Zenez 2 - Labib An Kreol Seselwa

¹ Alor, lesyel, later ek tou sa ki ti ladan ti'n fini ganny kree.

² Setyenm zour, Bondye ti'n fini tou travay ki i ti'n fer. Apre tou travay ki i ti'n fer, i ti repoze.

³ Bondye ti beni setyenm zour, e i ti fer sa zour en zour sakre, akoz sa zour, i ti repoze apre ki i ti'n fini tou travay kreasyon.

Dezyenm Listwar Kreasyon: Zarden Edenn

⁴ Sa i lorizin lesyel ek later kan zot ti ganny kree. Kan SENYER Bondye ti kree later ek lesyel,

⁵ ti napa okenn vezetasyon lo later. Okenn plant pa ti ankor pouse e okenn lagrenn pa ti ankor zermen. SENYER Bondye pa ti ankor anvoy lapli lo later e ti napa dimoun pour kiltiv later.

⁶ Me ti annan sours delo ki ti monte sorti dan later pour aroz tou sirfas later.

⁷ SENYER Bondye ti form zonm avek lapousyer later. I ti soufle en souf lavi dan son nennen e i ti vin en et vivan.

⁸ Apre, SENYER Bondye ti plant en zarden dan Edenn, dan kote Les, e la, i ti plas sa zonm ki i ti'n formen.

⁹ SENYER Bondye ti fer pouse tou kalite zoli pye dibwa; zot fri ti bon pour manze. Dan milye zarden, i ti plas pye dibwa ki donn lavi e pye dibwa ki donn konnesans lebyen ek lemal.

¹⁰ En larivyer ti sorti Edenn pour aroz sa zarden, e i ti diviz an kat lebra.

¹¹ Premye larivyer ki ti apel Pisonn ti koul otour pei Havila, kot ti annan lor.

¹² Lor sa pei, ti en bon kalite; ti osi annan bann plant parfimen ek pyer presyez.

¹³ Dezyenm larivyer ki apel Gihonn, ti koul otour pei Kous.

¹⁴ Trwazyenm larivyer ti apel Tig, ki ti koul dan kote Les Asiri. Katriyenm larivyer ti apel Efrat.

¹⁵ SENYER Bondye ti pran sa zonm e met li dan Zarden Edenn pour kiltiv li e pran swen avek li.

¹⁶ SENYER Bondye ti donn zonm sa lord: Ou kapab manz tou fri ki dan zarden;

¹⁷ me fodre pa ki ou manz fri sa pye ki donn konnesans lebyen ek lemal, akoz zour ki ou manz sa fri, ou pou mor.

¹⁸ SENYER Bondye ti dir: I pa bon pour zonm reste tousel. Mon pou fer en led ki pou byen dakor avek li koman son konpannyon.

¹⁹ Alor, avek later, SENYER Bondye ti form tou bann zannimo ek tou zwazo. I ti anmenn zot kot zonm pour li donn zot en non. Konmsa, tou et vivan ava port non ki zonm ava donn li.

²⁰ Zonm ti donn non tou bann zannimo domestik, bann zannimo sovaz ek bann zwazo. Me i pa ti trouv en led ki ti dakor avek li pour son konpanny.

²¹ Alor, SENYER Bondye ti fer zonm tonm dan en profon sonmey e letan i ti pe dormi, i ti tir enn son kot e referm laser.

²² Avek sa kot, SENYER Bondye ti form en fanm, e i ti anmenn li kot sa zonm.

²³ Sa zonm ti dir: La aprezan sa enn ki mon lezo e mon laser. I pou apel fanm, akoz i'n ganny tire avek zonm.

²⁴ Pour sa rezon, en zonm i kit son papa ek son manman pour atas li avek son fanm, e tou le de zot vin en sel laser.

²⁵ Sa zonm ek sa fanm ti touni, san ki zot ti onte.