Zenez 7 - Labib An Kreol Seselwa

Noe I Antre dan Lars

¹ SENYER ti dir Noe, “Antre dan lars, ou avek ou fanmir, akoz mon'n remarke ki dan sa zenerasyon zis ou ki fidel anver mwan.

² Pran avek ou, parmi bann zannimo ek zwazo set per ki pir, en mal ek en femel. Parmi bann zannimo ki enpir, pran en per, en mal ek son femel.

³ Pran osi set per parmi bann zwazo ki dan lezer, en mal ek en femel, pour gard zot lespes vivan lo later.

⁴ Dan ankor set zour, mon pou fer lapli tonbe lo later pandan 40 zour e 40 nwit; mon pou fer disparet lo later tou bann et vivan ki mon'n fer.”

⁵ Noe ti fer egzakteman, tou sa ki SENYER ti'n ordonn li.

Deliz

⁶ Noe ti annan 600 an kan deliz ti arive, ler delo ti kouver later.

⁷ Noe ti antre dan lars avek son bann garson, son fanm ek son bann belfiy pour sov deliz.

⁸ Tou bann zannimo, sa ki pir ek sa ki enpir, bann zwazo ek bann pti bebet,

⁹ ti ariv kot Noe, de par de, en mal ek en femel. Zot ti antre dan lars parey Bondye ti'n ordonn Noe.

¹⁰ Set zour plitar, deliz ti kouver later.

¹¹ Lannen ki Noe ti ganny 600 an, disetyenm zour dan dezyenm mwan, tou bann rezervwar delo souteren ti kase e bann lafnet dan lesyel ti ouver gran.

¹² Lapli ti tonm lo later pandan 40 zour ek 40 nwit.

¹³ Sa menm zour, Noe ti antre dan lars avek son trwa garson, Senm, Kanm ek Zafet, son fanm ek bann fanm son trwa garson,

¹⁴ ansanm avek tou zannimo sovaz, dapre zot lespes, bann zannimo domestik, dapre zot lespes, tou bann zwazo dapre zot lespes ek bann pti bebet dapre zot lespes.

¹⁵ Tou kreatir ki ti annan souf lavi, de par de, ti vin kot Noe pour antre dan lars.

¹⁶ Zot ti vini, en mal ek en femel dan sak lespes e antre dan lars parey Bondye ti'n ordonn Noe. Apre sa, SENYER ti ferm laport deryer Noe.

¹⁷ Deliz ti kontinyen pandan 40 zour lo later. Delo ti monte e lars ti flote.

¹⁸ Delo ti kontinyen mont an gran lo later e lars ti drive.

¹⁹ Nivo delo ti kontinyen monte ziska ki i ti kouver bann montanny pli o.

²⁰ Delo ti mont anviron set met par lao latet pli o montanny.

²¹ Tou sa ki ti vivan lo later ti mor: Zwazo, zannimo, bann pti bebet ek tou dimoun.

²² Tou kreatir lo later ferm, ki ti annan souf lavi, ti mor.

²³ SENYER ti detri tou kreatir lo later: Depi dimoun ziska bann zannimo, zannimo domestik ek bann pti bebet. Menm bann zwazo dan lezer ti ganny detri. Ti reste zis Noe avek bann dimoun ki ti avek li dan lars.

²⁴ Gro delo ti kontinyen reste lo later pandan 150 zour.