Romen 9 - Labib An Kreol Seselwa

Bondye ek Son Pep

¹ Ini avek Kris, mon pe dir laverite; mon pa pe koz manti. Mon konsyans, gide par Lespri Sen i rann temwannyaz avek mwan.

² Wi, mon dan en gran tristes e mon annan en douler kontinyel dan mon leker.

³ Mon ti ava swete ki mon ganny modi par Bondye e separe avek Kris, pour dibyen mon bann frer, mon prop ras.

⁴ Zot fer parti pep Izrael: Bondye in fer zot vin son bann zanfan. In akord zot prezans son mazeste, bann lalyans, Lalwa, vre ladorasyon, bann promes.

⁵ Zot desandan bann patriars, e Kris, koman en imen, i fer parti zot pep; i par lao tou. Bondye ava ganny loue pour touzour. Amenn.

⁶ Mon pa pe dir ki promes Bondye pa'n reisi. Annefe, pa tou desandan pep Izrael ki vre pep Izrael,

⁷ akoz pa tou desandan Abrahanm ki son zanfan. Annefe, Bondye ti dir Abrahanm, “Par Izaak ki ou pou ganny en desandan.”

⁸ Sa i vedir: Pa tou bann zanfan natirel Abrahanm ki zanfan Bondye, me zis bann zanfan ki dapre promes Bondye, ki ganny konsidere koman vre desandan Abrahanm.

⁹ Annefe, la koman Bondye in eksprim son promes: Ver sa menm lepok, mon pou retournen e Sara ava ganny en garson.

¹⁰ Sa pa tou. I annan osi Rebeka ki ti ganny de zanfan pour en sel zonm: Izaak, nou zanset.

¹¹ Avan menm ki sa de zanfan ti ne e fer okenn keksoz bon oubyen move, Bondye dan son plan, pa ti swazir dapre aksyon, me dapre sa ki i ti oule swazir.

¹² Bondye ti dir avek Rebeka,

¹³ “Lene pou servi sa enn ki pli zenn. Parey Lekritir i deklare: Mon'n kontan Zakob, e mon'n ay Ezai.”

¹⁴ Alor eski nou pou dir ki Bondye i enzis? Pa ditou!

¹⁵ Annefe, i ti dir avek Moiz: Mon pou pran pitye pour ki mon oule pran pitye. Mon pou annan konpasyon pour sa enn ki mon oule annan konpasyon.

¹⁶ Alor, sa pa depann lo sa ki zonm i oule, ni lo son zefor, me zis lo Bondye ki pran pitye.

¹⁷ Dan Lekritir, Bondye i dir avek Faraon: Mon'n etabli ou koman lerwa pour montre par ou, mon pwisans, pour fer mon non ganny konnen partou lo later.

¹⁸ Ensi, Bondye i pran pitye pour ki i oule, e i rann antete sa enn ki i oule.

Lakoler ek Konpasyon Bondye

¹⁹ Petet i annan ki ava dir mwan: Si i konmsa, pour ki rezon Bondye i fer nou ankor bann repros? Annefe, lekel ki kapab reziste son lavolonte?

²⁰ Me ki ou ete ou, zonm, pour ou kontredir Bondye? Eski en po later i kapab demann avek son fabrikan: Akoz ou'n fer mwan konmsa?

²¹ Eski en potye napa drwa fer sa ki i oule avek son later, e avek menm lapat fabrik en vaz presye e en vaz ordiner?

²² Alor, Bondye in oule montre son lakoler e fer konnen son pwisans. Pourtan, in siport avek en gran pasyans bann ki merit son lakoler e ki ti pare pour destriksyon.

²³ Me i'n osi oule montre larises son mazeste pour bann anver ki i'n annan pitye, bann ki i'n prepare davans pour partisip dan son laglwar.

²⁴ Sa i konsern nou osi ki i'n swazir, pa zis parmi bann Zwif, me osi parmi lezot nasyon.

²⁵ La sa ki profet Oze i deklare: Bann ki pa ti mon pep, mon pou apel zot: Mon pep. Nasyon ki mon pa ti kontan, mon pou apel zot: Mon Byenneme.

²⁶ La kot dimoun ti dir: Zot pa mon pep, zot pou ganny apele: Bann zanfan Bondye vivan.

²⁷ Ezai ti predir o size pep Izrael: Menm si pep Izrael i vin nonbre koman gren disab lo bor lanmer, zis en pti restan ki pou ganny sove.

²⁸ Annefe, parol ki Senyer in dir, pou ganny akonpli konpletman e san tarde lo later.

²⁹ Parey Ezai ti'n dir oparavan: Si Senyer Toupwisan pa ti'n donn nou en desandans, nou ti pou vin parey Sodonm, nou ti pou resanble Gomor.

Pol I Priy pour Izrael

³⁰ Alor, ki nou pou dir? La sa ki nou pou dir: Bann non-Zwif ki pa ti pe rod vin zis devan Bondye, zot in vin zis devan li, me par lafwa.

³¹ Me pep Izrael ki ti pe rod vin zis devan Bondye gras a Lalwa, pa'n reisi akonpli sa Lalwa.

³² Akoz sa? Akoz zot pa ti rode pour fer plezir Bondye par lafwa. Zot ti krwar sa ti posib gras a zot bann aksyon. Zot in tonbe akoz zot in ganny konnyen avek sa ros ki fer tonbe.

³³ Annefe, Lekritir i dir: La mon plas dan Siyon, en ros ki fer dimoun tonbe. En ros ki fer zot tonbe. Sa enn ki krwar dan li pa pou dezapwente.