Zakari 9 - Labib An Kreol Seselwa

Zizman lo bann Nasyon Vwazen

¹ En mesaz sorti kot Senyer: Parol SENYER kont rezyon Hadrak pou reste lo Damas. Annefe, parey bann tribi Izrael, limanite i pour SENYER.

² Hamat osi, ki pros avek Hadrak, Tir ek Sidon avek tou son lasazes.

³ Tir in konstri en miray fortifikasyon. In anmas en ta larzan, parey lapousyer e lor parey labou dan semen.

⁴ Me aprezan, SENYER pou pran tou sa ki i annan. I pou zet son larises dan lanmer; lavil pou ganny devore par dife.

⁵ Ler Askelonn pou war sa, i pou per. Gaza osi pou tranble dan lafreyer; Ekronn osi, akoz i pa ganny sipor ki i pe espere. Lerwa dan Gaza pou ganny touye. Personn pa pou vin reste Askelonn.

⁶ En pep melanze pou enstal li dan Asdod. Mon pou detri lorgey bann Filisten.

⁷ Mon pou tir disan dan son labous e restan manze degoutan dan son ledan. Alor, li osi, i pou fer parti sa restan pep nou Bondye; i pou annan son plas dan tribi Zida. Zabitan Ekronn pou vin parey bann Zebizit.

⁸ Mon pou kanp a kote mon lakaz koman en gardyen, pour ki personn pa ale vini. Okenn opreser pa pou pas kot li akoz aprezan, mon pe vey avek mon prop lizye.

Prosen Lerwa

⁹ Fiy Siyon! Danse avek lazwa. Fiy Zerizalenm! Kriy byen for! Ou lerwa pe vin kot ou! I pe vin an triyonf e viktorye; i pe vini koman en dimoun senp, lo en bourik, en pti bourik, piti en femel bourik.

¹⁰ I pou detri kales lager dan Efraim e seval lager dan Zerizalenm. Bann fles lager pou ganny detri e i pou proklanm lape pour bann nasyon. Son pouvwar pou al depi en kote lanmer ziska lot, depi larivyer Efrat ziska dan bout later.

Liberasyon Bann Kaptif

¹¹ Ou osi, akoz lalyans avek ou ki mon'n sele par disan, mon pou liber ou bann prizonnyen ki dan lafos kot napa delo.

¹² Prizonnyen ki annan ankor lespwar! Retourn dan ou fortifikasyon. Ozordi mon deklare: Mon pou double ou rekonpans.

¹³ Zida ki pou redi mon lark; Efraim ki pou tir mon fles. Mon pou eksit bann zanfan Siyon kont bann zanfan ki reste Lagres. Mon pou fer ou vin parey lepe en vayan gerye.

¹⁴ Apre sa, SENYER pou aparet par lao zot e son fles pou sorti parey zekler. Senyer BONDYE pou soufle tronpet. I pou avanse dan tanpet sorti dan Sid.

¹⁵ SENYER liniver pou protez zot. Zot ava detri e kraz bann ros ki servi dan fles. Zot ava bwar zot disan konmsi diven. Zot ava plen parey lakoup, e kouver bann kwen lotel.

¹⁶ Sa zour, SENYER zot Bondye pou sov son pep, akoz zot fer parti son troupo. Parey bann bizou dan en kouronn, zot ava briye lo sa later.

¹⁷ Zot pou vreman ere! Zot pou vreman zoli! Dible ava donn lafors bann zennzan e diven nouvo bann zenn fiy.