Ziz 20 - Labib An Kreol Seselwa

Lezot Tribi I Atak Benzamen

¹ Pep Izrael antye ti sorti e koman en sel zonm, depi Dann ziska Berseba ek Galaad ti rasanble Mispa, devan SENYER.

² Tou bann sef lepep antye, tou bann tribi Izrael ti prezan devan sa lasanble pep Bondye: 400,000 zonm apye ki ti konn servi lepe.

³ Bann Benzamit ti aprann ki bann Izraelit ti'n mont Mispa. Bann Izraelit ti dir, “Eksplik nou ki mannyer sa krim in arive?”

⁴ Alor, sa levit, mari sa fanm ki ti'n ganny asasinen ti dir, “Mon ti'n ariv Gibea, dan teritwar Benzamen avek mon menazer pour pas lannwit.

⁵ Bann sef lavil Gibea ti leve kont mwan; e dan lannwit, zot ti antour lakaz kot mon ti ete. Zot ti annan lentansyon touy mwan, me zot ti abiz mon menazer e in mor akoz sa.

⁶ Mon ti pran mon menazer; mon ti dekoup li an morso ki mon ti anvoy partou dan tou teritwar ki form patrimwann Izrael. Annefe, zot ti'n komet en akt imoral, en aksyon degoutan dan Izrael.

⁷ Zot tou ki la, pep Izrael! Diskite e pran en desizyon.”

⁸ Lepep antye ti leve e, koman en sel zonm, zot ti dir, “Personn parmi nou pa pou retournen, personn pa pou retourn kot li.

⁹ Aprezan, la sa ki nou pou fer kont Gibea: Nou pou monte e atak li dapre tiraz osor.

¹⁰ Dan tou bann tribi Izrael, nou ava pran 10 zonm lo 100, 100 lo 1,000 e 1,000 lo 10,000. Zot ava al rod bann provizyon pour bann zonm pour ki ler zot retournen, nou ava al atak Givea dan teritwar Benzamen e pini li dapre sa aksyon degoutan ki son bann zabitan in komet dan Izrael.”

¹¹ Konmsa, tou zonm Izraelit ti rasanble kont sa lavil, ini koman en sel zonm.

¹² Bann tribi Izrael ti anvoy bann zonm dan tou bann tribi Benzamen pour dir zot, “Ki krim ki'n ganny komet parmi zot?

¹³ Donn nou sa bann zonm san moral dan Gibea, pour ki zot ganny touye e ki nou fer disparet dan Izrael, sa move aksyon.” Me bann Benzamit pa ti oule ekout zot bann frer Izraelit.

¹⁴ Bann Benzamit ti sorti dan zot bann lavil e rasanble Gibea pour al lager kont bann Izraelit.

¹⁵ Sa zour, en resansman ti ganny fer lo bann Benzamit sorti dan bann lavil: 26,000 zonm ki konn servi lepe, san kont bann zabitan Gibea, 700 zonm elit ki ti'n ganny resanse.

¹⁶ Parmi tou sa pep, ti annan 700 zonm elit ki ti gose. Zot ti kapab, avek en ros dan zot fles, viz en seve san manke.

¹⁷ Resansman ti osi ganny fer parmi bann zonm dan Izrael, san kont sa bann dan tribi Benzamen: 400,000 zonm ki konn servi lepe; zot tou, zot ti bann vayan gerye.

¹⁸ Bann Izraelit ti mont Betel pour konsilte Bondye: Lekel parmi nou ki pou al premye pour lager kont bann Benzamit? SENYER ti reponn: Zida ki pou al premye.

¹⁹ Son bomaten, bann Izraelit ti al dres zot kan pre Gibea.

²⁰ Zot ti sorti pour atak bann Benzamit; zot ti al pran zot pozisyon devan Gibea.

²¹ Bann Benzamit ti sorti Gibea, e touy 22,000 Izraelit, sa zour.

²² Bann zonm Izraelit ti repran kouraz; zot ti remet zot an pozisyon konba, dan menm landrwa parey premye zour.

²³ Bann Izraelit ti al plere devan SENYER ziska aswar. Zot ti konsilte SENYER: Eski fodre nou atak ankor nou bann frer Benzamit? SENYER ti reponn: Atake.

²⁴ Dezyenm zour, bann Izraelit ti apros bann Benzamit.

²⁵ Sa menm zour, bann Benzamit ti sorti Gibea pour al atak bann Izraelit. Zot ti touy 18,000 zonm parmi bann Izraelit, tou sa bann zonm ti konn servi lepe.

