Romen 15 - Labib An Kreol Seselwa

Fer Plezir Lezot

¹ Nou ki for, nou devre siport febles bann ki feb, e non pa rod nou prop plezir.

² Sakenn nou i devre esey fer plezir son prosen, pour rann li pli for dan lafwa.

³ Kris pa ti fer sa ki fer li plezir, me parey Lekritir i deklare: Lensilt bann ki ensilte ou, in tonm lo mwan.

⁴ Tou sa ki'n ganny ekri dan lepase in ganny ekri pour enstrir nou, pour ki par perseverans ek lankourazman ki Lekritir i donnen, nou posed lesperans.

⁵ Bondye ki donn peseverans ek lankourazman, ava rann zot byen dakor ant zot, an swivan legzanp Zezi-Kri.

⁶ Konmsa, zot tou ansanm, avek en sel lavwa, zot ava rann glwar Bondye, Papa nou Senyer Zezi-Kri.

Bonn Nouvel pour Tou bann Pep

⁷ Pour sa rezon, mon demann zot resevwar kanmarad parey Kris in resevwar zot, pour laglwar Bondye.

⁸ Annefe, mon dir zot ki Kris in fer li serviter bann Zwif pour akonplir bann promes ki Bondye i'n fer avek zot bann zanset, bann patriars. Ensi, in montre ki Bondye i fidel.

⁹ Konmsa menm ki bann non-Zwif, zot osi, zot in kapab rann glwar Bondye pour son labonte, parey Lekritir i deklare: Pour sa rezon, mon pou loue ou parmi bann nasyon. Mon pou sant an loner ou non.

¹⁰ Lekritir i osi deklare: Bann nasyon! Rezoui zot, avek pep Senyer.

¹¹ E ankor: Tou bann nasyon! Loue Senyer. Tou bann pep! Loue li.

¹² Ezai i osi dir: Desandan Zese pou aparet. I pou leve pour li gouvern bann nasyon. Bann nasyon pou met zot lesperans dan li.

¹³ Bondye, ki donn lesperans, ava ranpli zot avek lazwa ek lape parfe dan lafwa. I ava rann zot ris avek lesperans, par pwisans Lespri Sen.

Bann Aktivite Pol

¹⁴ Mon bann frer ek ser! Personnelman, mon sir ki zot ranpli avek labonte, ki zot annan tou konnesans e ki zot kapab donn konsey kanmarad.

¹⁵ Pourtan, mon'n ekri zot avek en pe lodas dan plizyer pasaz mon let, pour revey zot souvenir. Sa i akoz lagras ki Bondye in akord mwan,

¹⁶ pour fer mwan vin serviter Zezi-Kri pour bann pep ki non-Zwif. Mon pe fer en servis sakre, anonsan Bonn Nouvel Bondye, pour ki bann non-Zwif i vin en lofrann agreab pour Bondye, konsakre par Lespri Sen.

¹⁷ Mon annan rezon fyer mon travay pour Bondye, ini avek Zezi-Kri.

¹⁸ Annefe, si mon oze dir keksoz, se akoz Kris in realiz sa bann keksoz atraver mwan pour fer bann non-Zwif obei Bondye. In fer sa par bann parol e par bann aksyon,

¹⁹ par pwisans bann siny ek bann mirak, par pwisans Lespri Bondye. Mon'n alor anons plennman Bonn Nouvel konsernan Kris, partou, depi Zerizalenm, ziska rezyon Iliri.

²⁰ Mon'n pran li koman en loner pour mwan anons Levanzil spesyalman dan bann landrwa kot non Kris pa'n ankor ganny mansyonnen, pour mwan pa konstri lo fondasyon poze par lezot.

²¹ Me mon'n fer parey Lekritir i deklare: Bann avek ki mesaz pa'n ganny anonse, pou war. E bann ki pa'n antann koz lo li, pou konpran.

Proze Pol pour Vizit Ronm

²² Pour sa rezon ki mon'n souvan ganny anpese vin war zot.

²³ Me aprezan, mon'n fini mon travay dan sa rezyon. Depi plizyer lannen mon anvi vizit zot,

²⁴ e mon anvi fer li kan mon pou al vizit Lespany. Mon espere war zot an pasan, pour zot ed mwan al dan sa pei, apre ki mon ava'n pas en pti pe letan avek zot.

²⁵ Me pour lemoman, mon pe al Zerizalenm pour rann servis bann krwayan ki laba.

²⁶ Annefe, bann krwayan dan Masedwann ek Lagres in kontan fer en souskripsyon pour bann pov anver kominote ki Zerizalenm.

²⁷ Zot in deside fer sa par zot menm. Me an realite, se en det ki zot pe pey zot bann frer Zerizalenm. Annefe, bann non-Zwif in partisip dan benefis spirityel bann ki'n konverti. Aprezan, i zot devwar pour rann servis lo kote materyel.

²⁸ Kan mon ava'n fini fer sa, e mon ava'n remet zot larzan souskripsyon, mon pou al Lespany an pasan kot zot.

²⁹ Mon konnen ki an arivan kot zot, mon pou ariv ranpli avek benediksyon Kris.

³⁰ Mon demann zot, frer ek ser, par nou Senyer Zezi-Kri e par lanmour Lespri Sen: Konbat ansanm avek mwan an adresan lapriyer ver Bondye pour mwan.

³¹ Priye pour ki mon ganny delivre avek bann non-krwayan dan Zide, e ki bann don ki mon pe anmenn Zerizalenm i ganny aksepte par bann krwayan.

³² Konmsa, si Bondye i oule, mon ava kapab ariv kot zot dan lazwa, e mon ava pran en pe repo kot zot.

³³ Mon demande ki Bondye ki donn lape, ava avek zot tou. Amenn.