Zenez 11 - Labib An Kreol Seselwa

Tour Babel

¹ Dan sa lepok, tou dimoun lo later antye ti koz en sel langaz avek menm mo.

² Anmezir ki dimoun ti deplase sorti dan Les, zot ti etabli zot dan en gran laplenn dan Mezopotami.

³ Zot ti dir ant zot: Annou fer bann brik kwi dan four. Alor, zot ti servi brik koman ros, e goudron koman mortye.

⁴ Apre zot ti dir: Annou konstri en lavil avek en tour ki son latet ava tous lesyel. Konmsa, nou ava vin renonmen e nou pa ava ganny disperse partou lo later.

⁵ SENYER ti desann pour war sa lavil ek sa tour ki bann imen ti'n konstri.

⁶ SENYER ti dir: Alor, zot in form en sel pep e zot annan en sel langaz! Sa i zis konmansman sa ki zot pou fer; pou napa okenn proze ki pou enposib pour zot.

⁷ Annou desann e brouy zot langaz pour zot pa konpran kanmarad.

⁸ Depi sa zour, SENYER ti dispers zonm partou lo later e zot ti aret konstri sa lavil.

⁹ Sa lavil ti apel Babel akoz se la ki SENYER ti brouy tou langaz lo later. La ki SENYER ti dispers zonm partou lo later.

Desandans Senm

¹⁰ La lalis desandans Senm 2 an apre deliz: Senm ti annan 100 an kan i ti ganny en garson, Arpaksad.

¹¹ Apre nesans Arpaksad, Senm ti viv ankor 500 an. I ti ganny ankor lezot garson ek fiy.

¹² Arpaksad ti annan 35 an kan i ti ganny en garson, Sela.

¹³ Apre nesans Sela, Arpaksad ti viv ankor 403 an. I ti ganny ankor lezot garson ek fiy.

¹⁴ Sela ti annan 30 an kan i ti ganny en garson, Heber.

¹⁵ Apre nesans Heber, Sela ti viv ankor 403 an. I ti ganny ankor lezot garson ek fiy.

¹⁶ Heber ti annan 34 an kan i ti ganny en garson, Peleg.

¹⁷ Apre nesans Peleg, Heber ti viv ankor 430 an. I ti ganny ankor lezot garson ek fiy.

¹⁸ Peleg ti annan 30 an kan i ti ganny en garson, Reou.

¹⁹ Apre nesans Reou, Peleg ti viv ankor 209 an. I ti ganny ankor lezot garson ek fiy.

²⁰ Reou ti annan 32 an kan i ti ganny en garson, Seroug.

²¹ Apre nesans Seroug, Reou ti viv ankor 207 an. I ti ganny ankor lezot garson ek fiy.

²² Seroug ti'n ganny 30 an kan i ti ganny en garson, Nahor.

²³ Apre nesans Nahor, Seroug ti viv ankor 200 an. I ti ganny ankor lezot garson ek fiy.

²⁴ Nahor ti'n ganny 29 an kan i ti ganny en garson, Tera.

²⁵ Apre nesans Tera, Nahor ti viv ankor 119 an. I ti ganny ankor lezot garson ek fiy.

²⁶ Tera ti annan 70 an; i ti ganny trwa garson, Abranm, Nahor ek Harann.

Desandans Tera

²⁷ La lalis bann desandan Tera: Tera ti papa Abranm, Nahor ek Harann. Harann ti papa Lot.

²⁸ Harann ti mor pandan ki son papa Tera, ti ankor vivan dan Our, pei bann Kaldeen, kot i ti ne.

²⁹ Abranm ti marye avek Sarai e Nahor ti marye avek Milka, fiy Harann ki ti osi papa Yiska.

³⁰ Sarai ti steril; i ti napa zanfan.

³¹ Tera ti pran son garson Abranm, son pti zanfan Lot, garson Harann, son belfiy Sarai, fanm Abranm. Ansanm, zot ti kit Our, dan pei bann Kaldeen, pour al Kanaan. Zot ti ariv ziska Harann kot zot ti etabli zot.

³² Tera ti mor la, Harann, aze 205 an.