²⁶ Lepep ek tou bann Izraelit ti mont Betel kot zot ti reste e plere devan SENYER. Zot ti zennen tou lazournen e ofer sakrifis konplet ek sakrifis lape devan SENYER.

²⁷ Bann Izraelit ti al konsilte SENYER. Annefe, dan sa letan, Kof Lalyans ti dan sa landrwa.

²⁸ Dan sa letan, Fineas, garson Eleazar, garson Aaron ki ti pe servi koman pret. Bann Izraelit ti dir, “Eski fodre nou al ankor atak nou bann frer Benzamit, oubyen renonse?” SENYER ti reponn, “Monte, akoz demen mon pou livre zot dan zot lanmen.”

²⁹ Bann Izraelit ti fer bann zonm maske otour Gibea.

³⁰ Trwazyenm zour, zot ti al atak bann Benzamit; zot ti pran zot pozisyon pour atak Gibea, parey lezot fwa.

³¹ Bann Benzamit ti sorti pour atak zot. Zot ti les zot ganny antrennen lwen avek lavil. Parey lezot fwa, zot ti konmans touy bann Izraelit lo bann semen ki mont ver Betel e ver Gibea, atraver lakanpanny. Zot ti touy anviron 30 zonm parmi bann Izraelit.

³² Bann Benzamit ti pe dir: Nou'n bat zot parey premye fwa; tandis ki bann Izraelit ti dir: Annou sove e antrenn zot lwen avek lavil, lo bann semen lakanpanny.

³³ Bann Izraelit ti sorti dan zot pozisyon e al regroup zot Baal-Tamar. Deswit, bann Izraelit ki ti pe kasyet ti sorti kot zot ti ete, dan Maare-Geba.

³⁴ Alor, 10,000 zonm elit dan Izrael antye ti ariv anfas avek Gibea. Konba ti for e bann Benzamit pa ti pe espere ki maler ti pe al tap zot.

³⁵ SENYER ti bat Benzamen devan Izrael. Sa zour, bann Izraelit ti touy 25,100 zonm Benzamit, zot tou bann zonm ki konn servi lepe.

³⁶ Bann Benzamit ti war ki zot ti'n ganny bate. Bann Izraelit ti kit teren lib devan bann Benzamit akoz zot ti pe kont lo latak bann zonm ki ti'n maske otour Gibea.

³⁷ Sa bann zonm ti sorti an vites kont Gibea. Zot ti al atake e masakre tou bann zabitan lavil.

³⁸ Dapre en sinyal ki zot ti'n tonm dakor parmi bann Izraelit, sa bann ki ti pe mont latak ti devre fer monte en gro lafimen sorti dan lavil.

³⁹ Kan bann zonm Izraelit ti sove dan konba, bann Benzamit ti'n deza touy en trantenn zonm parmi zot. Zot ti pe dir ant zot: Sertennman ki nou'n bat zot parey dan premye konba.

⁴⁰ Me dan sa letan en kolonn lafimen epe ti pe konmans monte sorti dan lavil. Bann Benzamit ti rekile. Partou dan lavil, laflanm ti pe mont ver lesyel.

⁴¹ Bann Izraelit ti vir lo zot. Bann Benzamit ti sezi avek laper ler zot ti war maler ki ti'n tap zot.

⁴² Zot ti sove devan bann Izraelit e pran semen ver dezer. Me lager ti kontinyen e bann zonm sorti dan bann lavil ti touy zot, akoz zot ti'n ganny anserkle.

⁴³ Zot ti anserkle bann Benzamit, pourswiv zot san arete e kraz zot ziska lo kote Les Gibea.

⁴⁴ An tou 18,000 Benzamit ti ganny touye; zot tou, zot ti bann vayan gerye.

⁴⁵ Parmi bann ki ti pe sove ver dezer, dan direksyon Rimonn, 5,000 ti ganny ratrape lo semen. Zot ti ganny pourswiv ziska Gidonm e ankor 2,000 ti ganny touye.

⁴⁶ An tou, 25,000 gerye Benzamit ki konn servi lepe, ti mor sa zour,

⁴⁷ tandis ki 600 zonm ti sove ver dezer, dan direksyon ros Rimonn. Zot ti reste la pandan kat mwan.

⁴⁸ Bann Izraelit ti retourn kot bann Benzamit e masakre zot tou, depi bann zabitan lavil ziska bann zannimo e tou sa ki ti ankor vivan. Zot ti osi met dife dan bann lavil ki ti lo zot semen.