Ziz 18 - Labib An Kreol Seselwa

Tribi Dann I Rod en Teritwar

¹ Dan sa lepok, ti napa lerwa dan Izrael. Dan sa menm lepok, tribi Dann ti pe rod en teritwar pour reste. Annefe, ziska aprezan, i pa ti'n ganny okenn teritwar koman par, parmi bann tribi Izrael.

² Bann Danit ti anvoy parmi zot klan, senk zonm vayan parmi zot, sorti Sorea ek Estaol, pour al eksplor pei e fer konnesans avek. Bann Danit ti dir zot, “Al eksplor pei.” Zot ti ariv dan rezyon montanny Efraim kot zot ti pas lannwit, pre avek lakaz Mise.

³ Alor, ler zot ti pre kot Mise, zot ti rekonnet lavwa sa zenn levit. Zot ti al ver li e demann li, “Lekel ki'n anmenn ou isi? Ki ou fer la? Akoz ou pe reste la?”

⁴ I ti reponn zot, “Mise in fer tel, tel keksoz pour mwan; in ofer mwan en lapey e mon'n vin son pret.”

⁵ Zot ti dir li, “Konsilte Bondye, pour nou konnen si sa vwayaz ki nou'n antreprann pou reisi.”

⁶ Sa pret ti reponn zot, “Al anpe. Sa vwayaz ki zot pe antreprann i anba proteksyon Bondye.”

⁷ Sa senk zonm ti ale; zot ti ariv Lais. Zot ti war ki popilasyon ki ti pe reste la, ti pe viv an sekirite parey bann zabitan Sidon, dan trankilite ek konfyans. Dan sa pei, ti napa okenn vwazen zennan, oubyen dominer. Zot ti viv lwen avek bann Sidonit e zot ti napa relasyon avek personn.

⁸ Zot ti retourn Sorea ek Estaol, kot zot bann frer ki ti demann zot, “Ki zot annan pour rakonte.”

⁹ Zot ti reponn, “Annou al atak zot. Nou'n war sa pei, tre bon. Pa fer pares. Pa tarde pour al pran posesyon sa pei.

¹⁰ Ler zot ava arive, zot ava pe antre kot en pep ki viv an sekirite. Sa pei i gran e Bondye in livre li dan zot lanmen. I en pei kot nanryen pa manke.”

¹¹ Alor, 600 zonm sorti dan klan Dann ti kit Sorea ek Estaol, zot zarm atase avek zot sentir.

¹² Zot ti monte e kanp Kiryat-Yearim dan Zida. Pour sa rezon, ziska ozordi, sa lokalite ki sitye deryer Kiryat-Yearim i ganny apele Maane-Dann.

¹³ Sorti la, zot ti pas dan rezyon montanny Efraim e ariv kot Mise.

¹⁴ Alor, sa senk zonm ki ti'n al eksplor pei Lais, ti dir zot bann frer, “Eski zot konnen ki dan enn sa bann lakaz, i annan en rob pret, bann pti stati sakre ek en stati an metal? Aprezan, zot ki konnen ki pour fer.”

¹⁵ Zot ti al dan sa direksyon e antre dan lakaz kot sa zenn levit, dan lakaz Mise. Zot ti demann li koman i ete.

¹⁶ Sa bann 600 Danit ti reste debout devan laport, zot zarm atase avek zot sentir.

¹⁷ Sa senk zonm ki ti'n al eksplor pei ti mont dan letaz. Zot ti antre e zot ti pran rob pret, bann pti stati bondye ek sa stati an metal. Sa pret ti pe debout devan laport avek sa 600 zonm, zot zarm atase avek zot sentir.

¹⁸ Zot ti'n antre dan lakaz Mise e pran rob pret, bann pti stati bondye ek sa stati an metal. Sa pret ti demann zot, “Ki zot pe fer la?”

¹⁹ Zot ti reponn li, “Aret koze. Met ou lanmen lo ou labous e vin avek nou. Ou ava pour nou en papa e en pret. Kwa ki pli byen: Ki ou pret pour lafanmir zis en zonm, oubyen pret pour en tribi, en klan, dan Izrael?”

²⁰ Sa pret ti dan lazwa. I ti pran rob pret, bann pti stati sakre ek zidol an metal e al parmi sa bann dimoun.

²¹ Zot ti kontiny zot vwayaz; zot ti plas bann fanmir, bann troupo ek zot bann posesyon devan zot.

²² Ler zot ti ariv lwen avek lakaz Mise, bann vwazen Mise ti apel kanmarad e konmans pourswiv bann Danit.

²³ Zot ti kriy avek bann Danit ki ti retournen e zot ti demann Mise, “Ki ou annan pour kriye konmsa?”

²⁴ I ti reponn, “Zot in pran mon bann bondye ki mon ti'n fer pour mwan; zot in osi pran pret avek zot. Pa reste mwan nanryen. Koman zot oze demann mwan: Ki problenm ou annan”

²⁵ Bann Danit ti dir li, “Ase fer tapaz, sinon bann zonm ankoler ava kapab atak zot e akoz ou, zot ava perdi zot lavi ek zot fanmir.”

²⁶ Bann Danit ti kontiny zot semen. Ler Mise ti war ki zot pli for ki li, i ti retourn kot li.

Bann Danit I Enstal Zot dan Lais

²⁷ Bann Danit ti pran bann lobze ki Mise ti'n fer e anmenn ansanm avek sa pret ki ti dan son servis. Zot ti atak lavil Lais, en pep trankil e ki pa donn okenn problenm, me ki zot ti masakre e bril zot lavil.

²⁸ Pa ti annan personn pour delivre Lais, akoz i ti en lavil sitye lwen avek Sidon e bann zabitan pa ti depann lo personn. Annefe, Lais i sitye dan laplenn ki ale ziska Bet-Reob. Apre, zot ti rekonstri lavil e enstal zot.

²⁹ Zot ti apel sa lavil Dann, non zot zanset Izrael. Me oparavan, sa lavil ti apel Lais

³⁰ Bann Danit ti plas zot zidol. Zonatan, garson Gersonn, garson Manase, avek son bann garson ti vin pret pour tribi bann Danit ziska lepok deportasyon.

³¹ Zot ti enstal pour zot menm zidol ki Mise ti'n fer. Sa zidol ti reste osi lontan ki sanktyer ti Silo.