Ziz 2 - Labib An Kreol Seselwa

Dezobeisans Izrael

¹ Mesaze SENYER ti monte sorti Gilgal e al Bokim. I ti dir, “Mon ti fer zot monte depi Lezip e mon'n fer zot antre dan sa pei ki mon ti'n promet par serman avek zot bann zanset. Mon ti dir: Zanmen mon pou kas mon lalyans avek zot.

² Lo zot kote, zot pa pou fer okenn lalyans avek bann zabitan sa pei; zot ava kraz zot bann lotel. Me zot pa ti obei mwan. Ki zot in fer la?

³ Alor mon ti dir: Mon pa pou sas zot devan ou; zot ava viv parmi zot e zot bann bondye ava vin en pyez pour zot.”

⁴ Apre ki mesaze SENYER ti'n dir sa bann parol avek tou bann Izraelit, lepep ti kriye e sanglote plere.

⁵ Zot ti apel sa landrwa Bokim, savedir Plere, e zot ti ofer bann sakrifis SENYER, lanmenm la.

Lanmor Zozye

⁶ Apre ki Zozye ti'n fer ale lepep, bann Izraelit ti retourn sakenn dan son propriyete, pour pran posesyon pei.

⁷ Lepep ti servi SENYER toultan ki Zozye ti vivan e toultan ki bann ansyen ti viv ankor apre Zozye, zot ki ti'n war sa gran mervey ki SENYER ti'n akonpli pour pep Izrael.

⁸ Zozye, garson Noun, serviter SENYER, ti mor laz 110 an.

⁹ I ti ganny antere dan teritwar ki ti fer parti son patrimwann, Timnat-Eres, dan rezyon montanny Efraim, Nor avek montanny Gaas.

¹⁰ Sa zenerasyon antye ti mor; en lot zenerasyon ki pa ti'n konn SENYER, ni mervey ki i ti'n akonpli pour pep Izrael, ti leve.

Izrael I Enfidel

¹¹ Bann Izraelit ti fer sa ki depler SENYER e zot ti al ador bann Baal.

¹² Zot ti'n abandonn SENYER, Bondye zot zanset, ki ti'n fer zot sorti Lezip; zot ti swiv lezot bondye ki parmi bann bondye sa pep ki ti otour zot. Zot ti prostern devan sa bann bondye e sa ti depler SENYER.

¹³ Zot ti abandonn SENYER e al servi bann Baal ek bann Astarte.

¹⁴ SENYER ti ankoler kont Izrael. I ti livre zot dan lanmen bann voler ki ti depouy zot. I ti vann zot avek zot bann lennmi ki ti reste otour zot. Zot ti nepli kapab tenir devan zot bann lennmi.

¹⁵ Parey SENYER ti'n dir, e par en serman, sak fwa zot ti sorti pour fer lager, lanmen SENYER ti kont zot ti tonm dan maler. Alor, zot ti dan en gran detres.

¹⁶ SENYER ti donn zot bann ziz pour delivre zot kont bann voler.

¹⁷ Me zot pa ti ni menm ekout zot bann ziz. Zot ti al prostitye avek lezot bondye e prostern devan zot. Tre vit, zot pa ti swiv semen ki zot bann zanset ti swiv, ki ti ekout bann komannman SENYER; me, zot pa ti fer parey.

¹⁸ Kan SENYER ti donn zot bann ziz, i ti avek bann ziz. Tan ki ti annan bann ziz, SENYER ti delivre zot dan lanmen zot bann lennmi. Annefe, SENYER ti pran pitye pour zot devan bann kit i pe zot maltret zot.

¹⁹ Me ler bann ziz ti mor, zot ti rekonmans vin koronpi, plis ki zot bann zanset. Zot ti swiv lezot bondye, servi zot e prostern devan zot; zot pa ti renons zot bann move mannyer viv.

²⁰ SENYER ti ankoler kont bann Izraelit. I ti dir, “Akoz sa nasyon pa'n respekte mon lalyans, sa lalyans ki mon ti'n fer avek zot bann zanset, me ki zot pa'n ekout mwan.

²¹ Mwan osi, mon pa pou sas ankor devan zot, okenn nasyon ki Zozye ti kite avan son lanmor.”

²² I ti dir sa, ti pour li teste bann Izraelit, pour war si zot pou swiv semen SENYER e mars parey zot bann zanset ti'n fer.

²³ Pour sa rezon, SENYER ti les sa bann nasyon trankil. I pa ti prese pour sas zot ni livre zot dan lanmen Zozye.