Romen 14 - Labib An Kreol Seselwa

Pa Ziz ou Frer

¹ Akey sa enn ki feb dan lafwa, san kritik son lopinyon.

² Serten i krwar ki i kapab manz nenport kwa, tandis ki en lot ki feb, i manz zis legim.

³ Sa enn ki manze, pa devre mepriz sa enn ki pa manze, e sa enn ki pa manze pa devre kritik sa enn ki manze, akoz li osi, Bondye in aksepte li.

⁴ Ki ou ete pour ziz serviter en lot? Si i tenir ferm, oubyen si i tonbe, sa i zafer son met. I ava tenir ferm, akoz Senyer i annan pouvwar pour anpes li tonbe.

⁵ Serten i konsider en zour pli enportan ki en lot, tandis ki en lot i konsider tou bann zour parey. Sak dimoun i devre annan konviksyon dan sa ki i panse.

⁶ Sa enn ki donn lenportans tel zour, i fer li pour onor Senyer. Sa enn ki manz tou keksoz, i manze pour onor Senyer, e i remersye Bondye. Sa enn ki pa manze, se pour Senyer ki i pa manze; li osi, i remersye Bondye.

⁷ Annefe, personn pa viv pour li menm, e personn pa mor pour li menm.

⁸ Si nou viv, nou viv pour Senyer; si nou mor, nou mor pour Senyer. Alor, swa ki nou viv, swa ki nou mor, nou apartenir pour Senyer.

⁹ Kris in mor e in resisite pour li vin Senyer bann mor e bann vivan.

¹⁰ Me ou, akoz ou ziz ou frer? Akoz ou mepriz ou frer? Nou tou nou pou paret devan Bondye pour ganny zize.

¹¹ Annefe, Lekritir i deklare: Osi vre ki mon vivan, Senyer i deklare, tou zenou pou pliye devan mwan; e tou nasyon pou selebre mazeste Bondye.

¹² Ensi, sakenn nou, pou bezwen rann kont devan Bondye pour son prop lekor.

Pa Fer ou Frer Tonbe

¹³ Alor, annou arete ziz nou prosen. Plito deside pa met devan nou frer, nanryen ki pou ofans li, oubyen fer li tonm dan pese.

¹⁴ Mon konnen e mon asire par Senyer Zezi, napa nanryen ki enpir. Me si en dimoun i konsider en keksoz enpir, alor, sa keksoz i enpir pour li.

¹⁵ Si, ler ou manz en keksoz ou fer lapenn ou frer, ou pa pe azir dapre lanmour. Fer atansyon ki pour en kestyon manze, ou pa vin lakoz lapert en dimoun, pour ki Kris in mor.

¹⁶ Alor, pa les sa ki ou, ou konsider koman byen, vin en size kalonmni.

¹⁷ Rwayonm Bondye pa en zafer manze ek bwar, me i lazistis, lape ek lazwa dan Lespri Sen.

¹⁸ Sa enn ki servi Kris dan sa fason, i fer plezir Bondye, e dimoun i kontan li.

¹⁹ Alor, annou rod sa bann keksoz ki prodwi lape, e rann nou for ansanm dan lafwa.

²⁰ Pa detri travay Bondye pour en zafer manze. An realite, tou keksoz i bon; me i mal si ou ofans ou frer par sa ki ou manze.

²¹ I byen si ou pa manz lavyann, si ou pa bwar diven, oubyen abstenir okenn keksoz ki kapab fer ou frer tonbe.

²² Ou konviksyon ki ou annan, gard li pour ou menm, devan Bondye. Byennere sa enn ki pa santi li koupab ler i azir dapre son prop disernman!

²³ Me sa enn ki annan dout konsernan sa ki i manze, i koupab si i manze, akoz i pa pe azir dapre son konviksyon baze lo lafwa. Annefe tou sa ki nou fer, si i pa baze lo lafwa, i en pese.