Romen 5 - Labib An Kreol Seselwa

Zistifye, Rekonsilye e Sove

¹ Ensi, aprezan ki nou'n ganny zistifye par nou lafwa, nou anpe avek Bondye par nou Senyer Zezi-Kri.

² Gras a Zezi, nou kapab, par lafwa, ganny lagras Bondye, dan ki nou annan lavi. Sa ki fer nou fyer, se lespwar pour ganny en par dan mazeste Bondye.

³ Anplis ki sa, nou rezoui osi menm dan nou bann soufrans, akoz nou konnen ki lasoufrans i prodwi lapasyans;

⁴ lapasyans i prodwi fidelite malgre leprev, e fidelite i prodwi lesperans.

⁵ Sa lesperans pa tronp nou, akoz lanmour Bondye in ganny deverse dan nou leker par Lespri Sen ki Bondye in donn nou.

⁶ Annefe, kan nou ti ankor san okenn lafors, Kris dan letan fikse, ti mor pour bann peser.

⁷ Apenn si nou pou aksepte mor pour en dimoun ki zis. Petet ki nou ti ava annan kouraz mor pour en bon dimoun.

⁸ Me la koman Bondye in prouve ki i kontan nou: Kris in mor pour nou kan nou ti ankor peser.

⁹ Par son sakrifis, in rann nou zis devan Bondye. A pli fort rezon, i pou sov nou aprezan devan lakoler Bondye.

¹⁰ Kan nou ti ankor lennmi Bondye, nou ti ganny rekonsilye avek li par lanmor son Garson. A pli fort rezon, aprezan ki nou'n rekonsilye avek li, nou pou ganny sove par lavi son Garson.

¹¹ Sa pa tou: Nou fyer dan Bondye akoz nou Senyer Zezi-Kri, ki'n rekonsilye nou avek Bondye.

Adan ek Zezi-Kri

¹² Pese in antre dan lemonn akoz en sel zonm: Adan. Pese in anmenn lanmor. E akoz nou tou nou'n komet pese, lanmor in tous tou bann et imen.

¹³ Pese ti egziste dan lemonn avan ki Bondye ti donn Lalwa avek Moiz. Me akoz pa ti ankor annan lalwa, pese pa ti konte.

¹⁴ Pourtan, depi Adan ziska Moiz, lanmor ti domin lo tou zonm, menm bann ki pa'n komet menm pese parey Adan ki ti dezobei lord Bondye.

¹⁵ Me nou pa kapab konpar don gratwi ki Bondye i fer, avek fot Adan. I vre ki bokou dimoun in mor akoz lafot en sel zonm. Me don gratwi ki Bondye in akord lo en gran nonm dimoun par en sel zonm, Zezi-Kri, i pli enportan ankor.

¹⁶ La ankor, rezilta don Bondye i diferan avek pese en sel zonm: Zizman provoke par lafot en sel zonm, ti anmenn kondannasyon, tandis ki don gratwi akorde apre bokou fot, ti anmenn zistifikasyon total.

¹⁷ I vre ki akoz pese en sel dimoun, akoz sa sel zonm, lanmor in pran pouvwar. Me, par Zezi-Kri li tousel, nou ganny plis ankor: Tou dimoun ki resevwar lagras Bondye annabondans ek don gratwi son lazistis, pou viv e rennyen gras a Zezi-Kri.

¹⁸ Ensi, pese en sel zonm: Adan, in antrenn kondannasyon tou dimoun. Demenm, aksyon zis en sel zonm: Zezi-Kri, in liber tou dimoun dan zizman e fer zot viv.

¹⁹ Annefe, par dezobeisans en sel zonm, en kantite dimoun in tonm dan pese. Demenm, par lobeisans en sel zonm, en kantite dimoun in vin zis devan Bondye.

²⁰ Lalwa in vini e pese in ogmante. Me la kot pese in ogmante, lagras Bondye in ogmant plis ankor.

²¹ Ensi, pese in rennyen par son pouvwar lanmor. Demenm, lagras i renny par lazistis pour lavi eternel par Zezi-Kri nou Senyer.