Zeremi 9 - Labib An Kreol Seselwa

¹ Si zis mon latet ti en rezervwar delo e mon lizye en sours larm! Mon ti ava kapab plere lizour koman lannwit, pour bann viktim parmi mon pep.

Pa Kapab Viv avek Sa Pep

² Si selman mon ti annan en landrwa dan dezer kot mon ti ava kapab ale, lwen avek mon pep! Zot tou, zot en bann tret ki viv dan adilter.

³ SENYER i deklare: Zot lalang i parey en fles. Mansonz in ranplas laverite dan sa pei. Mon pep i fer sa ki mal enn deryer lot. Zot refize rekonnet mwan koman zot Bondye.

⁴ Sakenn i bezwen mefye son zanmi. Personn napa konfyans dan son frer, parey Zakob, sak frer i en manter. Zot tou, zot dir dimal lo zot prosen.

⁵ Zot tou, zot tronp zot prosen. Personn pa dir laverite. Zot in byen egzers zot lalang pour koz manti. Zanmen zot pou arete.

⁶ Zot fer aksyon vyolan enn deryer lot. Zot koz manti tou lazournen. Zot refize rekonnet mwan koman zot Bondye, SENYER i deklare.

⁷ Pour sa rezon, SENYER liniver i deklare: Mon pou pirifye mon pep parey ou pirifye metal dan dife; mon pou teste li. Ki mon kapab fer ankor avek mon pep?

⁸ Zot lalang i parey en dart anpwazonnen. Zot touzour koz manti. Sakenn i dir dibyen devan son vwazen; me dan son leker, i pe prepar plan pour fer li ditor.

⁹ Bann zans parey, pa mon pou bezwen fer zot rann kont? Pa mon pou bezwen tir mon vanzans lo en tel nasyon?

Senyer I Plere lo Zida ek Zerizalenm

¹⁰ Mon pou lamante lo bann montanny e plere pour bann laplenn, akoz zot in ganny brile. Personn pa pase e nepli annan tapaz bann troupo. Zwazo ek zannimo sovaz in ale; pa reste nanryen.

¹¹ Mon pou fer Zerizalenm vin en ta rin, kot zis zannimo sovaz pou viv. Bann lavil Zida pou vin en dezer kot personn pa pou reste.

¹² Eski i annan en dimoun saz pour eksplike akoz sa pei in ganny devaste, e akoz in vin sek parey en dezer kot personn nepli pase?

¹³ SENYER ti reponn: Sa in arive akoz mon pep in abandonn mon lalwa ki mon ti donn li. I pa'n obei mwan e i pa'n swiv sa ki mon ti demann li.

¹⁴ Zot in prefere reste dan zot lantetman; zot in al ador bann fo bondye Baal, parey zot bann zanset in montre zot.

¹⁵ Alor, ekout byen sa ki mwan, SENYER liniver, Bondye Izrael, mon pou fer: Mon pou donn sa pep en plant anmer pour li manze e delo anpwazonnen pour li bwar.

¹⁶ Mon pou anvoy li annegzil dan en kantite pei diferan ki ni li, ni son zanset pa'n deza antann koze. Mon pou anvoy bann gerye kont li ziska ki mon ava'n detri li konpletman.

Zabitan Zerizalenm I Kriy Osekour

¹⁷ La sa ki SENYER liniver i deklare: Get byen sa ki pe pase. Fer vin bann fanm ki abitye plere e lamante; swazir bann ki pli bon.

¹⁸ Lepep i dir: Dir zot depese pour zot vin plere e lamante pour nou, ziska ki nou lizye ava ranpli avek larm, e nou popyer ava mouye afors plere.

¹⁹ Sa tapaz plere in ganny tande dan Zerizalenm: Nou'n ganny rinen! Nou onte! Nou bezwen kit nou pei. Lennmi in detri nou lakaz.

²⁰ Mon ti dir: Zot bann fanm! Ekout sa ki SENYER i deklare: Ouver zot zorey pour resevwar parol ki sorti dan son labous. Aprann sa kantik avek zot bann fiy sa lamantasyon avek kanmarad.

²¹ Lanmor in mont kot nou par lafnet; in antre dan nou zoli lakaz; i'n pran bann zanfan dan lari, ek bann zennzan dan bann plas piblik.

²² La sa ki SENYER i deklare: Bann kadav in fannen partou, parey ta fimyen dan en plantasyon. Zot parey bann zepi ki'n ganny koupe e ki pa'n ganny rekolte. Napa personn pour ranmase.

²³ La sa ki SENYER i deklare: En dimoun saz pa devre vant son lasazes. Sa enn ki for pa devre vant son lafors. Sa enn ki ris pa devre fer vantar avek son larises.

²⁴ Si en dimoun i oule fer vantar, fer li akoz i ase malen pour konn mwan. Mwan, SENYER, mon azir avek fidelite, lazistis e avek drwatir. Sanmenm sa ki fer mwan plezir. SENYER i deklare.

²⁵ Sa zour pe vini, kan mon pou pini bann dimoun ki'n sirkonsi zis dan zot lekor e ki sorti

²⁶ Lezip, Zida, Edonm, Amonn, Moab e sa bann ki reste dan dezer ki'n raz zot latet. Bann Izraelit i parey: Zot in ganny sirkonsi, me pa zot leker.