol ti kalme zot lakoler kont li.

Zedeon dan Les Larivyer Zourden

⁴ Zedeon ti ariv kot larivyer Zourden ki i ti traverse, sa 300 zonm ti avek li. Malgre lafatig, zot ti kontinyen pourswiv zot.

⁵ I ti dir bann zabitan Soukot, “Mon sipliy zot, donn dipen bann zonm ki pe akonpanny mwan. Zot tre fatige. Mon pe pourswiv Zeba ek Salmouna, de lerwa bann Madyanit.”

⁶ Me bann sef Soukot ti reponn li, “Eski zot in deza kaptir Zeba ek Salmouna, pour ki nou donn dipen ou bann zonm?”

⁷ Zedeon ti reponn zot, “Zour SENYER ava'n livre Zeba ek Salmouna dan mon lanmen, mon pou fwet zot avek roten pikan avek rons ki pous dan dezer.”

⁸ Depi la, Zedeon ti mont Penouel. I ti fer menm demann avek bann zabitan. Me bann zabitan Penouel ti reponn li parey bann zabitan Soukot.

⁹ I ti osi dir bann zabitan Penouel, “Ler mon pou retournen apre laviktwar, mon pou kraz sa tour.”

¹⁰ Zeba ek Salmouna ti dan lavil Karkor avek zot bann zonm, anviron 15,000 ki ti reste parmi bann zonm ki sorti dan Les. Annefe, 120,000 zonm ki ti konn servi lepe ti'n ganny touye.

¹¹ Zedeon ti mont par semen bann karavann, Les avek Noba ek Yogboa. I ti ganny laviktwar lo larme ki ti krwar I ti an sekirite.

¹² Zeba ek Salmouna ti taye, me Zedeon ti pourswiv zot. I ti kaptir Zeba ek Salmouna, de lerwa Madyanit e senm panik partou dan zot larme.

¹³ Kan Zedeon, garson Yoas, ti retournen sorti lager, par montanny Eres,

¹⁴ i ti sezi en zennonm ki reste Soukot. I ti kestyonn li. Sa zennonm ti donn li par ekri, non bann sef ek bann ansyen dan Soukot: 77 zonm an tou.

¹⁵ Alor, Zedeon ti al war bann zabitan Soukot. I ti dir zot, “La Zeba ek Salmouna kont ki zot ti fer mwan en repros ler zot ti demann mwan: Eski Zeba ek Saloumanna i deza dan ou pouvwar, pour ki nou donn dipen ou bann solda ki fatige?”

¹⁶ Alor, i ti pran bann ansyen dan lavil, bann baton pikan ek bann rons, pour fwet bann zabitan Soukot.

¹⁷ I ti osi kraz tour Penouel e masakre bann zabitan lavil.

¹⁸ Apre, i ti demann Zeba ek Salmouna, “Ki mannyer bann zonm ki zot ti touye Tabor, ti ete?” Zot ti reponn, “Zot ti parey ou; sakenn zot ti parey en sef.”

¹⁹ I ti dir zot, “Zot ti mon bann frer, zanfan mon manman. Lo non SENYER ki vivan, si zot ti'n les zot viv, mon pa ti pou touy zot.”

²⁰ Apre, i ti dir Yeter, son premye garson, “Leve! Touy zot.” Me sa zennonm pa ti tir son lepe, akoz i ti per, akoz i ti ankor zenn.

²¹ Zeba ek Salmouna ti dir Zedeon, “Leve ou menm e touy nou. Si ou en zonm, montre ou lafors.” Alor Zedeon ti leve e touy Zeba ek Salmouna. Apre, i ti pran bann ornman ki ti anpandan dan likou zot bann samo.

Zedeon I Ador Zidol

²² Bann Izraelit ti dir Zedeon, “Vin nou lerwa, e apre ou, ou garson, e apre, ou pti zanfan, akoz ou'n sov nou dan lanmen Madyann.”

²³ Zedeon ti dir zot, “Pa mwan, ni mon garson ki pou vin zot lerwa, me SENYER ki ava zot lerwa.”

²⁴ Apre, Zedeon ti dir zot, “Mon anvi demann zot keksoz: Sakenn zot ava donn mwan en bag dan zot piyaz lager.” Annefe, bann ki ti perdi lager ti annan bann bag annor, akoz zot ti bann Ismaelit.

²⁵ Zot ti reponn, “Dakor! Nou ava donn ou.” Zot ti tal en lenz ater e sakenn ti zet en bag sorti dan son piyaz lager.

²⁶ Pwa bann bag annor ki i ti'n demande, ti pez 20 kilo; san kont bann bizou, bann pandan zorey, bann lenz rouz fonse ki bann lerwa Madyanit ti mete; osi san kont bann kolye ki ti dan likou zot bann samo.

²⁷ Avek tousala, Zedeon ti fer en lefod ki i ti plas dan son lavil, Ofra. Pep Izrael antye ti vin ador la, avek li. Sa lefod ti vin en pyez pour Zedeon e pour son fanmir.

²⁸ Konmsa ki Madyann ti ganny imilye anba pouvwar pep Izrael; i pa ti zanmen relev latet. Pei ti dan lape pandan 40 an, toultan ki Zedeon ti vivan.

²⁹ Yeroub-Baal, setadir Zedeon, garson Yoas, ti retourn kot li.

³⁰ I ti ganny 70 garson ki ti son prop disan, akoz i ti annan bokou fanm.

³¹ Son menazer ki ti reste Sikenm, ti osi donn li en garson ki i ti apel Abimelek.

³² Zedeon, garson Yoas ti mor apre en vyeyes ere. I ti ganny antere dan latonm Yoas, son papa, dan lavil Ofra ki ti pour klan Abiezer.

³³ Me apre lanmor Zedeon, pep Izrael ti rekonmans prostitye avek bann Baal; zot ti pran Baal-Berit koman bondye.

³⁴ Pep Izrael ti'n oubliy SENYER zot Bondye ki ti'n delivre zot dan lanmen zot bann lennmi otour zot;

³⁵ zot pa ti azir fidelman anver fanmir Yeroub-Baal, setadir Zedeon, malgre tou dibyen ki i ti'n fer pour Izrael.