Zakari 7 - Labib An Kreol Seselwa

Senyer I Kondann Zenn ki pa Senser

¹ Dan katriyenm lannen renny lerwa Dariis, SENYER ti koz avek Zakari. Sa ti dan katriyenm zour, nevyenm mwan ki apel Kislev.

² Bann zabitan Betel ti'n anvoy Sareser avek Regenm-melek ek zot bann zonm pour esey kalme SENYER.

³ Avek bann pret ki servi dan tanp SENYER liniver e avek bann profet, zot ti poz sa kestyon: Eski mon bezwen kontinyen plere e fer en zenn dan senkyenm mwan, parey mon'n fer pandan plizyer lannen?

⁴ Alor, SENYER liniver ti koz avek mwan. I ti dir mwan:

⁵ Dir avek lepep pei antye e avek bann pret. Kan zot ti fer en zenn, kan zot ti plere lo senkyenm ek setyenm mwan pandan sa 70 an, eski pour mwan ki zot ti pe fer sa zenn?

⁶ Kan zot ti manze e bwar, pa zot ti pe manze e bwar pour zot prop plezir?

⁷ Pa sanmenm sa mesaz ki SENYER ti fer konnen par lentermedyer son bann ansyen profet. Dan sa letan bann zabitan Zerizalenm ti dan lape e latrankilite avek bann lavil dan zalantour, e Negev ek Sefela ti annan zabitan.

Legzil I Rezilta Dezobeisans

⁸ SENYER ti koz avek Zakari. I ti dir li:

⁹ La sa ki SENYER liniver i deklare: Rann bann vre zizman; pratik labonte ek konpasyon antre zot.

¹⁰ Pa eksplwat bann vev, bann orfelen, bann etranze oubyen bann pov. Pa mazin fer ditor kanmarad.

¹¹ Me zot ti refize ekoute. Zot ti tourn ledo e bous zot zorey pour zot pa tande.

¹² Zot ti andirsi zot leker parey granit, pour zot pa ekout lalwa e bann parol ki SENYER liniver ti anvoye par son souf, par lentermedyer bann ansyen profet. Sa ti fer SENYER liniver pran en gran lakoler.

¹³ La sa ki SENYER liniver i deklare: Parey zot pa ti ekout mwan kan mon ti apel zot, mwan osi, mon pou refize reponn zot kan zot ava apel mwan.

¹⁴ Mon'n dispers zot parmi bann nasyon ki zot pa ti konnen. Pei ki zot ti'n kit deryer, ti ganny devaste; personn pa ti pas par la. En pei kot ti gou viv, ti'n vin en dezer.