Zeremi 44 - Labib An Kreol Seselwa

Senyer I Donn En Mesaz pour bann Izraelit ki Viv Lezip

¹ La mesaz ki SENYER ti donn Zeremi konsernan tou bann Izraelit ki ti pe viv Lezip, dan bann lavil Migdol, Tafanes, Menmfis, e dan pei Patros:

² La sa ki SENYER liniver, Bondye Izrael i deklare: Zot menm, zot temwen tou sa bann maler ki mon'n anvoy lo Zerizalenm e lo lezot lavil dan Zida ki ozordi ankor, zot anrin e napa okenn zabitan.

³ Tousala in arive akoz bann zabitan ti provok mon lakoler par bann aksyon degoutan ki zot ti'n fer. Zot in al ofer sakrifis e ador lezot bondye ki ni zot zanset, ni zot menm, zot pa ti konnen.

⁴ Pourtan, mwan, mon pa'n arete anvoy zot mon bann serviter, bann profet ki ti dir zot pa fer sa bann keksoz degoutan ki mon pa kontan.

⁵ Me zot pa ti ekout mwan, e zot pa'n port okenn atansyon. Zot pa'n renons zot move mannyer fer, e zot in kontinyen ofer bann sakrifis an loner lezot bondye.

⁶ Alor, parey en dife, lavyolans mon lakoler e mon lendinyasyon in bril bann lavil Zida e bann lari dan Zerizalenm. Tou i an rin, tou i zis en dezer ziska ozordi.

⁷ Aprezan, SENYER liniver, Bondye Izrael i demande: Akoz eski zot fer zot menm tou sa kantite ditor? Eski zot oule anmenn destriksyon total lo zonm, fanm, zanfan e pti baba? Eski zot oule ki zot pep i disparet?

⁸ Akoz zot provok mon lakoler par zot bann move aksyon e par bann sakrifis an loner bann bondye dan pei Lezip, kot zot in vin reste? Sa ki zot pe fer, pe detri zot e fer zot vin en legzanp malediksyon ek laont pour tou bann nasyon dan lemonn.

⁹ Eski zot in oubliy bann krim zot bann zanset, bann lerwa Zida, zot bann fanm, zot menm ek zot bann fanm, zot ti komet dan pei Zida e dan bann lari Zerizalenm?

¹⁰ Ziska prezan, personn pa'n eksprim okenn regre, ni lafreyer; personn pa'n swiv mon bann lalwa ek mon bann direktiv ki mon ti donn zot ek zot bann zanset.

¹¹ Pour sa rezon, la sa ki SENYER liniver, Bondye Izrael, i deklare: Mon pou fer maler tonm lo zot e detri Zida.

¹² Tou restan lepep ki ankor vivan dan Zida ki'n deside refizye Lezip, pou ganny detri laba. Zot tou, gran koman pti, zot pou mor Lezip swa par lager, swa par lafanmin. Zot pou antre dan proverb pour donn malediksyon e pour ensilte dimoun.

¹³ Parey mon ti pini bann zabitan Zerizalenm, mon pou osi detri sa bann ki viv Lezip par lager, lafanmin ek lepidemi.

¹⁴ Konmsa, bokou parmi sa bann ki ti ankor vivan dan pei Zida e ki'n al reste Lezip pa pou kapab sove, ni sov zot lavi, sof en pti group refizye.

¹⁵ Tou bann zonm ki ti konnen ki zot bann fanm ti'n ofer sakrifis anver lezot bondye, tou bann fanm ki ti la, e tou lezot ki ti'n vin reste Patros dan pei Lezip, ti reponn Zeremi:

¹⁶ Nou refize ekout mesaz ki ou'n dir sorti kot SENYER.

¹⁷ Nou pou kontinyen fer tou sa ki nou ti'n promet fer. Nou pou ofer bann lofrann lansan e bann lofrann diven an loner larenn lesyel, parey nou'n fer ziska aprezan e parey nou zanset, nou bann lerwa e nou bann sef ti abitye fer dan bann lavil Zida e dan bann lari Zerizalenm. Dan sa lepok, nou ti annan dekwa manze, nou ti pe prospere, nou ti napa okenn traka.

¹⁸ Me depi ki nou'n aret bril lansan e ofer lofrann diven an loner larenn lesyel, nou napa nanryen e nou pe ganny masakre e nou pe mor lafen.

¹⁹ Bann fanm ti azoute: Nou mari ti dakor kan nou ti kwi gato dan laform larenn lesyel, kan nou ti ofer lansan ek bann lofrann diven.

²⁰ Alor Zeremi ti dir avek lepep antye, zonm, avek fanm ki ti'n reponn li,

²¹ “Pa krwar ki SENYER pa'n war, oubyen ki i'n oubliy tou sa bann lansan ki zot, zot zanset, zot lerwa, zot sef e zabitan ti ofer dan bann lavil Zida e dan bann lari Zerizalenm.

²² SENYER ti nepli kapab siport zot bann move aksyon e bann pratik degoutan ki fer onte; pour sa rezon, zot pei in vin en ta debri, konpletman devaste, en size malediksyon, san okenn zabitan. Tou dimoun i konn sa.

²³ La rezon akoz maler in tonm lo zot ozordi: Zot in ofer lansan an loner lezot bondye, zot in rann zot koupab anver SENYER; zot pa'n ekout li, zot pa'n swiv ni son lansennyman, ni son komannman, ni son bann konsey.”

²⁴ Zeremi ti dir ankor avek lepep antye, e avek tou bann fanm: Zot ki sorti Zida e ki pe reste Lezip, ekout sa ki SENYER i deklare.

²⁵ La sa ki, SENYER liniver, Bondye Izrael i deklare: Avek zot fanm, zot in akonpli avek zot lanmen, sa ki zot ti dir avek zot labous, zot pou fer: Nou pou gard nou promes pou bril lansan e ofer diven an loner larenn lesyel. Tre byen alor! Kontinyen gard zot promes e akonpli bann ve ki zot in fer!

²⁶ Alor, zot tou ki sorti Zida e ki pe reste Lezip, ekout byen sa ki SENYER i dir zot: Mon fer serman par mon gran non, SENYER i deklare: Zanmen ankor mon pour permet personn parmi zot ki reste Zida, e partou dan pei Lezip, servi mon non pour dir: Mon fer serman par Senyer BONDYE ki vivan.

²⁷ Mon pou vey lo zot, pa pour zot boner, me pour zot maler. Zot tou ki sorti Zida e ki pe reste Lezip, zot pou ganny masakre oubyen mor par lafen. Personn pa pou sape.

²⁸ Sof en pti group ki pa pou ganny eksterminen, e ki pou kit Lezip pour retourn Zida. Me sa restan dimoun ki sorti Zida e ki'n vin viv dan pei Lezip pou rekonnet lekel parol ki pe ganny realize: Mon parol, oubyen zot parol!

²⁹ La koman mon pou prouv zot: Mwan SENYER, mon deklare ki mon pou azir kont zot isi Lezip e mon pou donn zot en siny. Konmsa, zot pou war ki mon parol kont zot pe realize.

³⁰ La sa ki SENYER i deklare: Parey mon ti livre Sedesyas, lerwa Zida dan lanmen Naboukodonozor, lerwa Babilonn, son lennmi ki ti oule touy li, mon pou livre Hofra, lerwa Lezip dan lanmen bann lennmi ki oule son lanmor.