Zeremi 10 - Labib An Kreol Seselwa

Ladorasyon: Vre e Fo Bondye

¹ Pep Izrael! Ekout sa ki SENYER i dir ou.

² La sa ki SENYER i deklare: Pa aprann sa ki lezot nasyon i pratike Pa per bann fenomenn ki pas dan lesyel parey lezot nasyon.

³ Koutim sa bann nasyon napa valer. Zot koup en pye dibwa dan lafore; e en artizan i travay li avek en sizo.

⁴ Sa i ganny dekore avek larzan ek lor. Avek en marto, i fikse en klou pour li pa branle.

⁵ Sa bann zidol, i parey sa ki zot met dan en plantasyon kokonm pour fer per zwazo. Zot pa kapab koze. Fodre anmenn zot akoz zot pa kapab marse. Napa rezon pour per zot akoz zot pa kapab fer ou dimal, ni okenn dibyen.

⁶ SENYER! Napa personn parey ou. Ou gran e ou non i gran e pwisan.

⁷ Tou dimoun i devre rekonnet ou lotorite, koman lerwa tou bann pep. Ou tousel ki merit ganny sa loner. Parmi tou bann saz omonn, parmi tou bann lerwa, napa ki parey ou.

⁸ Tou sa bann saz, tou sa bann lerwa, zot bet, zot boufon. Kwa ki zot kapab ansenny ou? Zot zis en morso dibwa.

⁹ Zot ganny fabrike par en artizan e ganny dekore par en lorfev avek bann fey annarzan ki'n ganny enporte sorti Tarsis, oubyen avek lor sorti Oufaz. Answit, zot ganny abiye dan bann lenz kouler rouz e mov zot zis bann lobze lar, travay en artizan.

¹⁰ Me SENYER i vreman Bondye; i sa vre Bondye vivan, e lerwa pour touzour. Later i tranble devan son lakoler e bann nasyon i enpwisan.

¹¹ La sa ki ou ava dir sa bann nasyon: Sa bann bondye ki pa'n kre ni lesyel ni later pou ganny detri lo later e zot pou disparet anba lesyel.

Kantik pour Glorifye Bondye

¹² Par son pwisans SENYER in kre later. Par son lasazes i ti kre lemonn e son lentelizans in etal lesyel.

¹³ Kan i fer tande son lavwa, delo i anmase dan lesyel; i fer monte bann gro nyaz depi lorizon; i fer zekler anmenn lapli; i fer divan sorti dan son rezerv.

¹⁴ Zot tro bet e zot pa konpran nanryen ditou. Bann fabrikan zidol i kanmi, akoz sa bann stati ki zot fer i fo; zot napa okenn lavi.

¹⁵ Zot napa okenn valer, zot en travay ridikil. Zour zizman, zot pou ganny detri.

¹⁶ Me Bondye Izrael i pa parey zot. In kre liniver e in swazir Izrael koman son prop pep. SENYER liniver i son non.

Pep Izrael Pou Ganny Anmennen Annegzil

¹⁷ Zerizalenm! Ou bann lennmi in anserkle ou. Ranmas ou pake.

¹⁸ Annefe, la sa ki SENYER i deklare: Mon pou sas ou dan sa pei, e deport ou. Mon pou anserkle zot pour ki personn pa sape.

¹⁹ Lepep ki reste Zerizalenm i kriye: En gran katastrof in tonm lo nou. Blesir ki nou ti krwar nou ti ava kapab andire, pa pou geri.

²⁰ Nou bann latant in ganny detri; bann lakord ki ti tenir zot in kase. Zanmen nou pou revwar nou bann zanfan; zot tou zot in ale. Nou nepli annan personn pour pik nou bann latant e fikse bann rido.

²¹ Nou bann sef i'n azir an fou: Zot pa'n rod konsey avek SENYER. Pour sa rezon, zot pa'n reisi e nou pep in ganny disperse dan tou kote.

²² Ekout sa nouvel: En gran boulversman pe vini sorti dan Nor; i pou transform bann lavil Zida e fer zot vin parey en dezer kot zis zannimo sovaz ki pou reste.

Zeremi I Priy pour Son Pep

²³ SENYER! Mon konnen ki zonm pa met son desten. Napa en dimoun ki kapab kontrol son lavi.

²⁴ Koriz ou pep, SENYER! Me pa tap li tro for. Pa pini li ler ou ankoler, sankwa nou pou ganny detri konpletman.

²⁵ Plito, devers ou lakoler lo sa bann nasyon ki pa ador ou e lo sa bann pep ki pa rekonnet ou. Zot in touy ou pep; zot in detri Izrael konpletman e zot in devaste son pei.