Zenez 32 - Labib An Kreol Seselwa

Zakob I Prepare pour Rankontre Ezai

¹ Zakob ti kontiny son semen e bann mesaze Bondye ti vin rankontre li.

² Kan Zakob ti rankontre zot, i ti dir, “Sa se larme Bondye!” Alor, i ti apel sa landrwa Mahanaim.

³ Zakob ti anvoy son bann mesaze par devan li kot son frer Ezai, dan pei Seir, pei Edonm,

⁴ avek sa mesaz, “Dir avek mon senyer Ezai: Ou serviter Zakob i dir, Mon'n al kot Laban e mon'n reste ziska aprezan.

⁵ Mon annan bourik, bef, troupo, serviter, ek servant. Mon'n anvoy bann mesaze pour ou aksepte mwan.”

⁶ Bann mesaze ti retourn kot Zakob. Zot ti dir li, “Nou sorti kot ou frer Ezai. I pe vin zwenn ou avek 400 zonm.”

⁷ Zakob ti per e enkyet. I ti diviz bann dimoun ki ti avek li. I ti osi diviz bann troupo e bann samo an de group.

⁸ I ti mazinen: Si Ezai i detri en group, sa lot group ki reste ava sove.

⁹ Zakob ti dir, “Bondye mon papa, Abrahanm e Bondye mon papa, Izaak! Ou, SENYER ki ti dir mwan: Retourn dan ou pei kot ou fanmir, e mon pou fer ou dibyen.

¹⁰ Mon pa vo sa fidelite e tou sa lwayote ki ou'n montre pour ou serviter. Mon ti annan zis mon baton kan mon ti travers larivyer Zourden. La aprezan, mon retourn avek de group.

¹¹ Delivre mwan, mon sipliy ou, dan lanmen mon frer Ezai, akoz mon per li. Mon per ki vin atak mwan, e touy bann manman avek zot zanfan.

¹² Me ou SENYER, ou'n dir: Mon pou fer ou dibyen, e mon pou fer ou desandans vin parey disab lo bor lanmer ki pa kapab ganny konte.”

¹³ Alor, i ti pas lannwit la. Parmi tou sa ki i ti posede, i ti swazir en kado pour son frer Ezai:

¹⁴ 200 femel kabri ek 20 kabri mal, 200 femel mouton ek 20 mouton mal,

¹⁵ 30 femel samo ek zot piti ki pe tete, 40 bef, 10 toro, 20 femel bourik ek 10 bourik mal.

¹⁶ I ti donn zot avek son bann serviter. I ti dir zot, “Pas devan mwan e gard en lespas ant sak group zannimo.”

¹⁷ I ti dir avek premye serviter ki ti devan: Kan Ezai, mon frer i zwenn ou e demande: Lekel ou? Kote ou pe ale? Pour ki sa troupo ki pe mars devan ou?

¹⁸ Ou ava dir li: Pour ou serviter Zakob. Tousala i en kado pour mon senyer Ezai. Zakob pe vini par deryer.

¹⁹ I ti dir dezyenm, trwazyenm serviter e avek tou bann ki ti dan bann group: Zot ava dir menm keksoz Ezai kan zot rankontre li.

²⁰ Zot ava dir li: Ou serviter Zakob, pe vini deryer nou. Annefe, Zakob ti mazinen: Mon ava kapab anbet li avek bann kado e apre sa, mon ava war li fas a fas. Kekfwa i ava aksepte mwan.

²¹ Alor, bann troupo ti pas par devan. Sa swar i ti reste dan kan.

Zakob I Lit kont Bondye

²² Sa menm swar, Zakob ti leve e pran son de fanm, son de servant, ek son onz zanfan, e travers larivyer Yabok.

²³ I ti pran zot e fer zot travers larivyer, ansanm avek tou sa ki i ti annan.

²⁴ Zakob ti reste tousel. En zonm ti lite avek li ziska granmaten.

²⁵ Kan sa zonm ti war ki i pa ti kapab bat Zakob, i ti tap li lo son laans, e son laans ti debwete.

²⁶ Apre, sa zonm ti dir, “Les mwan ale, akoz lizour pe fer.” Me Zakob ti dir, “Mon pa pou les ou ale, avan ou pa beni mwan.”

²⁷ Alor, i ti dir, “Ki mannyer ou apele?” I ti reponn, “Zakob.”

²⁸ I ti dir li, “Ou pou nepli apel Zakob, me Izrael, akoz ou'n lite kont Bondye e kont zonm, e ou'n ganny laviktwar.”

²⁹ Zakob ti demann li, “Dir mwan ou non.” I ti dir, “Akoz ou demann mwan mon non?” Alor, i ti beni Zakob.

³⁰ Zakob ti apel sa landrwa Penouel, savedir fas a fas avek Bondye. I ti dir, “Mon'n war SENYER fas a fas, e mon pa'n mor.”

³¹ Soley ti pe leve kan i ti pas Penouel; i ti pe bwete akoz son laans.

³² Ziska aprezan, bann Izraelit pa manz sa morso lavyann ki lo laans, akoz Bondye ti tous sa misk lo laans Zakob.