Zeremi 17 - Labib An Kreol Seselwa

Senyer I Pini Zida pour Son bann Pese

¹ Pese Zida in ganny ekri avek lapwent an fer, ek en dyanman, lo tablet zot leker, lo bann korn dan kwen zot lotel.

² Parey zot koz lo zot zanfan, zot koz lo zot lotel ek bann poto sakre, bann Asera, anba bann pye dibwa ki ranpli ek verdir, lo oter bann kolin.

³ Akoz ou bann pese dan pei antye, ou ki frekant lo bann montanny ek lakanpanny, mon pou donn koman piyaz lager, tou ou larises, tou ou bann trezor ek ou bann landrwa sakre.

⁴ Ou pou bezwen rann sa pei ki mon ti'n donn ou. Mon pou fer ou vin lesklav dan en pei lennmi ki ou pa konn ditou, akoz ou'n fer mon lakoler alimen parey en dife ki pa pou zanmen tennyen.

Vre e Fo Sekirite

⁵ La sa ki SENYER i deklare: Mon modi sa zonm ki met son konfyans dan zonm, ki met son konfyans zis dan zonm, ki rod son lafors dan bann mwayen imen. Son leker i lwen avek SENYER.

⁶ I parey en zarbis dan dezer ki pouse dan en later sek, dan en later vid, ranpli avek disel kot nanryen pa pouse, kot personn pa reste.

⁷ Me mon beni sa zonm ki met son konfyans dan SENYER, e ki kont antyerman lo SENYER.

⁸ I parey en pye dibwa plante obor delo. Son rasin i desann ver larivyer. I pa per kan letan lasaler i vini, son fey i reste touzour ver. En lannen lasesres pa trakas li; i kontinyen donn fri.

⁹ Leker imen i fourb e koronpi. I pa kapab ganny geri. Lekel ki kapab konpran li?

¹⁰ Mwan, SENYER, mon teste sa ki zonm i mazinen; mon egzamin son bann santiman. Mon tret sakenn dapre son mannyer viv, dapre son bann aksyon.

¹¹ Sa enn ki vin ris dan fason malonnet, i parey en poul ki kouv dizef kannar: Dan milye son lavi, son fortin pou kit li, e alafen, i fini parey en fou.

Senyer I Sel Sours Lavi

¹² I annan en tronn glorye lao dan lesyel depi konmansman lemonn. Sa i lanplasman pour nou sanktyer.

¹³ SENYER! Izrael in met son lespwar dan ou. Tou sa bann ki abandonn ou pou onte. Tou sa bann ki pou pran zot distans avek mwan, ki sours lavi, pou disparet parey en non ki'n ganny ekri dan lapousyer.

Zeremi I Demann Led Senyer

¹⁴ SENYER! Zis ou ki kapab geri mwan. Zis ou ki kapab sov mwan. Ou menm ki fer mwan sant ou laglwar.

¹⁵ Dimoun i demann mwan: Oli sa ki SENYER in dir pou arive? Ki son parol i realize.

¹⁶ Me mwan SENYER, zanmen mon'n demann ou anvoy okenn maler lo zot. Mon pa'n zanmen swete ki dezas i tonm lo zot. Ou menm ki konnen tou parol ki'n sorti dan mon labous i devan ou.

¹⁷ Pa fer mwan tranble avek lafreyer. Ou menm mon refiz dan letan maler.

¹⁸ SENYER! Fer onte sa bann ki persekit mwan; me eparny mwan. Fer zot tranble avek lafreyer, me eparny mwan. Fer zour maler tap zot, detri zot konpletman.

Koman Obzerv Zour Saba

¹⁹ La sa ki SENYER ti dir mwan: Zeremi! Al met ou devan gran laport ki bann lerwa Zida i servi pour antre e sorti dan lavil. Apre, al osi devan lezot laport lavil Zerizalenm.

²⁰ Al dir lerwa Zida, tou bann zabitan dan Zida ek tou bann zabitan Zerizalenm ki antre dan lavil par sa bann laport:

²¹ La sa ki SENYER i deklare: Fer byen atansyon, pa transport nanryen zour saba; pa fer antre okenn fardo atraver bann laport Zerizalenm.

²² Zot pa devre zour saba, sorti avek okenn pake. Zot pa devre fer okenn travay zour saba; zot devre rezerv sa zour zis pour mwan, akoz i en zour sakre, parey mon ti ordonn zot zanset.

²³ Me zot pa'n ekoute, zot pa'n ouver zot zorey. Zot in reste dan zot lantetman; zot in refize obei e resevwar okenn leson.

²⁴ Me si zot obei mwan, SENYER i deklare, si zot pa transport okenn pake dan lavil sa zour ki en zour repo; si zot pa fer okenn travay sa zour la,

²⁵ alor, bann lerwa e zot bann zofisye pou antre par bann laport lavil, asiz lo tronn David. Zot ava antre la dan kales e lo seval. Pep Zida ek zabitan Zerizalenm ava akonpanny zot e pou touzour annan zabitan dan sa lavil.

²⁶ Alor dimoun pou vini depi bann lavil Zida e bann vilaz otour Zerizalenm; zot pou sorti dan teritwar Benzamen, dan laplenn, dan kolin e dan Sid Zida. Zot ava anmenn dan tanp SENYER bann sakrifis konplet e bann sakrifis lape, bann lofrann legren ek lansan, ek bann lofrann rekonesans.

²⁷ Me si zot pa ekout mwan, si zot pa obzerv sa zour saba koman en zour sakre, si zot kontinyen pas avek pake dan bann laport Zerizalenm, alor mon pou met dife dan sa bann laport lavil. Sa dife ki pa pou zanmen tennyen, pou detri bann pale dan Zerizalenm.